Read Yupik Joshua 18 Bible Online

Joshua 18 - Yupik bible

Joshua 18

¹Tamana nuna tegurraarluku tamaq'apiarmeng Israel-aat quyurtut Shiloh-mi naparrluku-llu ATANREM Pelatekaa.

²Malrunelgen cali yuullgutkellriartai Israel-aam allakaricimaksaunateng pikaatnek nunamek.

³Tua-i Joshua-m qanrutai Israel-aam yui, “Qaillun pitalriamek utaqaqatarceci iterpailegpeciu tegunaluku nuna ATANREM Agayutiita ciuliarpeci cikiutekellra elpecen̄un?

⁴Ataki angutnek pingayunek piqercia, atauciuqaqluki yuullgutkellrianek. Ayagceciiqanka tamiinun nunamun, ayaganiartut tamaani paqtaarluku nuna piksullerteng. Ataam-llu wangnun uterrluteng.

⁵Nuna avgumaarkauguq ellaitnun malrunelguluni; Judah nunamini uitaciquq ungalalirnermi, Joseph-aaq-llu nunamini neglirnermi.

⁶Igauskiciki qaillun ayuquciat taukut malrunelgen avgumallrat, igautelci-llu wangnun tailluki. Nutaan wii nall'arcetaariciiqamci wani ATANREM Agayutemta ciuqerrani.

⁷Levite-at tau͡gaam nunamek akurturngaitut elpeci ilagarluci, tua-i-wa ellaita pikngatgu kevgiullerkarteng agayulirten͞guluteng ATANERMUN. Ukut-llu yuullgutkellriartait Gad-am, Reuben-aam, East Manasseh-m-llu ak'a nunauteteng akurtullruat calaralirnerani Jordan-aam, Moses-aam, ATANREM pistiin ellaitnun cikiutekellra.”

⁸Taukut angutet ayagtut paqluku nuna alerqurraartelluteng Joshua-mun waten: “Tamalkuan nuna paqeskiciu ayuqucia-llu igaulluku, ataam-llu wangnun uterrluci. Nutaan Shiloh-mi ATANREM ciuqerrani nall'arcetaariciiqamci.”

⁹Tua-i angutet ayagaut nunami tamalkuan igaulluku-llu qaillun avgillerteng tamatumek nunamek malrunelguluku, atrit-llu nunat tamaanelnguut elliluki. Ataam-llu uterrluteng ullagluku Joshua uitavimeggni Shiloh-mi.

¹⁰Joshua-m-llu nall'arcetaaritai Shiloh-mi ATANREM ciuqerrani; tuani-llu elliin allakaritai nunakaitnek Israel-aam yui, yuulgutkellriartaqelriit pingqerturcelluki.

¹¹Nuna ilakuralriartain yuullgutkellriartain Benjamin-aam allakaraat ciumek. Nuniit uitauq akuliigni yuullgutkellriartakenka Judah-nkuk Joseph-aaq-llu.

¹²Neglirnermi nuniita engelii ayagnirtuq Jordan-aamek ayagluni-llu mayurluni uvernerkun neglirnerakun Jericho-m, kanavatmurrluni-llu qemililriakun Bethaven-aam yuilqurra kinertellria tekilluku.

¹³Engela-llu ayagluni uvernerkun ungalalirnerakun Luz-am (una cali aterpagcimaluni Bethel-aamek), atrarluni-llu Ataroth Addar-amun, ingrim qainganun ungalalirnerani Lower Beth Horon-aam.

¹⁴Engela cali allakun ayagtuq caqirrluni ungalatmun kanavalirneranek uum ingrim, ayagluni-llu Kiriath Baal-amun (wall'u Kiriath Jearim), yuullgutkellriartain Judah-m piatnun. Man'a kanavalirnermi engelnguuq.

¹⁵Ungalalirneq engela ayagnirtuq mengliinek Kiriath Jearim-aam ayagluni-llu ulvelriartainun Springs of Nephtoah-m.

¹⁶Ayagtuq tua-llu atrarluni ingrim acianun, tuaken kiarrnaqluni kuignayuk Hinnon Valley, neglirnermi kuignayuum Rephaim Valley-m iquani. Tuaken ayagtuq ungalatmun kuignayuk Hinnon Valley tumekluku, Jebusite-at quaguatgun, tungiinun Enrogel-aam.

¹⁷Caqirtuq-llu negetmun Enshemesh-amun ayagluni-llu Geliloth-amun akmatiinun tevyaram Adummim Pass-am. Engela-llu ayagluni teggalqumun Stone of Bohan (Bohan-aq qetunraqaa Reuben-aam)

¹⁸kiturluni-llu neglirnerakun quaguum, tuaken acitmun kiarrnaqluni kuignayuk Jordan Valley. Atrarluni-llu kuignayugmun,

¹⁹kiturtuq neglirnerakun quaguan Beth Hoglah-m, iquklilluni-llu neglirnermi kangiqutaani imarpiim Dead Sea-m, Jordan-aam anumavian. Man'a ungalalirnermi engelnguuq.

²⁰Jordan-aaq calaralirneruluni engelnguuq. Makut engelkai nunam ilakuralriit yuullgutkellriartain Benjamin-aam akurtullrata piksagulluku.

²¹Nunarpiit ilakuralriit yuullgutkellriartain Benjamin-aam piit makuugut: Jericho, Beth Hoglah, Emek Keziz,

²²Beth Arabah, Zemaraim, Bethel,

²³Avvim, Parah, Ophrah.

²⁴Chepharammoni, Ophni, Geba-llu: qula malrugnek cipluku (12), nunarpiit ilakluki nunat avataitni.

²⁵Cali-llu pitarluni Gibeon, Ramah, Beeroth,

²⁶Mizpah, Chephirah, Mozah,

²⁷Rekem, Irpeel, Taralah,

²⁸Zela, Haeleph, Jebus (wall'u Jerusalem), Gibeah, Kiriath Jearim-aaq-llu: akimiarunritaraan (14) nunarpiit, nunat-llu tapeqluki avataitni. Man'a nuna Benjamin-aam yuullgutkellriartaini ilakuralriit akurtullruat paiciutekluku.