Read Yupik Joshua 13 Bible Online

Joshua 13 - Yupik bible

Joshua 13

¹Joshua maa-i cakneq ak'allaurtuq. ATANREM-llu qanrutaa, “Ak'allaurtuten, tau͡gaam cali nuna tegumaarkaq amllertuq:

²nuna tamarmi Philistia-mi Geshur-aami-llu.

³Cali nuna Avvim-aami ungalatmun. (Nuna kuiggarmek Shihor-amek, Egypt-aam engeliini, negetmun engeliinun Ekron-aam Canaan-aarmiunun pikniluku nallunairumallruuq; angayuqrit Philistine-at uitaluteng Gaza-mi, Ashdod-aami, Ashkelon-aami, Gath-ami, Ekron-aami-llu.)

⁴Nuna-wa cali Canaan-aarmiut nuniit, Mearah-llu (Sidon-aat pikellrat), tekilluku Aphek-aaq Amorite-at nuniita mengliinelnguq;

⁵nuniit-llu Gebalite-at; Lebanon-aaq-llu tamalkuan calaratmun, Baalgad-amek, ungalalirneranek Ingrim Mount Hermon-aam, Hamath-aaq tevyaraq tekilluku.

⁶Mat'um ilakaa Sidon-aarmiut nuniit qemini, Lebanon-aam Ingriin Misrephoth Maim-am-llu Ingriin akulegkeni. Makut yuut anevkarciqanka Israel-aat iluvainanratni. Avgarkaugan nuna Israel-aanun wii alerqullrucimtun.

⁷Watua kitaki avvgu man'a nuna imkunun qulngunrita'arnun kinguvellgutkellriarinun Manasseh-m-llu yuin avgitnun, ellaitnun nakmiin pikesqelluku.”

⁸Kinguvellgutkellriartain Reuben-aam Gad-am-llu imkut-llu Manasseh-m yuin avgita ak'a akurtullruluku nuna Moses-aam, ATANREM pistiin, cikiutekellra ellmeggnun; tamana calaralirnerani uitauq kuigan Jordan-aam.

⁹Nuniit ayaumauq tekilluku Aroer-aaq (kuignayuum Arnon Valley-m engeliini) nunarpak-llu qukaanelnguq kuignayuum tamatum, ilakluku-llu manigneq Medeba-mek Dibon-aamun.

¹⁰Ayagluni-llu tekilluku engelii Ammon-aam, ilakluki nunarpiit ataniullri Amorite-am angayuqam Sihon-aam Heshbon-aamek.

¹¹Ilakluki-llu Gilead-aaq, Geshur-aam Maacah-m-llu nuniik, tamalkuan-llu Ingriq Mount Hermon-aaq, cali-llu tamalkuan Bashan-aaq tekilluku Salecah.

¹²Ilakluku-llu angayuqauvia Og-am, nangenrat Rephaim-aat, angayuqaulleq Ashtaroth-aami Edrei-mi-llu. Moses-aam cirlakellruluki makut yuut qimagtelluki-llu.

¹³Tau͡gaam Israel-aat qimagcetellrunritait yuut Geshur-aamek Maacah-mek-llu; Israel-aani cali uitaut.

¹⁴Moses-aam nunamek cikillrunritai kinguvellgutkellriartai Levi-am. ATANREM qanrutellratun Moses-aaq, ellait akurturarkaullruut pikameggnek ilaitnek ekuagarkat, elliitekumalrianek ekuagarkauluki ATANERMUN Agayutiitnun Israel-aat.

¹⁵Moses-aam ak'a cikillrui nunam iliinek ilakuralriit kinguvellgutkellriartaini Reuben-aam, ellaitnun pikesqelluku.

¹⁶Nuniit ayagtuq tekilluku Aroer-aaq (Kuignayuum Arnon Valley-m engeliini) nunarpak-llu kuignayuum qukaanelnguq, ilakluku-llu tamalkuan manigneq avatiini Medeba-m.

