Read Yupik Colossae-t 3 Bible Online

Colossae-t 3 - Yupik bible

Colossae-t 3

¹Tua-i-llu elpeci Christ-aq unguillgutkellrukuvciu, yuarciki pakemkumiutaat, tuani-llu Christ-aq, Agayutem tallirpilirnerani aqumgalria.

²Kitaki cucukiciki pakemkumiutaat, nunamiutaat cucukevkenaki.

³Tua-i tuqullruavci, Christ-aq-llu unguvavci iirumallgutekngaku Agayutmi.

⁴Christ-aq unguvavut alaiqan, elpeci-llu alaillgutekciqerci ucurnami.

⁵Taumek kemgem aturyullri tuquciki, makut: acunianeq, caarrliqsarat, kemgem cayullra assiilngurkun, aglumayaraq, ayariyaraq-llu, wani-wa agayutngualiyaraungan.

⁶Tua-i makut pitekluki Agayutem eq'uqertii tuciiqngan inerciigalngurnun yugnun.

⁷Elpeci-llu piyuavikellruaci mat'um ciungani ayuquciqellerpecen̄i.

⁸Tau͡gaam watua cali makut pegciki: qenqercaraq, caaqercaraq, iqlutun umyugiuciyaraq, qacungakiyaraq, qanerrlugyaraq-llu.

⁹Atunem iqluquteksaunaci, yuuciq ak'allaq pegtellruavciu caliartuumaan,

¹⁰yuuciq-llu nutaraq at'ellruluku, nutaraurcimalria nallunrilucikun ayuqelciluku piurtestellra.

¹¹Greek-aarung'e'rmeng wall'u Jews-aarung'e'rmeng, nuugiumang'e'rmeng wall'u nuugiumanrilnge'rmeng, agayumanrilnger'meng nallumang'er'meng-llu, teguarung'e'rmeng teguarunrilnge'rmeng-llu, Christ-aq tamarmeng pikaat, kiimi-llu piuluni ellaitni.

¹²Taumek Agayutem cucukek'ngaini, ellualriani, kenkumalriani, askiciki takumcukiyaraq, pinqegciyaraq, ellmikutuuyaraq, pillaganritnaq, ilalciuneq-llu.

¹³Atunem akiurtaagutevkenaci, atunem-llu au͡g'aritaagulluci, yuk ilaminun pitengqerquni; tuaten Christ-am au͡g'aritellruciatun elpeci, tuaten-llu pinarquci.

¹⁴Makuni-llu arcaqanruluku, kenka atuqiciu ilakliiyutekngamteggu qaqimalriamek.

¹⁵Christ-am uitanqegcitii ircaqurpecen̄i atanruvkarluku, tamatumun kelgumiivci ataucimi tememi. Quyaluci-llu pici.

¹⁶Christ-am Qaneryaraa tukuutetun pitarrluku uitavkarciu ircaqurpecen̄i elisngakun; elitnaurulluci atunem; qarutaarulluci-llu Psalm-atgun, yuarutetgun-llu agayussuutetgun; ircaqurpeciuggun 'lingrayugluci Agayutmun.

¹⁷Callerpecen̄i-llu tamiin, caliaci qanelci-llu, tamalkuita Atanrem Jesus-aam atrakun atuqiciki, quyavikluku-llu Agayun Aata elliikun.

¹⁸Nulirrulriani, uivcen̄un maligtaquurauci, Atanrem pisquciatun.

¹⁹Uingulriani, nuliaci kenkiciki, pileryagavkenaki-llu.

²⁰Irniarulriani, angayuqaci niisngaciki tamaitgun; tua-i man'a Atanermun ilukegcinaqngan.

²¹Ataulriani, irniaci qinucetaaqsaunaki, asmumaqerrnayukluki.

²²Pisten͞gulriani, ataneci nunamiungulriit niisngaciki tamaitgun, tangvallratni kiingan pivkenaci, yugnun nanrarcetaalriacetun; tau͡gaam malrupegtevkenaci, Agayun qigcikluku.

²³Callerpecen̄i tamiin, tengruluci calikici Atanermun kevgiulriatun, yugnun pivkenaci.

²⁴Nalluvkenaku man'a, Atanermek akurturarkaucirci paiciutmek, akingutekluku; tua-i Ataneq Christ-aq kevgiuravciu.

²⁵Tau͡gaam iqlutuuyulria iqlutun yuullmi akiliutiinek pingarkauguq; Agayun-llu yuum taungucianek catkingaituq.