Read Yupik 1 Thessalonica-t 4 Bible Online

1 Thessalonica-t 4 - Yupik bible

1 Thessalonica-t 4

¹Cali-llu qarutaaramceci anelgutkelriani, eguaqurluci-llu Atanerkun Jesus-aakun ayuqucirtuumacirpecetun wangkutnek yuullerkarpecen̄ek ilukegcinaqluci Agayutmun, tua-i tuaten pingiinaasqelluci.

²Tua-i nallunrilavciki elpecen̄un alerquuteput Atanerkun Jesus-aakun.

³Tua-i Agayutem pisqutekngaku, kenciknarivkallerkarci, akusrarutekisqevkenaci.

⁴Tamarpeci nallunritesqelluci qaillun nulirtuumallerkarpecen̄ek menuunaci qigcikulluci-llu,

⁵aglumakiksaunaci arniqsarakun, agayumanrilnguut pilauciicetun Agayutmek nallulriit.

⁶Picurlanritnaurtuq yuk, ilani-llu piirassaagpek'naku mat'ukun, tua-i-wa Atanrem akinaurciqngaki tuaten pilriit, mat'umek elpegcilillrukemceci ciunguluku nallunaillruluku-llu.

⁷Agayutem tungcirtullrunritaakut caarrlugkun yuusqelluta, tau͡gaam menuilngurkun.

⁸Taumek kina caunrilkilria, yugmek caunrilkinrituq tau͡gaam Agayutmek cikiqengllermek wangkutnun Anernermek Tanqilriamek.

⁹Tau͡gaam anelgutminek kenkinek pitekluku igarnarqenricaaqamci, tua-i Agayutmek ayuqucirtuumiivci kenkutesqelluci atunem.

¹⁰Ilumun-llu tuaten pilaryaaqaci ilaci Macedonia-mi. Tau͡gaam ilamten̄i qarutaaramceci tuaten pikanirrlainaasqelluci.

¹¹Nepailngurkun yuungnaqkici murilkelluki yuungnaqutekaci, unatevciuggun-llu caliluci alerqullrucimcetun.

¹²Ilakumanrilnguut elluaknauraiceci, nuuqaitnaurtuci-llu.

¹³Ukvellgutmaa, nalluyurcisqumanricaaqamci, imkut yuunrillret pitekluki, iluteqenritnaurtuci imkucetun neryuniurutailngurcetun.

¹⁴Wani-wa ukvekekumteggu Jesus-aam tuqullrucia, unguillrucia-llu, tuacetun cali Agayutem imkut Jesus-aami qavalriit malikeciqai.

¹⁵Tua-i qanrutamceci Atanrem qanellratun wangkuta unguvakumta uitaluta-llu Atanrem tekitellerkaanun, ciullegngaitqapigtaput qavalriit.

¹⁶Tua-i Ataneq tungaunani atrarciqngan qilagmek qayagpagluni, an'gilat piunrata eriniinek, Agayutem-llu cupu'uryaraanek; Christ-ami-llu tuqumalriit makciiqut ciumek.

¹⁷Nutaan-llu wangkuta anerteqellriani, uitalriani-llu cayuumaciqukut qulmun pillgutekluki-llu amirluni, Ataneq ullagluku pagaani ellami; tua-i nayurarkaurciiqerput Ataneq akwanun.

¹⁸Taumek atunem caceturqauruci makutgun qaneryaratgun.