Read Yupik Joshua 14 Bible Online

Joshua 14 - Yupik bible

Joshua 14

¹Makut maa-i paiciutet Israel-aam yuin akurtullrit Canaan-aami, agayulirtem Eleazar-aam Joshua-m-llu, qetunraan Nun-am, cali-llu ciulirnerita ilakuralriit Israel-aam kinguvellgutkellriartain avellrit yugnun.

²ATANREM alerqullruciatun Moses-aaq, nunakait qulngunritaraat avegmek cipluteng kinguvellgutkellriit kanavalirnerani Jordan-aam elkarcimaarkauluteng nall'arcetaariluteng.

³Ak'a Moses-aam allakallruluku nuna calaralirnerani Jordan-aam allagnun malrugnun avegmek cipluku kinguvellgutkellrianun. (Kinguvri Joseph-aam avgumaut malruinguluteng kinguvellgutkellriit: Manasseh Ephraim-aaq-llu.) Tau͡gaam Moses-aam Levite-at cikillrunritai nunam iliinek. Cikirluki tau͡gaam nunarpagnek uitavigkaitnek maranek-llu kuluvaita qusngiita-llu pivigkaitnek.

⁵Israel-aam yuin nuna avverqaat ATANREM alerquuciatun Moses-aaq.

⁶Erenret iliitni yuut Judah-m yuinek ullagaat Joshua Gilgal-aami. Iliit, Caleb-aaq qetunraa Jephunneh-m Kenizzite-aulriim, qanertuq Joshua-mun, “Nallunritan camek ATANREM qanellra Moses-aamun, Agayutem yuanun, Kadesh Barnea-mi elpet wiinga-llu piteklunuk.

⁷Allrakungqellruunga yuinaagnek malrugnek (40) ATANREM pistiin Moses-aam ayagcetellranga Kadesh Barnea-mek aassaqlua paqtaaresqelluku nuna man'a. Ayuqciatun-llu qanemcikellruaqa utercama elliinun.

⁸Maligcestellma tau͡gaam yup'ut alingevkallruit. Tau͡gaam wiinga tamarmirrlua niisngallruaqa ATANEQ Agayutka.

⁹Tua-i tuaten pillruama Moses-aam akqellruanga wangnun irniamnun-llu ilumun akurturarkauniluku piksagulluku nuna piyuavikelqa.

¹⁰Tau͡gaam, wani-wa tangrru. Yuinaak malruk tallimanek cipnenguk (45) allrakut ATANEQ Moses-aamun qanrraanranek tamatumek. Tamatum nalliini Israel-aat eglertellrulriit yuilqukun mertailngurkun, ATANREM-llu akqellrucimitun unguvaurtellua man'a tekilluku. Atam tangerqernga! Allrakungelrianga yuinarnek cetamanek tallimanek cipluku (85),

¹¹cali tau͡gaam pinirtalua unuamek tamaani pitacillemtun Moses-aam ayagcetellrani. Piniqa cakaniqsaituq anguyautellerkamun wall'u allamun piarkamun.

¹²Kitaki watua cikirnga qemililriamek nunamek ATANREM akqutkellranek imumi ernermi malillrenka angutet qanemciklemten̄i. Qanrutellruamteggen tuani yugpiit atellget Anakim-aanek tuantellruniluki qertulrianek qacarnelegni nunanarpagni. ATANREM nayurciqngataanga, anciiqellianka-llu tuaken, ATANREM qanellratun.”

¹³Joshua-m atawaqercetaa Caleb-aaq, qetunraa Jephunneh-m, cikirluku-llu nunarpagmek Hebron-aamek pikaanek.

¹⁴Hebron-aaq cali kinguvrin Caleb-aam, qetunraan Jephunneh-m Kenizzite-aulriim pikaat, tua-i-wa caqtaarpek'nani niisngallruaku ATANEQ Agayutiit Israel-aat.

¹⁵Mat'um ciungani Hebron-aaq aterpagtelallruat Arba-m nunarpiinek. (Arba ciuqliuluni angelriarullruuq Anakim-aani.) Watua nepairutuq tamana nuna.