Read Yupik Colossae-t 1 Bible Online

Colossae-t 1 - Yupik bible

Colossae-t 1

¹Wii, Paul-aaq, Jesus Christ-am apostle-aara, Agayutem cucukek'ngaa, anelgutvut-llu Timotheus-aaq.

²Ukvelrianun Christ-ami-llu ilamten̄un pektayiilngurnun Colossae-melngurnun: Agayutem Atamta, Atanemta-llu Jesus Christ-am nakleklici uitanqegcivkarluci-llu.

³Quyavik'lararput Agayun, Atanemta Jesus Christ-am Atii, kaigaterrlainarluci,

⁴niiqaanemten̄ek ukverpecen̄ek Christ Jesus-aamun, ukvelrianek-llu kenkillerpecen̄ek.

⁵Neryuniurutsi qilagmelnguq pitekluku. Tamana niitellerci gospel-aam Qaneryaraani piciulriami;

⁶elpecen̄un tekitellra, nunanun tamaitnun tekitellrucimitun; naugiluni-llu elpecen̄i pillrucirmitun, niiterraanerpecen̄ek nallunrirluku Agayutem naklekutii piciulriakun.

⁷Niitellrucirpecetun Epaphras-aamek calillgutemten̄ek Christ-am kevgaanek piciulriamek elpecen̄un.

⁸Elliin-llu qanrutellruakuk, kenkutevcen̄ek Anernerkun.

⁹Man'a pitekluku, wangkuta-llu niiterraanemten̄ek, piicauterrlainaramci nallunriluaqaasqumaluci pisqutiinek, umyuartuluci taringumaluci-llu.

¹⁰Tuaten Atanermi tun'ernarqevkenaci yuusqelluci, ilukegcinaqluci tamalkuitnun, naugiluci caliaqegtaarpeciuggun, nallunririinarluku-llu Agayun.

¹¹Pinirimaluci pinimek, pinian ucurnarqelriim pitaciatun, ilalcirluci pillagavkenaci, angnirluci-llu;

¹²quyavikluku Aata, piyunarivkartevvut pikangqellgutkesqelluki ellualriit tanqigmi.

¹³Elliin aviutaakut tan'gerem pinianek, nugtartellruluta-llu kenkek'ngami Qetunrami angayuqauvianun.

¹⁴Elliin augakun akiliucimaukut, assiilngumten̄ek aug'aricimaluta.

¹⁵Ellii Agayutem tangrrumanrilnguum ayuqekaa piurcimalriit tamarmeng ciuqliat.

¹⁶Tua-i elliikun cat tamarmeng piurtellruata, qilagmelnguut nunamelnguut-llu, alailnguut tangrrumanrilnguut-llu, atanret aqumlleqengraitki, atanruviit-llu atanruvilget-llu, pinilegpaulriit-llu: cat tamarmeng elliikun elliinun-llu piurcimaut.

¹⁷Tua-i ellii cat tamarmeng ciungatni piuguq, cat-llu tamarmeng elliikun piuluteng.

¹⁸Ellii temem qamiquqaa, wani-wa agayuviim, ciuqliungami, ciumek-llu tuqumalrianek maktellruluni; taumek cat tamaitni piunruuq.

¹⁹Aatam pisquciatun Agayutnguciq tamalkuan elliinetesqelluku.

²⁰Uitanqegcin-llu piurtellruamiu aunrallrakun kelistam qaingani, elliikun cat tamalkuita kenegyagucetarkauluki ellminun, nunamiutaungraata qilagmiutaungraata-llu.

²¹Elpeci-llu, elliinek avtellerni inglukluku-llu caliarpeciuggun assiilngurteggun, maa-i kenegyagucetaaci.

²²Tememikun tuqullermikun, tunenaluci ellualriaruluci canganarqutaunaci qanernaunaci-llu ciuqerrani.

²³Ukverkun pektayiilkuvci inguqiumaluci elkarcimaluci-llu, gospel-aam neryuniurutii unitenrilkuvciu niitellerci, piurcimalrianun-llu tamalkuitnun qalarutkumalria qiliim acianelngurnun, tamatum kevgiullerkaanun wii Paul-aaq nakmikumaunga.

²⁴Nangtequa elpeci pitekluci; tau͡gaam quyaunga, wiinga tememkun qaqivsiaresqelluku Christ-am nangteqellra, agayuvik temni pitekluku.

²⁵Tamatum agayuuviim kevgiullerkaanun wii nakmikumaunga, Agayutem picirkiumaciatun alerqurlua elpeci pitekluci, Agayutem qaneryaraa tamalkuan qalarutkesqelluku;

²⁶ukanirpak yuut taringesciigalkiit, maa-i tau͡gaam ukveqestainun taringnariluni.

²⁷Agayutem-llu nallunrircetai Jews-aarunrilnguut nallukiitnek, elliin tukuutainek ucurnarqelrianek ucurnam-llu neryuniurutiinek Christ-amek elpecen̄i uitalriamek.

²⁸Tauna qalarutkarput, yuk-llu tamalkuan qarutaarluku ayuqucirturluku-llu elisngamek tamiinek; yuut tamalkuita Christ Jesus-aami taqmigingaluki Agayutmun tunenaluki.

²⁹Tamana caliaqengnaqaqa pinimek cikiumatacimtun elliinek.