Read Yupik Joshua 10 Bible Online

Joshua 10 - Yupik bible

Joshua 10

¹Adonizedek-aam, angayuqran Jerusalem-aam, niitaa Joshua-mun tegullrucia piunrirluku-llu Ai-aq tuqulluku-llu angayuqra, Jericho pillrucimitun angayuqra-llu. Niituq-llu Gibeon-aam yuinun Israelite-at arenqiirtullgutkellruniluki, nunalgucirluki-llu uitaluteng.

²Jerusalem-aam yui cakneq tatamellruut, tua-i-wa Gibeon-aaq allacetun nunarpagtun angtiin angayuqerluni-llu; angenruluni Ai-ami, angutai-llu pinirluteng.

³Tua-i-llu Adonizedek-aaq qanermek ayagceciluni Hoham-amun, Hebron-aam angayuqranun, Piram-aamun, Jarmuth-aam angayuqranun, Japhia-mun, Lachish-aam angayuqranun, Debir-aamun-llu, Eglon-aam angayuqranun, qanerluni,

⁴“Tailuci ikayuryarturcia curullemni Gibeon-aaq, tua-i-wa arenqiirtullgucillrulliniatgu Joshua Israel-aat-llu.”

⁵Ukut talliman Amorite-at angayuqrit Jerusalem-aarmiu, Hebron-aarmiu, Jarmath-aarmiu, Lachish-aarmiu, Eglon-aarmiu-llu quyurrluteng avatairaat Gibeon-aaq anguyagluku-llu.

⁶Angutai Gibeon-aam qanermek ayagceciut Joshua-mun Gilgal-aami qanerluteng, “Tuacesqina'aryaqunata! Tailuten egmian ikayurkut! Anirturkut! Qemililriamelnguut Amorite-at angayuqrit tamarmeng quyurrluteng curugaitkut!”

⁷Tua-i Joshua ayagtuq Gilgal-aamek malikluki anguyagten̄i tamalkuita-llu caprilnguut pinilriit-llu angutet.

⁸ATANREM-llu qanrutaa Joshua, “Alikevkenaki, ak'a cirlakillerkarpenek cikillruamken. Atauciunge'rmi nangengqangaituq ingluliurluten.”

⁹Unugpak Joshua anguyagten̄i-llu piyuagut Gilgal-aamek Gibeon-aamun, alapen'errluki-llu anguyagait Amorite-at.

¹⁰ATANREM Amorite-at nanikuallagcetai tangellratni Israel-aam anguyagtainek. Israelite-at-llu tuqurqait Gibeon-aami maliggluki-llu tumyaraakun mayuryaram Beth Horon-aamun, angumaurluki callugluki ungalatmun Azekah Makkedah-llu tekillukek.

¹¹Amorite-at-llu qimallratni Israelite-aam anguyagtainek atrallratni-llu Beth Horon-aamun mayuryaramun ATANREM kavtagpagnek pirciurcetai ciunrat Azekah tekilluku. Amllenrit tamaani tuqucimallruut kavtagteggun, Israelite-aam anguyagtaikun tuqucimallrat ikgellruluni.

¹²Taumi ernerni ATANREM Israel-aat cirlakivkallrani Amorite-anek, Joshua qallatuq ATANERMUN. Ciuqerratni Israelite-at qanertuq, “Akertaa, arulaira quliinun Gibeon-aam; Iraluuq, arulaira quliinun Aijalon-aam kuignayuan.”

¹³Akerta-llu uitaurtuq iraluq-llu pekteksaunani ukut angayuqauvillgutkellriit ingluteng cirlaknatkaatnun. Una igausngauq Jashar-aam kalikaini. Akerta uitaurallruuq qiliim qukaani atraqsaunani-llu ernerpak.

¹⁴Watqapik ciungani, tuakenirnek-llu tuaten ayuqellriamek ernertangqeksaituq, ATANREM niilluku yuum piyullra; ATANREM Israel-aat calluucilluki.

¹⁵Mat'um kinguakun Joshua anguyagten̄i-llu utertut uitallermeggnun Gilgal-aamun.

¹⁶Talliman Amorite-at angayuqat qimallruyaaqut iirumaluteng-llu qiurem nayugnerani Makkedah-mi.

¹⁷Iliita nataqai Joshua-llu qanrulluku nani iirumaciatnek.

¹⁸Qanertuq, “Akagcici angelrianek teggalqunek iteryaraanun nayunrem. Nayurten̄ek-llu tuavet elliiluci,

¹⁹tau͡gaam elpeci tuancaqunaci. Kingunrirtu'rtu'rqiciki ingluci, kingunratnek curukaraqluki; nunaitnun tekiceteksaunaki! ATANREM Agayutevci cikiraaci cirlakillerkarpecen̄ek taukunek.”

²⁰Joshua-m Israel-aat-llu tuqurqait, tau͡gaam ilait nunarpiim qacarneran iluanun uqilluteng tuqucimallrunritut.

