Read Yupik Joshua 2 Bible Online

Joshua 2 - Yupik bible

Joshua 2

¹Tua-llu arulaingqavimeggnek Acacia-mek Joshua ayagceciuq malrugnek nallunarcarlutek taringengnaqerkagnek, alerqurlukek aassaqlukek yuvriisqelluku nunii Canaan-aam, arcaqerluku nunarpak Jericho. Tuavet-llu nunarpagmun tekicamek qavartartuk akissum eniini, aterluni Rahab-amek.

²Jericho-m-llu angayuqra niituq Israel-aat ilait unugmi tekitellruniluki nallunarcarluteng nallunringnaqellrianek nunamek,

³taumek qanermek ayagceciuq Rahab-amun: “Angutek enevni aassaqlutek tamalkuan nuna nallunringnaqsarturaak! Anevkarkek!”

⁴Arnaq-llu kiuguq, “Angutek itellruuk enemnun, tau͡gaam nalluaqa naken taillruciak. Ayallruuk akertem tevillrani iteryaraq umegpailgan. Aptellrunritagka natmun ayakatallragnek, tau͡gaam cukamek ayakuvci anguciqagci.” (Rahab-am enem qainganun iircetellrulukek naumalrianek quyurtellminek patulukek.)

⁷Jericho-m-llu angayuqran yui angutet an'ut tuaken nunarpagmek, iteryaraa-llu nunarpiim palulluku. Ayagluteng-llu yuarluki Israelite-at paqtaallret aassaqluteng tekilluku qeraryaraq Jordan-aami.

⁸Taukuk aassaqlutek paqtaartek inarpailgagnek Rahab-aq mayurtuq enem qainganun,

⁹qanrullukek-llu, “Nallunritaqa ATANERMUN nunamek mat'umek cikillrucirci. Tamarmeng yuut maani alingniurutkaiceci.

¹⁰Niitellruarput-llu qaillun ATANERMUN imarpik Red Sea-q kinercetellrucia ciunerpecen̄i Egypt-aaq unitellerpecen̄i. Cali niitellruarput qaillun tuqutellruciak Sihon-aq Og-aq-llu, Amorite-at atanregket calaralirnerani Jordan-aam.

¹¹Niiyucimcetun alingellruukut; pinirput tamamta qamluni, elpeci tuatnavkarluta. ATANEQ Agayutsi Agayutnguuq qilagmi nunami-llu.

¹²Watua akqitek ATANREM atrakun ilarraanka qaillun pingaitniluki, qaillun wii elpetek pillrunrilucimtun. Nallunairitek-llu camek ukveqniarqa akqutsek.

¹³Akqia-llu aviuciiqniiluki aataka, aanaka, anelgutenka-llu angutet, arnat-llu, ilait-llu tamalkuita! Tuqutevkaryaqunata!”

¹⁴Angutek qanrutaak, “Agayutem unguvapuk tegukilikek qanllerpuk atunrilkumegnegu! Kitumun qanenrilkuvet qaillun pillmegnek, akqamegten ATANREM nunamek mat'umek cikiqakut assirluci ilaliularciqamceci.”

¹⁵Rahab-aq uitauq enemi nunarpiim avatairutiin qacarnerani uitalriami, tua-i angutek egalekun atrartak ilavkugkun.

¹⁶Qanrutak-llu, “Qemililriamun nunamun ayakitek angayuqam yuin nataqsuaraicetek. Iirniartutek ernerni pingayuni uterrnatkaatnun. Nutaan-llu ayaglutek.”

¹⁷Angutek qanrutaak, “Umyuaqeciqerpuk akqevkallren.

¹⁸Waten piniartuten. Qaku maavet nunamun itqumta una kavirliq pelacinak qillruskiu egalermun atrarviklerpenun. Quyurcetniaten aatan aanan-llu, anelguteten-llu, tamalkuita-llu atavet ilai enevnun.

¹⁹Kina ankuni enemek, tuqullra elliinun tusngaciquq, wangkuk-llu pinarqutengqerrngaitukuk; tau͡gaam enem iluani akngireskan nutaan pinarqeciqukuk.

²⁰Kitumun tau͡gaam qanellrukuvet canek pillmegnek, akqutkevkallren elpenun aturnaqngaitarpuk.”

²¹Tua-i umyuallguciamikek ayagcetak. Ayaumariagnek-llu kavirliq pelacinak qillrutaa egalermun.

²²Nallunringnaqellrek-llu taukuk qemililriamun ayaglutek iirtuk. Pistain-llu angayuqam yuarayaaqagkek tamiini nunami ernerni pingayuni, tau͡gaam nataqevkenakek. Tua-i Jericho-mun utertut.

²³Tua-i-llu taukuk nallunringnaqellrek atrartuk qeminek, qerarluku-llu kuik uterrlutek Joshua-mun. Qanrulluku-llu canek tamalkuitnek pillernek.

²⁴Qanerlutek-llu, “Wangkuk nallunrirarpuk ilumun ATANREM cikiutekucia nuna tamalkuan wangkutnun. Tamarmeng yuut tamaani alikaitkut wangkuta.”