Read Yupik Colossae-t 2 Bible Online

Colossae-t 2 - Yupik bible

Colossae-t 2

¹Tua-i elpeci pitekluci cakviuqapiguciqa nallunriciu, Laodicea-melnguut-llu pitekluki, tamalkuita-llu kegginamnek tangeqsailnguut.

²Ircaqruit angnimek pingesqelluki kenkakun atunem ilakliulluteng, nallunritesqelluki taringeluaqaumaluki-llu Agayutem nallunarqelriari, Christ-am-llu.

³Elliini elisngacim nallunrilucim-llu tukuutai iirumaut.

⁴Mat'umek qanrutamci yugmun iqlutmurutnayukluci puqigluni qanellrakun.

⁵Tuaten-llu kememkun nayunrilengramci, anernerkun nayuramci, angniutekluci ayuqucirci tangerrluku asvailucirci-llu ukverpeciuggun Christ-ami.

⁶Taumek ciuniullrucirpecetun Christ Jesus-aaq Ataneq, tuaten-llu elliini yuuci.

⁷Ellii acingqerrvikluku, inguqangqerrvikluku-llu, ukverkun-llu asvairumaluci ayuqucirtuumallrucirpecetun, 'lingrayugglainarluci.

⁸Mulngakici yuum iqlutmurucuaraaci piciliamikun alarrnarqelriakun, yuut piciryarangutaitgun, nunamiut piciryarait aturluki Christ-am pia pivkenaku.

⁹Tua-i elliini Agayutem ayuqucia tamarmi uitiin.

¹⁰Elpeci-llu qaqirmiringauci elliini atanrulriami atanruvilegnun, pinilegnun-llu.

¹¹Elliikun-llu cali elpeci nuugiumauci nuugiryarakun unatetgun piyarailngurkun, kemgem assiilnguin pegtellratgun, Christ-am nuugiryaraakun.

¹²Ellii-llu ilakluku tungmagcimaluci anglluryarakun, tuaggun-llu cali maktellgutkellruarci Agayutem ukveqellrakun makcecillranek tuqumek.

¹³Elpeci-llu, assiilngurpecen̄i tuqumalriani kemegkun-llu nuugiumanrilngurni, unguircetellruaci ellii ilakluku, assiilngurpecen̄ek tamalkuitnek au͡g'arilluci;

¹⁴picurlauteput igausngalriit perrirluki au͡g'allrui, kelistamun-llu ussukcaulluki.

¹⁵Piunrirai-llu atanruvilget pinilegpaulriit-llu caunriluciat maniluku ellamiunun, elliin cirlakngamiki.

¹⁶Taumek nerlallerpeciuggun mel'allerpeciuggun-llu qanernarqevkenaci, wall'u ernerteggun, wall'u iralum pit'elallrakun, wall'u Sabbath-aatgun.

¹⁷Tamakut tekitarkanun tarenraugut, tau͡gaam tema Christ-am pikaa.

¹⁸Yugnun teguivkaryaqunaci akiliutevcen̄ek, elpecen̄ek ilalkesqengraiceci an'gilat-llu ciktaarvikesqelluki, unayaquurluci-llu nallukmeggnun, ellmeggnek pivakluteng umyuamegteggun kemegtarkun,

¹⁹atavkenateng qamiquulriamun, temem nerqestiinun ilakliiyutestiinun-llu atunem usgunrikun yualuikun-llu piniriinarluni, Agayutem pingiinartelluku.

²⁰Taumek Christ-aq tuqullgutkellrukuvciu, nunam piciryarainek, ciin nunamiungulriatun cali inerquutaat qulliliumaiceci, makut:

²¹“Agturyaqunaku,” “Uigyaqunaku,” “Tegularyaqunaku,”

²²tamakut tamarmeng piunrirarkat atullermegteggun, yuut alerquutait elitnaurutait-llu maliggluki?

²³Makut ilumun atawaungat'laryaaqut agayumacimun ellmikutuucimun-llu temem-llu cakaallranun; tau͡gaam camun atuunritut kemgem-llu cayullra taqevkarciiganaku.