Read Yupik 1 Thessalonica-t 3 Bible Online

1 Thessalonica-t 3 - Yupik bible

1 Thessalonica-t 3

¹Taumek nuryagucamceci, Athens-aamun wangkuta unegtengramta,

²ilavut Timotheus Agayutem pistii, Christ-am Gospel-aarani calillgutvut, ayagcetarput pinirivkaasqelluci qarutaaresqelluci-llu ukverci pitekluku.

³Yugmun cirlakutekesqevkenaki makut cakviurutet; nallunrilucirpecetun atu'urkaqngamteki.

⁴Tua-i ilumun nayullemten̄i qanrutellruamceci ciunguluku nangteqarkaucimten̄ek, maa-i-llu piciurrluni, elpeci-llu nalluvkenaku.

⁵Man'a pitekluku, nuryagucamceci ayagcecillruunga, ukverpeci ayuqucia nallunrirnaluku, naspaatmun naspaallrunayukluci caliarput-llu elliinginaq piullrunayukluku.

⁶Tua-i maa-i Timotheus elpecen̄ek utercan, niitekegcivkarluta-llu ukverpecen̄ek kenkevcen̄ek-llu, elpecen̄un-llu umyuaqerrlainaucimten̄ek tangerrsugyaaqucimten̄ek-llu, wangkuta-llu cali tangerrsugyaaqucimcetun elpecen̄ek.

⁷Taumek, ilamaa, nangteqlemten̄ek cakviullemten̄ek-llu caceturiqertukut ukverpeciuggun.

⁸Nutaan unguvaukut, pektayiinaci Atanermi nangerngiivci.

⁹Qaillun elluarrluta quyatekciqseta elpeci Agayutmun, angniriavcikut Agayutem ciuqerrani.

¹⁰Piicagaqluta erenret tamaitni unugtuumaita-llu tangerrsugluci, qaqitnaluku ukverpeci nuringatii.

¹¹Agayutem Atamta, Atanemta-llu Jesus Christ-am, ellminek ciuliqagglikut elpecen̄un.

¹²Elpeci-llu Atanrem pikanirlici kenkillerpeciuggun, elluarrluci kenkutevkarluci yugnun-llu tamalkuitnun, wangkuta pilaucimcetun elpecen̄un.

¹³Ircaquci pektayiirutesqelluki canganarqutaunaki menuicarakun Agayutem Atamta ciuqerrani, Atanemta Jesus Christ-am tekitellerkaanun ellualriit ilakluki.