Read Yupik Joshua 15 Bible Online

Joshua 15 - Yupik bible

Joshua 15

¹Ilakuralriartai yuullgutkellriartain Judah-m akurtullruut iliinek nunam, ayuqucilegmek waten: Nuna ayagluni ungalatmun ungalaqlikacagiin cingia yuilqum Zin-am tekilluku, engeliini Edom-aam.

²Man'a ungalalirneq engela ayagtuq ungalaqlirmek iquanek imarpiim Dead Sea-m,

³ayagluni-llu ungalatmun tevyaramek Akrabbim Pass-amek tekilluku Zin-aq. Ayagluni ungalalirnerakun Kadesh Barnea-m, kiturluku Hezron-aaq qulmurrluni Addar-amun, caqirrluni-llu tungiinun Karka-m.

⁴Ayagtu'rluni tekilluku Azmon-aq, kuiggaar-llu maliggluku Egypt-aam engeliini imarpigmun Mediterranean Sea-mun, engela tua-i tuavet iquklilluni. Tamaa-i Judah-m ungalalirneq engelii.

⁵Calaratmun engelekluku imarpik Dead Sea-q, painga Jordan-aam tekilluku. Engela-llu neglirnermi ayagluni kangiqurranek imarpiim paingani Jordan-aam,

⁶ayagluni Beth Hoglah-m tungiinun, negetmurrluni-llu neglirneranun quaguum caumaluku Kuignayua Jordan-aam. Mayurluni-llu Teggalqurtaanun Bohan-am. (Bohan-aaq qetunraqellrua Reuben-aam),

⁷tuaken-llu kuignayugmek Trouble Valley-mek ayagluni Debir-aamun, caqirrluni-llu Gilgal-aam tungiinun; taum-llu caumaluku tevyaraq Adummim Pass-aq ungalalirnerani kuignayuum. Ayagluni-llu cali ulvelriarinun Enshemesh-aam, anluni-llu Enrogel-aamun,

⁸kiatmun-llu kuignayuk Hinnom Valley tumekluku ungalalirnerani qemim Jebusite-at nunarpiit Jerusalem-aaq uitaluni. Engela cali egmirluni qemim kangranun kanavalirnerani kuignayuum Hinnom Valley-m, negetmun iqugyartuani kuignayuum Rephraim Valley-m.

⁹Tuaken-llu ayagluni ulvelriarinun Nephtoah-m avatmurrluni-llu nunarpagnun canimelkainun Ingrim Ephron-aam. Tuaken caqirtuq tungiinun Baalah-m (wall'u Kiriath Jearim-aam),

¹⁰tuani uivluni kanavalirnerakun Baalah-m tungiinun qemililriim Edom-aam, ayagluni-llu neglirnerakun Ingrim Jearim-aam (wall'u Chesalon-aam), ketetmun Beth Shemesh-aamun, kiturluku-llu Timnah.

¹¹Tua-llu engela avatmurtuq pengumun Ekron-aam neglirnerani, caqirrluni tungiinun Shikkeron-aam, kiturluku Ingriq Baalah, tekilluku-llu Jamnia. Iquklilluni imarpigmi Mediterranean Sea-mi.

¹²Tamana kanavalirneruuq engela. Makut engelet iluatni uitaut yuut ilakuralriartai Judah-m.

¹³ATANREM alerquuciatun Joshua, Judah-m nuniin ilii tunumallruuq Caleb-aamun qetunraanun Jephunneh-m, yuullgutekellriarinek Judah-m. Akurtullrua Hebron-aaq, nunarpak pikestengqerrluni Arba-mek, atiinek Anak-aam.

¹⁴Caleb-aam qimagcetellrui kinguvri Anak-aam nunarpagmek, tungayakellriartai Sheshai-am, Ahiman-aam Talmai-am-llu.

¹⁵Tuaken-llu ayagluni anguyagyarturai yuut uitalriit Debir-aami. (Una nunarpak aprumalallruuq Kiriath Sepher-aamek.)

¹⁶Caleb-aaq qanertuq, “Panika Achsah uingevkarciqaqa teguaqestiinek Kiriath Sepher-aam.”

¹⁷Othniel-aam, qetunraan Caleb-aam anelgutiin Kanez-aam, teguaqaa nunarpak, Caleb-aam-llu paniminek cikirluku Achsah-mek nulirkaanek.

¹⁸Ernermi kassuutellermegni Othniel-aam ellimerturaa tauna kaigavikesqelluku nunamek. Ciulvagmek-llu ayagassuutminek yuungan Caleb-aam aptaa camek piyuucianek.

¹⁹Tauna kiuguq, “Wii piyugtua elakanek. Nuna cikiutekellren wangnun kinerneruuq.” Tua-i Caleb-aam cikiraa qulvanelngurnek aciqvanelngurnek-llu ulevlanek.

²⁰Man'a nuna ilakuralriit yuullgutkellriartain Judah-m akurtulqaat ellaita pikarkauluku.

