Read Yupik Philippians 3 Bible Online

Philippians 3 - Yupik bible

Philippians 3

¹Ilamaa, angnirci Atanermi, man'a elpecen̄un igautekenqigtellra wangni taqsuqutnarqenrituq, elpecen̄un-llu aarnarqevkenani.

²Tau͡gaam mulngakici qimugten̄un, assiilngurmek calilrianun, nuugiryaram-llu ciumurutestainun.

³Tua-i wangkuta nuugiumiimta piciulriamek, Agayutmun piicalalriani Anernerkun, ucuqluku-llu Christ Jesus-aaq, kemegtaq-llu cacetuqutekevkenaku.

⁴Tua-i kemegtaq cacetuquteksunarqekan, wii cacetuqutekiyaryaaqua; yuk alla umyuarteqkan kemegtaq cacetuquteknaluku, wiinga pinruyartua.

⁵Nuugillruatnga erenret pingayunelgatni, Israel-aat ilaklua, Benjamin-aam kinguveqlua, Hebrew-rupiarlua. Alerquutet ciumurutellratgun Pharisee-aarulua,

⁶ilungem ugaani Agayuvik nangtellruaqa; alerquutet-llu elluakekiitgun qanernaunii.

⁷Tau͡gaam unakek'nganka pegtanka, Christ-aq pitekluku.

⁸Ilumun cat tamalkuita pegcuumiranka Christ Jesus-aam Atanema nallunriluaqallerkaa pitekluku; ellii-llu pitekluku cat tamalkuita pegtanka cakaarluki, Christ-aq piksagutnaluku,

⁹elliinecuglua-llu wangnek elluarucingqerpek'nii alerquutet piatnek, tau͡gaam Christ-am ukveqellrakun pimalriamek elluariyaramek ukverkun, Agayutmek kingunelegmek.

¹⁰Ellii nallunritnaluku, makyucian-llu pinia, nangteqellguteknaluku-llu, tuqullrakun-llu ayuqsagulluku.

¹¹Tuqumek maktellguteksuumiryaaqluku.

¹²Umyuarteqevkenii unakumariyukluku, elluarillerkaqa-llu pimariyukluku tau͡gaam pingnatugtua tegunaluku, tuaten tegumallrucimtun Christ Jesus-aamek.

¹³Ilamaa, umyuarteqenritua tegumariyukluku, tau͡gaam man'a atu'urqa, kinguneqa nalluyagulluku ciunemnelnguut-llu pingnatugluki.

¹⁴Akiliutem engelii tekitengnaqaqa Agayutmek kelgumaciqa qilatmun Christ Jesus-aakun.

¹⁵Taumek taqmigingalriani, tuaten umyuangqekilta, tuaten-llu umyuangqeksailkuvci Agayutem nasviciiqaaci.

¹⁶Tau͡gaam natmun ellingramta, atauciq cuqyuteklaut atauciq-llu umyuaqluku.

¹⁷Maligtaqullgutkicia, ilamaa, murilkiciki-llu piyualriit elpecen̄un cuqyutngucirput cuqekluku.

¹⁸Wani-wa amllelriit piyuangata Christ-am kelistaa inglukluku, taukut pulengtaq elpecen̄un qanrutkelaranka, watua-llu qialua qanrutkanka.

¹⁹Taukut picurlagmek iquklitlerkangqertut, aqsaqumeggnek agayutengqertut, kasngukarkarteng-llu ucuryagutekaat, nunam pii umyuaqngamegteki.

²⁰Wangkuta tau͡gaam nunakangqertukut qilagmi, qilagmek-llu atrararkaq Anirturilria Ataneq Jesus Christ-aq utaqaarput, nerinikqapiggluku-llu tekitellerkaa.

²¹Elliin nutaraurcetarkaugaa man'a temvut kasngunarqelria, tememitun-llu ucurnarqelriatun ayuqliriluku, piningqerrami, cat-llu tamalkuita atanirturyunaqngamiki.