²¹Tua-llu tamarmeng Joshua-m anguyagtai cavkenateng utertut elliinun arulaingqavimeggni Makkedah-mi. Watqapik-llu tamaani yuum Israelite-at inglukluki qanerciigatuq.

²²Tua-llu Joshua qanertuq, “Ikirrluku iteryaraa nayunrem taiciki imkut talliman angayuqat wangnun.”

²³Tua-i nayuneq ikirtaat, angayuqri-llu Jerusalem-aam, Hebron-aam, Jarmuth-aam, Lachish-aam, Eglon-aam-llu anutait

²⁴tailluki-llu Joshua-mun. Joshua-m-llu Israel-aat angutait taisqai ellimerrluki-llu atanerruat malillni tailuki angayuqat uyaqurritgun tucesqelluki. Tuaten-llu piut.

²⁵Tua-llu Joshua qanertuq atanerruaminun, “Alingevkenaci qacuiqsaunaci-llu; ciumuuci nalirrugtevkenaci-llu, waten ATANREM piciqngaki tamalkuita ilukesteci.”

²⁶Tua-llu Joshua-m tuqutai angayuqat agarrluki-llu tallimanun napanun, temait-llu tuanlluteng atakurnatkaanun.

²⁷Akerta tevian Joshua-m pisqen͞gateng temait atrartait nayugnermun-llu eggluki iirumavillratnun. Angtuanek-llu teggalqunek patuluku iteryaraa. Maa-i cali taukut tuanlluteng.

²⁸Joshua-m curukallrua teguluku-llu Makkedah angayuqra-llu tuani ernermi. Nunarpagnelnguut tamalkuita tuqutellruit; iliit unguvaluku unitevkenaku. Makkedah-m angayuqra pillrua Jericho-m angayuqra pillrucimitun.

²⁹Mat'um kinguakun Joshua anguyagten̄i-llu ayagturallruut Makkedah-mek Libnah-mun anguyagluku-llu.

³⁰ATANREM-llu Israelite-at cirlakillerkaatnek cali cikirai nunarpagmek taumek angayuqranek-llu. Kina uitatenritaat, tuqutait tamalkuita yuut tuanelnguut. Jericho-m-llu angayuqra pillrucimegcetun angayuqra tuaten piat.

³¹Mat'um kinguakun Joshua anguyagten̄i-llu ayallruut Libnah-mek Lachish-aamun avatairluku-llu anguyagluku.

³²ATANREM cali Israelite-at cikirai cirlakillerkaatnek Lachish-aamek erenrem anguyautellrata aipaani. Libnah pillrucimegcetun kina uitatevkenaku tuqutellruit nunarpagmelnguut tamalkuita.

³³Horam-aaq, Gezer-aam angayuqra, tailuni ikayuucarturyaaquq Lachish-aarmiunun, tau͡gaam Joshua-m cirlakaa anguyagtai-llu atauciungraan iliit unguvavkarpek'naku.

³⁴Cali, Joshua anguyagten̄i-llu ayagtuq Lachish-aamek Eglon-aamun; tauna-llu avatairluku curugluku.

³⁵Teguat tauna tuani ernermi yuut-llu tamalkuita tuqulluki Lachish-aami pillrucimegcetun.

³⁶Taum-llu kinguakun Joshua anguyagten̄i-llu ayagtut Eglon-aamek mayurluteng qeminun Hebron-aaq ullagluku. Anguyagaat-llu

³⁷teguluku-llu. Tuqutaat-llu angayuqaq yuut-llu tamalkuita nunarpagnelnguut, nunarrarni-llu yaaqsinrilkiitni uitalriit. Joshua-m piunrirtaa nunarpak caunriqapiggluku, Eglon-aaq pillrucimitun. Kina tuanelnguq uitatevkenaku.

³⁸Tua-i-llu Joshua anguyagten̄i-llu utertut Debir-aamun anguyagluku-llu.

³⁹Tegua angayuqertuumaan nunarraat-llu canimelkai. Yui-llu tamalkuita tuqulluki. Joshua-m Debir-aaq pia angayuqra-llu, Hebron-aaq Libnah-llu angayuqakek-llu pillrucimitun.

⁴⁰Joshua-m-llu nuna tamalkuan tegua. Cirlakai-llu angayuqat qemililriami, calaralirnermi-llu uvernermelnguut, kanavalirnermelnguut-llu acilqamelnguut, kinertellriani-llu ungalalirnermi uitalriit. Kina uitatevkenaku; tamarmeng tuqucimaluteng. Man'a-wa ATANREM Agayutiita Israel-aat alerquutekellrua.

⁴¹Tua-i Joshua-m cirlakaa nuna tamalkuan, Kadesh Barnea-mek ungalalirnermi Gaza-mun canimelkiini cen̄am, ilakluku nunii Goshen-aam, negetmun-llu tekilluku Gibeon-aaq.

⁴²Joshua-m cirlakellrui tamalkuita angayuqat nunait-llu ataucikun, tua-i-wa ATANREM Agayutiita Israel-aat calluucicateng.

⁴³Mat'um kinguakun utertut uitallermeggnun Gilgal-aami.