Read Yupik Joshua 12 Bible Online

Joshua 12 - Yupik bible

Joshua 12

¹Israel-aam yuin cirlakumarillruat piksagucimariluku-llu nuna calaralirnerani Jordan-aam, ayagluku Arnon-aam Jordan-aam-llu kuignayuagnek neglirneq Ingriq Mount Hermon-aaq tekilluku. Cirlakiluteng malrugnek angayuqagnek.

²Atauciq Sihon-aaruuq, Amorite-at angayuqrat, atanirturten͞guluni Heshbon-aami. Angayuqauvian ilakluku avga Gilead-aam: Aroer-aamek (mengliinelngurmek Arnon-aam Kuignayuan) nunarpagmek-llu qukaanelngurmek tamatum kuignayuum, Jabbok-am Kuiga, engelii Ammon-aam tekilluku;

³tamatum-llu ilakluku Jordan-aam Kuignayua, nanvamek Galilee-amek ungalalirneranun Beth Jeshimoth-aam (calaralirnerani Dead Sea-m), ayagluni acianun Ingrim Pisgah-m.

⁴Cali cirlakellruat Og-aq, angayuqra Bashan-aam, nangneqluku Rephaim-aat; taum atanirtullruak Ashtaroth-aaq Edrei-aq-llu.

⁵Angayuqauvian ilakellrua Ingriq Mount Hermon-aaq, Salecah-llu, Bashan-aaq-llu tamalkuan, Geshur-aankuk Maacah-llu engelkek tekilluku, Gilead-aam-llu avga, tekilluku nunii angayuqam Sihon-aam Heshbon-aarmium.

⁶Ukuk malruk angayuqak Moses-aam Israel-aam-llu yuin cirlakellruagket. Moses-aam-llu, ATANREM pistiin, tunellrua nuniik Reuben-aam Gad-am-llu kinguvellgutkellriartakegnun, Manasseh-m-llu yuin avgitnun, pikesqelluku ellaitnun.

⁷Joshua-m Israel-aam-llu yuin cirlakait tamalkuita angayuqat nunami kanavalirnerani Jordan-aam, Baalgad-amek Lebanon-aam kuignayuani Ingrimun Mount Halak-aamun ungalalirnermi Edom-aam yaaqsinrilkiini. Joshua-m-llu avgaa man'a nuna kinguvellgutkelriartainun Israel-aam tunluku-llu ellaitnun pikura'asqelleku.

⁸Mat'um ilakaa qemililria nuna, kanavalirnermi-llu mengliit ingrit, Jordan-aam-llu Kuignayua ilakluki ingrit mengliit tamaani, calaralirnermi uverneret, ungalalirnermi-llu kinerneq nuna. Man'a nuna Hittite-at, Amorite-at, Canaanite-at, Perizzite-at, Hivite-at, Jebusite-at-llu nunakellruat.

⁹Israel-aam yuin cirlakellruit makut nunat angayuqrit: Jericho-m, Ai-am, (Bethel-aam yaaqsinrilkiini),

¹⁰Jerusalem-aam Hebron-aam-llu,

¹¹Jarmuth-aam Lachish-aam-llu,

¹²Eglon-aam Gezer-aam-llu,

¹³Debir-aam Geder-aam-llu,

¹⁴Hormah-m Arad-aam-llu,

¹⁵Libnah-m Adullum-aam-llu,

¹⁶Makkedah-m Bethel-aam-llu,

¹⁷Tappuah-m Hepher-aam-llu,

¹⁸Aphek-aam Lasharon-aam-llu,

¹⁹Madon-aam Hazor-am-llu,

²⁰Shimron Meron-aam Achshaph-aam-llu,

²¹Taanach-aam Magiddo-m-llu,

²²Kedesh-am Jokneam-llu (Carmel-aamelnguum),

²³Dor-am (cen̄amelnguum) Goiim-am-llu (Galilee-amelnguum),

²⁴Tirzah-m-llu. Angayuqat tapeqluteng amllertaluteng yuinaq qulmek cipluku atauciq-wa (31).