Read Yupik 1 Thessalonica-t 2 Bible Online

1 Thessalonica-t 2 - Yupik bible

1 Thessalonica-t 2

¹Tua-i nallunritarci ilamaa, elliinginaq elpecen̄un tekitellrunrilucirput.

²Tau͡gaam Philippi-mi nangcimallrungramta, kasngunarqellriamek-llu pimaluta nallunrilucirpecetun, Agayutkun uluryaunata Agayutem Gospel-aara qalarutkellruarput, inglukumangramta.

³Eguaquutvut iqluurutngunrituq caarrliqutnguvkenani-llu, usvituyarutnguvkenani-llu.

⁴Tau͡gaam Agayutmek caliarkicimacimcetun Gospel-aamek, tuaten qallatelartukut, yuut ilukegcivkallerkaat umyuaqevkenaku, tau͡gaam Agayun, ircaqumten̄ek yuvririlalria.

⁵Nanramciluci-llu piksaitamci nallunrilucirpecetun, camek-llu unangellerkaqa umyuaqevkenaku, Agayutem nallunritaanga!

⁶Yugnek nanrautekangengnaqellrunritukut, wall'u elpecen̄ek, allanek-llu, takarnassaagararkauyaaqengramta Christ-amun apostle-aarucirput aturluku.

⁷Tau͡gaam mulngakluci pillruamci mikelngurmek aulukilriatun.

⁸Taumek, kenekngamceci Agayutem Gospel-aara nalliikun tunyuuminritarput elpecen̄un, tau͡gaam yuucirput-llu cali, ilukegcitekngamceci.

⁹Nallunritarci, ilamaa, caliallerput cakviullerput-llu, nenguluugutnguyuumiilamta elpecen̄un caliuralallruukut erenrani unuungraan-llu, Agayutem Gospel-aara elpecen̄un qalaruteklemten̄i.

¹⁰Nallunritarpecikut-llu Agayutem-llu nalluvkenata, canganarqutaunata elluarrluta-llu qanernarqevkenata-llu ayuqucillerput akunlevcen̄i ukvelriani.

¹¹Tua-i nallunrilavciu, ataulriim yum'inek pilauciatun, qarutaarillerput elpecen̄ek, caceturqaurluci-llu ayuqucirturluci-llu.

¹²Agayutmun akurtuyunaqluci yuusqelluci, kelegtevcen̄un Angayuqauviminun ucurnarquciminun-llu.

¹³Man'a pitekluku Agayun quyavikerrlainararput, tua-i-wa Agayutem qaneryaraa wangkutnek niitellerci akurtunerpecen̄i ciuniullruarci yugtauvkenaku, tau͡gaam piciulriamek Agayutmun qaneryaraquciatun elpecen̄i calillra ukverumalriani.

¹⁴Tua-i elpeci anelgutemten̄i, ayuqsagucavciki agayuviit Judea-mi, Christ Jesus-aamelnguut; tua-i elpeci-llu nunalgutevcen̄ek nangcimiivci ellait nangcimallruciicetun Jews-aanek.

¹⁵Taukut Ataneq Jesus-aaq tuqutellruat prophet-aat-llu, antellruluta-llu; ilukegcivkanritaat-llu Agayun, inglukluki-llu yuut tamalkuita.

¹⁶Inerqularaitkut-llu Jews-aarunrilnguut qalarutesqevkenaki anirtuumallerkaatnun, assiilnguteng qaqitnaluki. Wani-wa Agayutem eq'uqertiin tusvikarkaurtai akwarpak.

¹⁷Tau͡gaam, ilamaa, avvingatqacuaqangramta tememteggun, ircaqumteggun pivkenata, tangerrsukapigtamceci tungaunaci.

¹⁸Taumek ataucirquunrilngurmek ullangnaq'laryaaqamceci, wii-wa, Paul-aaq; tau͡gaam Satan-aam pivkaqsaitaakut.

¹⁹Camek neryuniurutengqerceta? Camek-llu angniutekangqerceta? Camek-llu ucurnarqutengqerceta? Elpeciingunrituci-qaa ciuqerranetarkani Atanemta Jesus Christ-am, tekiskan?

²⁰Tua-i elpeci ucurnarqutekngamceci angniutekluci-llu!