¹⁷Ilakluku-llu Heshbon-aaq, nunarpiit-llu manignermelnguut; ukuuluteng: Dibon-aaq, Bamoth Baal-aq, Beth-aq, Baalmeon-aaq-llu,

¹⁸Joahaz-aaq, Kedemoth-aaq, Mephaath-aq,

¹⁹Kiriathaim-aq, Sibmah, Zereth Shahar-aq, ingrim qainganelnguq kuignayugmi,

²⁰Bethpeor-aq, uverneri Ingrim Pisgah-m, Beth Jeshimoth-aaq-llu.

²¹Mat'um ilakluki nunarpiit tamalkuita qaingani manignerem, angayuqauvia-llu tamalkuan Amorite-am angayuqam Sihon-aam, angayuqaullruluni Heshbon-aamek. Moses-aam cirlakellruluku atanirturilriit-llu ukut Midian-aami: Evi, Rekem-aaq, Zur-aq, Hur-aq, Reba-llu. Tamarmeng atanirtullruluku nunii angayuqam Sihon-aam.

²²Ilakellruat Israel-aat tuqutellrita ciunerkamek apertuituli Balaam-aaq qetunraa Beor-am.

²³Jordan-aaq kanavalirneruluni engelkellrua Reuben-aam kinguvellgutkellriartain nuniita. Makut nunarpiit nunacuaraat-llu cikiutekumallruut ilakuralrianun kinguvellgutkellriartainun Reuben-aam, ellaitnun pikesqelluki.

²⁴Moses-aam-llu cali nunam ilii ilakuralrianun kinguvellgutkellriartainun Gad-am tunellrua pikesqelluku.

²⁵Nuniita ilakaa Jazer-aaq tamalkuita-llu nunarpai Gilead-aam, avga-llu nuniin Ammon-aam tekilluku Aroer-aq, calaralirneranelnguq Rabbah-m;

²⁶nuniit ayagtuq Heshbon-aamek Ramath Mizpah-mun Betonim-un-llu, Mahanaim-amek engeliinun Lodebar-am.

²⁷Kuignayuum Jordan Valley-m ilakaa Beth Haram-aaq, Bethnimrah, Sukkoth, Zaphon-aaq-llu, ilakuara-llu angayuqauvian angayuqam Sihon-aam, Heshbon-aarmium. Kanavatmun Kuik Jordan-aaq engelkaat negetmun Nanvaq Galilee-aq tekilluku.

²⁸Makut nunarpiit nunat-llu cikiutekumallruut ilakuralrianun kinguvellgutkellriartainun Gad-am, ellaitnun pikesqelluki.

²⁹Moses-aam tunellruluku nunam ilii ilakuralrianun avgitnun kinguvellgutkellriartain Manasseh-m, ellaitnun pikesqelluku.

³⁰Nuniit ayagtuq Mahanaim-amun ilakluku tamalkuan Bashan-aaq tamalkuan angayuqauvia Og-am, angayuqan Bashan-aam, tamalkuita-llu yuinaat pingayun (60) nunarraat Jair-amelnguut Bashan-aami.

³¹Ilakluku-llu avga Gilead-aam, cali ilaklukek Ashtaroth-aaq Edrei-llu, angenrulriik nunautek Og-am angayuqauviani Bashan-aami. Man'a tamarmi cikiutekumallruuq avgitnun ilakuralriit kinguvrin Machir-aam, qetunraan Manasseh-m.

³²Waten ayuqluku Moses-aam avverqellrua nuna calaralirnera Jericho-m Jordan-aam-llu, yuilqurtaani Moab-am uitallermini.

³³Moses-aam tau͡gaam nunam ilii allakallrunritaa Levi-am kinguvellgutkellriartainun. Elliin qanrutellrui ellaitnun pikciqniluki elliitet ilait elliitekumalriit ATANERMUN Agayutiitnun Israel-aat.