²¹Nunarpiit ungalaqsinrit ellaita pikekait, tamaanelnguut mallgeskiini engeliin Edom-aam, ukuugut: Kabzeel-aq, Eder-aaq, Jagur-aaq,

²²Kinah, Dimonah, Adadah,

²³Kadesh-aaq, Hazor-aaq, Ithnan-aaq,

²⁴Ziph-aaq, Telem-aaq, Bealoth-aaq,

²⁵Hazor Hadattah, Kerioth Hezron-aaq (wall'u Hazor-aaq),

²⁶Amam-aq, Shema, Moladah,

²⁷Hazar Gaddah, Heshbon-aaq, Bethpelet-aq,

²⁸Hazar Shual-aq, Beersheba, Biziothiah,

²⁹Baalah, Iim-aq, Ezem-aq,

³⁰Eltolad-aq, Chesil-aq, Hormah,

³¹Ziklag-aq, Madmannah, Sansannah,

³²Lebaoth-aaq, Shilhim-aq, Ain-aq, Rimmon-aaq-llu: yuinaq qulngunrita'armek cipluku (29) nunarpiit amllertaluteng, tapeqluki nunarraat avataitni uitalriit.

³³Nunarpiit ingrit acilqurritni uitalriit makuugut: Eshtaol-aq, Zorah, Ashnah,

³⁴Zanoah, Engannim-aaq, Tappuah, Enam-aq,

³⁵Jarmuth-aq, Adullam-aaq, Socoh, Azekah,

³⁶Shaaraim-aq, Adithaim-aq, Gederah, Gederothaim-aq-llu: Akimiarunritarauluteng (14) nunarpiit tapeqluteng, nunarraat-llu avataitni ilakluki.

³⁷Cali nunat makut ilakluki: Zenan-aaq, Hadashah, Migdalgad-aq,

³⁸Dilean-aaq, Mizpah, Joktheel-aaq,

³⁹Lachish-aaq, Bozkath-aq, Eglon-aaq,

⁴⁰Cabbon-aaq, Lahmam-aq, Chitlish-aaq,

⁴¹Gederoth-aaq, Bethdagon-aaq, Naamah, Makkedah-llu: Akimiaq ataucimek cipluku (16) amllertaluteng nunarpiit, ilakluki nunarraat avataitni.

⁴²Cali-llu pitarluni Libnah-mek, Ether-aamek, Ashan-aamek

⁴³Iphtah-mek, Ashnah-mek, Nezib-amek,

⁴⁴Keilah-mek, Achzib-amek, Mareshah-llu: Qulngunritarauluteng nunarpiit ilakluki nunarraat avataitni.

⁴⁵Tuani-wa cali Ekron-aaq, cali avaqlirluni nunanek nunacuarnek-llu.

⁴⁶Nunarpiit-wa cali canimelkiini Ashdod-aam, Ekron-aamek ayagluteng imarpik Mediterranean Sea-aq tekilluku.

⁴⁷Ashdod-aankuk-wa Gaza-llu nunautekek nunarrautekek-llu ilakluki, tekisngaluku kuiggaar Egypt-aam engeliini Mediterranean-aam-llu cen̄ii ilakluku.

⁴⁸Qemilegmi nunami pitangqertuq Shamir-aamek, Jattir-aamek, Socoh-mek,

⁴⁹Dannah-mek, Kiriath Sepher-aamek (wall'u Debir-aamek),

⁵⁰Anab-amek, Eshtemoa-mek, Anim-aamek,

⁵¹Goshen-aamek, Holon-aamek, Giloh-aq-llu: Qula ataucimek cipluku (11) nunarpiit, cali ilakluki nunarraat avataitni.

⁵²Cali pitangqerrluni Arab-amek, Dumah-mek, Eshan-aamek,

⁵³Janim-aamek, Beth-tappuah-mek, Aphekah-mek,

⁵⁴Humtah-mek, Kiriatharba-mek (cali Hebron-aaruluni), Zior-aq-wa: Qulngunritarauluteng nunarpiit nunacuarameggnek avaqlirluteng.

⁵⁵Cali-wa Maon-aaq, Carmel-aaq, Ziph-aaq, Juttah,

⁵⁶Jezreel-aq, Jokdeam-aaq, Zanoah,

⁵⁷Kain-aq, Gibeah, Timnah-wa: Qulen nunarpiit nunarrarnek avaqlirluteng.

⁵⁸Cali-wa Halhul-aaq, Bethzur-aq, Gedor-aq,

⁵⁹Maarath-aaq, Bethanoth-aaq, Eltekon-aq-llu: Arvinelgen nunarpiit, nunat avatmini ilakluki.

⁶⁰Pitarluni-llu Kiriath Baal-amek (wall'u Kiriath Jearim-aamek), aipaa-wa Rabbah: nunarpiik malruk, avatmegni ilakluki nunarraat.

⁶¹Yuilqumi-llu kinertellriami ukuugut nunarpiit: Beth Arabah, Middin-aaq, Secacah,

⁶²Nibshan-aaq, Salt City-q, Engedi-wa: Arvinelgen nunarpiit nunarraat avatmeggni ilakluki.

⁶³Tau͡gaam Judah-m yuin anevkarciigatait Jebusite-at, Jerusalem-aami uitalriit. Jebusite-at cali uitaut tuani, ilakluki Judah-m yui.