Read Yupik Joshua 11 Bible Online

Joshua 11 - Yupik bible

Joshua 11

¹Israel-aat cirlakillratnek qanemcimek niicami Jabin-aaq, angayuqra Hazor-aam, qanermek ayagceciuq Madon-aam angayuqranun Jobab-amun, angayuqrinun-llu Shimron-aam Achshaph-aam-llu,

²allanun-llu angayuqanun: neglirnermi qemililriami, Jordan-aam-llu Kuignayuani ungalalirnerani Galilee-am Nanvaan, mengliitni-llu ingrit, cen̄ami-llu Dor-am yaaqsinrilkiini.

³Qanermek-llu cali ayagceciuq Canaan-aamun atunem avategkeni Jordan-aam, Amorite-anun, Hittite-anun, Perizzite-anun, Jebusite-anun-llu qemilegmi, Hivite-anun-llu uitalrianun aciani Ingrim Hermon-aam Mizpah-m nuniini.

⁴Taigut anguyagteteng tamalkuita malikluki. Anguyagtet amllertaluteng imarpiim cen̄iin qau͡gyaitun. Horse-angqerrluteng-llu akalrialegnek-llu ayagassuutnek amllernek.

⁵Tamarmeng makut angayuqat quyurrluteng ilikellruut uitavililuteng-llu Merom-aam Kuiggaariin caniani callugnaluki Israel-aat.

⁶ATANEQ qanertuq Joshua-mun, “Alikevkinaki. Waten elliqan unuaqu tuqutellrurciiqanka Israel-aat picilluki. Elpeci horse-aita iruitni yualuit kepurciqaci ekuavkarluki-llu akalrialget ayagassuutait.”

⁷Tua-i Joshua-m yun'i-llu alapen'errluki curukarait Merom-aam Kuiggaariin caniani.

⁸ATANREM cikirai Israel-aat cirlakillerkaatnek taukunek; Israelite-at-llu anguyagait maliggluki-llu negetmun tekilluku Misrephoth Maim-aq Sidon-aaq-llu, calaratmun-llu cali tekilluku Mizpah-m Kuignayua. Anguyallrat taqeksaituq nangengata tau͡gaam ingluteng.

⁹Joshua-m tuaten taukut pii ATANREM alerquuciatun: horse-ait iruirqelluki ekualuki-llu ekumassuutait.

¹⁰Joshua nutaan utertuq, teguaqluku-llu Hazor-aaq angayuqra-llu tuqulluku. Tamatum nalliini Hazor-aaq pininruqapiarallruuq tamakuni angayuqauvigni.

¹¹Tamalkuita tuanelnguut tuqutait; kina unguvavkarpek'naku, nunarpak-llu ekuavkarluku.

¹²Joshua-m tegularai tamalkuita nunarpiit angayuqrit-llu, tamalkuita-llu yuut tuqutaqluki, Moses-aam ATANREM pistiin alerquuciatun.

¹³Tau͡gaam Israelite-at ekuavkanritait nunarpiit qertulriamek nuniumalriit, Hazor-aaq tau͡gaam kiingan Joshua-m ekuavkallrua.

¹⁴Israel-aat tegularait nunarpagnek tamalkuita piksunarqellriit ungungssiutait-llu ellaita piknaluki. Tau͡gaam yuut tamalkuita tuqutellruit, kina unguvavkarpek'naku.

¹⁵ATANREM alerqullruluku Moses-aaq pisten̄i, Moses-aam-llu Joshua alerqurluku, Joshua-llu alerquumacimitun piluni. Caliaqellrui tamalkuita ATANREM alerqullruciatun Moses-aaq.

¹⁶Joshua-m tegua nuna tamalkuan — qemililria, ingrit-llu avataitnelnguq neglirnermi ungalalirnermi-llu, Goshen-aam-llu tamalkuan nunii ilakluku kinertellria nuna ungalalirnerani, tapeqluku-llu Jordan-aam Kuignayua.

¹⁷Nuna ayagnirluni Mount Halak-aamek ungalalirnermi yaaqsinrilkiini Edom-aam, negetmurrluni Baalgad-aq tekilluku kuignayuanelnguq Lebanon-aam ungalalirnerani Ingrim Mount Hermon-aam. Joshua anguyallruuq ak'anun inglukluki angayuqri nunam tamatum, tamalkuita-llu teguluki tuqurqelluki.

¹⁹Kiimi nunarpak, Gibeon-aaq, uitanqegcitmek taqutellruuq Israel-aam yui pillgutekluki. Tuani Hivite-at ilait uitallruut, allat tau͡gaam nunarpiit tamarmeng tegumallruluteng anguyagkun.

²⁰ATANREM ciumuarcetellrui callullerkaitnek Israelite-at, nangqapiggluki piunriumasqelluki tuqucimasqelluki-llu takumcukevkenaki. Man'a ATANREM picirkiutekelqaa Moses-aamun.

²¹Mat'um nalliini Joshua-m ayagluni piunrillrui yugpiit aterpagcimalriit Anakim-aanek, qemini nunalget Hebron-aami, Debir-aami, Anab-aami, qemililriami-llu nuniini Judah-m Israel-aam-llu. Joshua-m piunriqapigtellrui nunait-llu.

²²Anakim-aat watqapik iliit uitaqanrituq Israel-aat nuniitni; carraat tau͡gaam uitaqallruut Gaza-mi, Gath-ami, Ashdod-aami-llu.

²³Joshua-m tamalkuan nuna tegua, ATANREM Moses-aaq alerqullruciatun. Joshua-m-llu tunaa Israel-aanun, ellaitnun nakmiin piksagutelluku, avegturluku-llu ilakellriartainun. Tua-i yuut mernuinercirtut anguyallermeggnek.