Read Yupik Joshua 17 Bible Online

Joshua 17 - Yupik bible

Joshua 17

¹Nunam ilii kanavalirnerani Jordan-aam pikaqevkaumallruuq ilaitnun ilakuralriit kinguvallret Joseph-aam qetunraanek amaqlikacaarmek Manasseh-mek. Machir-aaq, atii Gilead-aam, Manasseh-m qetunrain amaqliqaat, tauna anguyagni qigcikumauq, taumek Gilead-aaq Bashan-aaq-llu, calaralirnera Jordan-aam, elliinun pikiutngullrulria.

²Nuna kanavalirnerani Jordan-aam pikaqevkaumauq allanun ilakuralriartainun Manasseh-m: ukut angutet — Abiezer, Helek, Asriel, Shechem, Hepher, Shemida-llu. Ukut angutnguut kinguvri Manasseh-m, qetunraan Joseph-aam, ilakuralriit atakluki.

³Zelophehad-aq, qetunraa Hepher-aam, qetunraa Gilead-aam, qetunraa Machir-aam, qetunraa Manasseh-m, qetunraitellruuq. Paningqerrluni tau͡gaam, atrit-wa Mahlah, Noah, Hoglah, Milcah, Tirzah-wa.

⁴Ullagaat Eleazar-aaq agayulirta Joshua-llu, qetunraa Nun-am, ciuliqagtet-llu, qanerluteng, “ATANREM alerqullrua Moses-aaq ayuqluki angutet tungelquput nunam iliinek pikamten̄ek cikiisqelluta.” Tua-i ATANREM alerquuciatun cikiumaut nunamek pillgucirluki angutet tungelquteng.

⁵Man'a pitekluku Manasseh-q akurtullruuq qulnek cuqnernek ilaklukek Gilead-aaq Bashan-aaq-llu calaralirnerani Jordan-aam,

⁶arnat kinguvri ayuqluki angutet-llu kinguvri nunamek pikangata. Nunii Gilead-aam pikevkaumaluni allanun kinguvrinun Manasseh-m.

⁷Nunautii Manasseh-m ayagtuq waken Asher-aamek Michmethath-aamun, calaralirnerani Shechem-aam. Engelii-llu ayagluni ungalatmun ilakluki yui Entappuah-m.

⁸Nuna avatiini Tappuah-m pikluku Manasseh-m, tau͡gaam nunarraq Tappuah-q, engelmi uitalria, Ephraim-aam kinguvrin pikluku.

⁹Engela tuaken ayagtuq kuiggaarmun Kanah-mun. Nunarpiit ungalalirnerani kuiggaaraam Ephraim-aam pikluki, Manasseh-m nunautiini uitangraata. Manasseh-m nuniin engelii ayagtuq neglirneran kuiggaam mengliikun, iquklilluni-llu imarpigmun Mediterranean Sea-mun.

¹⁰Ephraim-aaq ungalalirnermetuq, Manasseh-llu neglirnermenani, imarpik Mediterranean Sea-aq kanavalirnermegni engelekluku. Asher-aaq keggaknelirne'rmenani Issachar-aq-llu kiugkenlirne'rmenani.

¹¹Issachar-am Asher-aam-llu nuniignek iluani Manasseh pingqertuq Beth Shan-amek Ibleam-aamek-llu, tapeqluki nunarraat avatekegni, cali ilakluku Dor-aq (cen̄amelnguq), ukut-llu Endor, Taanach, Megiddo, avaqliit-llu nunat.

¹²Manasseh-m tau͡gaam yuin, anevkarciigatellruit yuut tamakunek nunarpagnek, tua-i Canaanite-at tamaantaurallruut.

¹³Piniring'e'rmeng Israel-aat nangluki anevkallrunritait Canaanite-at, tau͡gaam ellimerturluki calivkallruit ellmeggnun.

¹⁴Joseph-aam kinguvri qanertut Joshua-mun, “Ciin ataucimek nunam iliinek cikircikut pikamten̄ek? Wangkuta yugyagtukut ATANREM atawaqercecakut.”

¹⁵Joshua-llu kiuguq, “Amllessiyaakuvci, qemililria-llu Ephraim-aam nunii mikelkelluku, ayagci napalilrianun carrirluku-llu pikarci tamaani nuniitni Perizzite-at Rephaim-aat-llu.”

¹⁶Taukut kiugaat, “Qemililria nuna ikgetuq wangkutnun, tau͡gken Canaanite-at carr'ilqami cavignek ayagassuuterluteng, Beth Shan-ami uitalriit avatiini-llu nunani cali-llu kuignayugmi Jezreel Valley-mi uitalriit.”

¹⁷Joshua-m qanrutai yuullgutkellriartai Ephraim-aam West Manasseh-m-llu, “Ilumun-wa amllellriaci pinirluci-llu. Cuqa atauciq cipluku nunautengciquci.

¹⁸Qemililria nuna pikciqerci. Napalilriarungraan carrirciqerci pikluku-llu avatmun iquanek ayagluku yaaqvanun engelii tekilluku. Canaanite-at-llu anevkarciqaci tegglinek ayagassuutengqengraata pinilriarungraata-llu.”