Read Yupik 1 Thessalonica-t 5 Bible Online

1 Thessalonica-t 5 - Yupik bible

1 Thessalonica-t 5

¹Tau͡gaam qaku, qaillun-llu ellillerkaanek igarvikekaunrituci, ilamaa.

²Nutem elluarrluci nallunrilavciu, Atanrem Ernerkaa tekitarkauluni teglegyulriatun unugmi pilriatun.

³Wani-wa qanqata, “Uitanqegcinarquq civuuranarqelriartaituq,” tua-i picurliim alqunaq tekiciiqai tuarpiaq nepliryaraat irniyulria tekitelaqiit, qimagngaitut-llu.

⁴Tau͡gaam elpeci ilamten̄i, ukuut, tan'germetenrilavci Ernerkam taum teglelriatun tekiarciiqenritaaci.

⁵Tamarpeci tanqiim irniaqaaci erenrem-llu irniaqaaci; unuum wall'u tan'gerem pikenritaakut.

⁶Taumek qavanritelta, imkucetun allacetun pivkenata, tau͡gaam tupaumalta taangiqeksaunata-llu.

⁷Wani-wa qavalriit unugmi qavalartut, taangiq'lalriit-llu unugmi taangiq'lartut.

⁸Tau͡gaam wangkuta erenrem pikngakut, taangiqenritelta, qat'gailitaq aturluku ukverem kenkem-llu pia, qamiqurriryailkun-llu anirtullerkamek neryuniurutngulria.

⁹Wani-wa Agayutem qenrutarkauvkanritaakut tau͡gaam anirturarkaurcetaakut Atanemteggun Jesus Christ-akun.

¹⁰Tauna tuqullruuq pitekluta, tupaumallemten̄i wall'u qavallemten̄i unguvallgutkarkaungamteggu.

¹¹Taumek atunem qanenqegcaarauskici qaruyulluci-llu pilaucirpecetun.

¹²Qarutaaramceci-llu, ilamten̄i, akunlevcen̄i calilriit qigcikesqelluki, ataniumasceci Atanerkun elucilirturceci-llu.

¹³Pivakluki-llu kenekluki caliarat pitekluku. Uitanqegcillgutkici-llu.

¹⁴Ellimerturamceci, ilamten̄i, aarcirturciki qanrucunailnguut, qarutaarciki caceskilnguut, teggucirciki pinialnguut, yuut-llu tamalkuita pillagavkenaki.

¹⁵Assiilnguq akinauryaqunaciu assiilnguullgutiinek; assilria atungnaqerrlainarluku ilavcen̄un yugnun-llu tamalkuitnun.

¹⁶Angnirrlainaqici.

¹⁷Piicagglainaqici.

¹⁸Cani tamaitni quyarrlainaqici; tua-i man'a Agayutem pisqutekngaku Christ Jesus-aakun elpeci pitekluci.

¹⁹Anerneq Tanqilria nipcaqunaku.

²⁰Caunrilleksaqunaku qaneryaraq ciunerkamek apertuilria.

²¹Atu'urkaci nallunairraalarciki; assilria-llu tegumiaqluku.

²²Assiilnguut tamalkuita negurluki.

²³Uitanqegcitem-llu Agayutiin ellminek menuirutqapiarlici tamalkirrluci; Agayun-llu kaigavikaqa anerneci tamalkuita, tarneci-llu, temci-llu canganarqutaitesqelluki, Atanemta Jesus Christ-am tekitellerkaanun.

²⁴Piciuguq kelegceci, elliin-llu tamakut piciurceciiqai.

²⁵Ilamtaa, piicautelaqicikut.

²⁶Ilakumalriit umyuaqutemten̄ek pikiciki tanqilriakun melugaryarakun.

²⁷Ellimerramci Atanerkun igaun man'a naaqesqelluku ilakumalrianun tamalkuitnun.

²⁸Atanemta Jesus Christ-am naklekician, nayurlici. Amen.