Read Yupik Joshua 1 Bible Online

Joshua 1 - Yupik bible

Joshua 1

¹ATANREM pistiin Moses-aam tuqullran kinguani, ATANREM qanrutaa Moses-aam ikayua, Joshua Nun-am qetunraa.

²Qanertuq, “Pisteka Moses-aaq tuquuq. Upci watua, elpet tamarmeng-llu Israel-aam yui, qerarluku-llu Jordan-aaq Kuik nunamun ellaitnun cikiutemnun.

³Moses-aaq qanrutellrucimtun, nuna tamalkuan piyuavigkaci ciukiutekellruaqa elpenun tamalkuitnun-llu yumnun.

⁴Nunautevci engelii ayagciquq nunamek kinreskiinek ungalamelngurmek tekilluki Lebanon-aam Ingrii negeqvamelnguut; Kuigmek-llu Euphrates-aamek calarami, Hittite-at nuniitgun, kanavami Imarpik Mediterranean-aaq tekilluku.

⁵Joshua, kia cirlakngaitaaten unguvallerpet taktaciatun. Nayurciqamken Moses-aaq nayullrucimtun. Nayurrlainarciqamken kesianek; watqapik unisngaitamken.

⁶Ciumuaqina, nalirrugcaqunak-llu, ciuliqagtekciqngatgen ukut yuut maani nunami uitallermeggni akqutkellemnun ciuliaritnun.

⁷Kiingan tua-i ciumuaqina, nalirrugcaqunak-llu; maligtaqunricaqunaki-llu tamalkuita alerquutet pistem̄a Moses-aam elpecen̄un tunellri. Ilii pinriteksaunaku piluaqerniartuten ayallren tamalkuan.

⁸Alerquutet kalikait naaqumarrlainarcetaqluki agayullerpecen̄i. Elitnaurluki erenrani unugtuumaan, maliggluki-llu taukuni igausngalriit tamalkuita. Tua-i piluaqerciquten natmun ayallren tamiin.

⁹Neq'akekiu alerquutekelqa ciumuaresqelluten nalirugtevkenak! Alingevkenak qacuvallaksaunak-llu, tua-i wii ATANEQ Agayutevni nayuamken ayallren tamiin.”

¹⁰Tua-llu Joshua-m alerqurai yuut ciuliqagtait

¹¹cen̄ircesqelluki arulaingqaviatgun yuut qanrulluki, “Neqkanek upluci, erenret pingayuatni qerarciqaci Kuik Jordan-aaq, yiryarturluku nuna ATANREM Agayutevci cikiutii.”

¹²Joshua-m-llu qanrutai Reuben-aam Gad-am-llu yuullgutkelriartai Mannasseh-m-llu ilakelriartain avgit,

¹³“Neq'akiiciu ATANREM kevgaan Moses-aam qanellra elpecen̄un, ATANERMUN Agayutevcen̄un cikirciqniluci mat'umek nunamek Jordan-aam calaralirnerani uitalriamek nunakarpecen̄ek.

¹⁴Nuliaci, irniaci, ungungssici-llu maanciiqut, tau͡gaam anguyagceci upingalriit anguyautellerkamun, qerarciqut ciungatgun allat Israelite-at ikayurnaluki

¹⁵nuna kanavalirnerani Jordan-aam pikliutnatkaatnun, ATANREM Agayutem ellaitnun cikiutekellra. Qanrumarikan aarnairutniluku Israel-aanun, nutaan tailuci nunalgartarkauluci nakmiin nunavcen̄un calaralirnerani Jordan-aam, Moses-aam, Agayutem kevgaan, cikiutekellrani.”

¹⁶Kiugaat-llu Joshua, “Wangkuta qanllerpetun piciqukut ayaasqellerpenun-llu ayagciqukut.

¹⁷Niisngaciqamteggen Moses-aaq niisngallrucimcetun, ATANREM Agayutvet nayurliten Moses-aaq nayullrucirmitun!

¹⁸Kia imum asgurakekuniu piyunarqucin wall'u narureskaku alerquuteklerpet ilii tuqucimaarkauguq. Piugteqkina tengruluten-llu!”