Read Yupik Joshua 16 Bible Online

Joshua 16 - Yupik bible

Joshua 16

¹Ungalalirnermi engelii nunam allakaumalriim kinguvrinun Joseph-aam ayagnirtuq Jordan-aamek canianek Jericho-m, waken calaralirneratnek ulvelriarin Jericho-m, ayagluni-llu yuilqumun kinertellriamun. Jericho-mek-llu mayurluni qemililriamun tekilluku Bethel-aaq.

²Bethel-aamek-llu ayagtuq Luz-amun, kiturluku-llu yaavet Ataroth Addar-amun, tekilluku Archite-at uitaviat.

³Tuaken-llu kanavatmurrluni nuniitnun Japhletite-at, tekilluku nunii Lower Beth Horon-aam. Tuaken ayagtuq Gezer-aamun iquklilluni-llu Mediterranean Sea-mun imarpigmun.

⁴Joseph-aam kinguvrin, yuullgutkellriartain Ephraim-aam West Manasseh-m-llu, akurtullruat man'a nuna ellaita piksagulluku.

⁵Man'a nunakaat Ephraimite-at ilakuralriartaita: nuniita engelii ayagtuq Ataroth Addar-amek calaratmun Upper Beth Horon-aamun,

⁶tuaken-llu imarpigmun Mediterranean Sea-mun. Michmethath-aaq neglirneranetuq taum. Calaralirneranek-llu taum engela caqirrluni tungiinun Taanath Shiloh-am kiturluku-llu calaratmurrluni Janoah-mun.

⁷Atrarluni-llu Janoah-mek Ataroth-amun Naarah-mun-llu, tekilluku Jericho iquklilluni-llu Jordan-aamun.

⁸Engela-llu kanavatmun ayagtuq Tappuah-mek kuicuar Kanah tekilluku iquklilluni-llu imarpigmun Mediterranean Sea-amun. Man'a nuna cikiutekumallruuq ilakuralrianun, yuullgutkellriartainun Ephraim-aam, ellaitnun pikesqelluku,

⁹tapeqluki nunat nunarraat-llu engelain iluanelnguut Manasseh-m, tau͡gaam Ephramite-anun cikiutekellruluku.

¹⁰Tau͡gaam anevkallrunritait Canaanite-at Gezer-aami uitalriit, tua-i Canaan-aarmiut uitalartut ilakluki Ephraimite-at una erneq tekilluku, teguatun tau͡gaam calivkaumallruluteng.