Read Yupik Joshua 20 Bible Online

Joshua 20 - Yupik bible

Joshua 20

¹Tua-llu ATANREM qanrutaa Joshua

²qanrucesqelluki Israel-aam yui, “Cucuklirci nunarpagnek qimagviugarkanek Moses-aamun qanrutkevkallemnek.

³Ilasi tuqucikuni yugmek pitsaqevkenani, tuavet qimagyugngauq qimagluku akinauringnaqellria.

⁴Yuk qimagyugngaluni makut nunarpiit iliitnun, qanercetaarviim-llu iteryaraanun piluni nalqigulluki ciuliqagtet qaillun pillerminek. Nutaan taukut iterceciiqaat uitavigkaanek-llu piluku tuancesqelluku.

⁵Akinaungnaqellriim-llu maligeskaku tuavet, nunarpiim yuin tun'arkaunritaat taumun. Cavkanritarkaugaat, tua-i-wa pitsaqevkenaku yuk tuqutellruaku, qenerrluni pivkenaku.

⁶Nunarpagni uitaarkauguq yugnun niitelluni qanercetaarumanatkaminun tuqunatkaanun-llu angutem taum nalliini Agayulirten͞gunrulriim. Nutaan tauna angun utercugngariciquq kingunerminun, unitellerminun qimallermini.”

⁷Tua-i kanavalirnerani Jordan-aam allakariut Kedesh-amek Galilee-amelngurmek, qemililriamelngurmek Naphtali-mi; Shechem-aamek-llu qemililriamelngurmek Ephraim-aami; Hebron-aamek-llu qemilegtaani Judah-m.

⁸Calaralirnerani Jordan-aam, kinertellriami manignermi calaralirnerani Jericho-m, cucuklirtut Bezer-aamek nuniini Reuben-aam; Ramoth-aamek-llu Gilead-aami, nuniini Gad-am; Golan-aamek-llu Bashan-aami, nuniini Manasseh-m.

⁹Makut nunarpiit cucukumaut tamarmeng uqisvigkauluteng Israel-aam yuinun wall'u allanernun nunalguciusngalrianun tamaani. Kina yugmek tuqucikuni pitsaqevkenani tamakunun qimagyugngaluni, qimagluku akinaurluni tuqucingnaqellria; tuqucimasciiganani yugnun niitelluni apqaurumavailegmi.