Read Yupik Joshua 22 Bible Online

Joshua 22 - Yupik bible

Joshua 22

¹Tua-llu Joshua-m quyurcetai yuullgutkellriartai Reuben-aam, Gad-am, East Manasseh-m-llu.

²Qanrutai, “Cat tamalkuita Moses-aam ATANREM pistiin elpecen̄un pisqellri pillruaci, niilluki-llu tamalkuita alerquutekellrenka elpecen̄un.

³Man'a-llu tekilluku ataucirquungraan cakaariqaqsaituci Israel-aarullgutevcen̄ek. Mulngaku'urluci-llu atungnaqu'urluki pisqutai ATANREM Agayutevci.

⁴Watua akqellrucimitun ATANREM Agayutevci cikillrui Israel-aarullguceci uitanqegcitmek. Taumek uterci nunamun pikliutellerpecen̄un nakmiin piknaluku, nunamun calaralirnerani Jordan-aam, Moses-aam, ATANREM pistiin, cikiutekellranun elpecen̄un.

⁵Pinritevkenaki maligtaquniaraci makut picirkiutet Moses-aam alerquutekellri elpecen̄un: kenkiciu ATANEQ Agayutsi, pisqutii aturciu, alerquutai niisngaciki, piciuci elliinun, kevgiurluku-llu ellii ircaqurpeciuggun yuucirpeciuggun-llu tamalkirrluci.”

⁶Joshua-m atawaqercetai utertelluki-llu, waten-llu qanrulluki: “Uterteqatartuci cakneq tukuuluci, amllernek-llu ungungssingqerrluci, cali piuterluci qerrirlimek, suulutaanek, punernernek, cavignek, amllernek-llu aturanek. Avgutniaci yuullgutkellriarullguteci canek ingluvcen̄ek tegullerpecen̄ek.” Taukut-llu ayagtut uterrluteng. Moses-aam cikiutekellrua nuna calaralirnerani Jordan-aam avgitnun yuullgutkellriartain Manasseh-m. Tau͡gaam avgit Joshua-m cikillrui nunamek kanavalirnerani Jordan-aam, allat yuullgutkellriit pillgutekluki.

⁹Tua-i yuut yuullgutkellriartait Reuben-aam, Gad-am, East Manasseh-m-llu utertut nunameggnun, unilluki allat Israel-aat Shiloh-mun Canaan-aamelngurmun. Ayagluteng-llu nunameggnun Gilead-aamun, tegullermeggnun ATANREM alerqullruciatun Moses-aakun.

¹⁰Tuani yuullgutkellriarit Reuben-aam, Gad-am, East Manasseh-m-llu tekicameng Geliloth-amun, kanavalirnerani Jordan-aam, angtuamek ekuaviliut kuigem caniani.

¹¹Taukut-llu allat Israel-aat qanrucimaut, “Atam yuullgutkellriartai Reuben-aam, Gad-am, East Manasseh-m-llu ekuavilillinilriit Geliloth-ami, tunglirnemten̄i Jordan-aami!”

¹²Tuani niicameng mat'umek Israel-aam yui, tamarmeng taukut nunalgutkellriit quyurtut Shiloh-mun, ayagluteng anguyagyarturnaluki calaralirnerem yuullgutkellriartai.

¹³Tua-llu yuin Israel-aam ayagcetaat Phinehas-aaq, qetunraa Eleazar-aam agayulirtem, yugnun yuullgutkellriartainun Reuben-aam, Gad-am, East Manasseh-m-llu nuniini Gilead-aam.

¹⁴Qulen-llu ciuliqagten͞gulriit maligtaat Phinehas-aaq, atauciq kanavalirnermi yuullgutkellrianek piaqluni, tamarmeng-llu ilakuralriit ciuqliqaggluku tungayallgutkellriani.

¹⁵Tekitut nuniinun Gilead-aam, yuinun Reuben-aam, Gad-am, East Manasseh-m-llu.

¹⁶ATANREM-llu yui qanrucilluki qanertut taukunun, “Ciin waten mat'umek assiilngurmek piceci inglulirluku Agayutiit Israel-aat? Ingluliurutuci ATANERMUN ekuavililuci elpecen̄ek! Maligtaqunrirarci ellii!

¹⁷Neq'akiciu assiilngilput Peor-ami, ATANREM-llu yun'i anucimirqecetaarluki cangerlagkun, maa-i cali wangkuta nangteqluta tamana pitekluku. Assiilngilput-qaa amllerinrituq?

¹⁸Qessakeqatararci-qaa maligtellerkaa wani-wa? Ingluliuquvciu watua ATANEQ qenrutarkaugai tamalkuita Israel-aat unuaqu.

¹⁹Tua-llu watua, nunasi agayularviksunailkan, taici ATANREM nuniinun, Pelatekaan uitallranun. Allakariniartuci nunamta iliinek. Tau͡gaam ingluliurpek'naku ATANEQ wall'u wangkuta inglukilriarurcetevkenata ekuavililuci ilaluku ekuavia ATANREM Agayutemta.

²⁰Neq'erciu qaillun Achan-aam qetunraan Zerah-m narurcillra alerquutmun inerquusngalrianun navguutekamek iqulegnun. Tamana-llu pitekluku tamaq'apiarmeng Israel-aat anucimirqecetaarumaluteng, Achan-aaq-llu kiimetenrituq tuqulleq assiilngillni pitekluku.”

²¹Tua-llu yuullgutkellriartain Reuben-aam, Gad-am, East Manasseh-m-llu kiugait ciuliqagtait kanavalirnermi yuullgutkellriit:

²²“Pinilria Agayutnguuq! Ellii ATANRUUQ! Pinilria Agayutnguuq! Ellii ATANRUUQ! Elliin nallunritaa ca pitekluku waten pillerput, nallunritesqumaamceci-llu elpeci! Ingluliurutellrukumta ukveqevkenaku-llu ATANEQ, unguvavkanricikut!

²³Narurtellrukumteggu ATANEQ ekuavililuta nakmiin pikamten̄ek, ekuagivigkamten̄ek elliitnek, mukaarkanek, ilakuyucim-llu elliitainek, ataki ATANREM tungaunani anucimirqecetaarlikut.

²⁴Qang'a! Wangkuta pillruukut mat'umek alingamta kinguqvaarni kinguveci qanernayukluki wangkuta irniamten̄un waten, ‘Cakseciu ATANEQ Agayutiit Israel-aat?

²⁵Elliin Jordan-aaq engelngurtellrua akunlemten̄i wangkuta elpeci-llu yuitni Reuben-aam Gad-am-llu. Elpeci ilaunrituci ATANERMUN.’ Tua-i kinguverpeci aipaagni kinguvemta agayulallrat ATANERMUN taqevkarciqaat.

²⁶Taumek ekuavililriakut, ekuagilarngaunata elliilarngaunata-llu,

²⁷tau͡gaam nallunailkutauluku wangkuta yumten̄un elpeci-llu, tunglirkamten̄un-llu kingumten̄i, ellaitnun nallunritesqelluku agayulaucirput ATANERMUN tanqilriami Pelatekaani elliilallemteggun ekuagarkanek ilakuyucim-llu elliitainek. Waten piukut kinguveci qanresqumavkenaki kinguvemten̄un ATANEQ ellaitnun cakenritniluku.

²⁸Umyuarteqellruamta, tuatnallikata kinguveput kiuyugngaluteng, ‘Atam! Ciuliaput ekuavilillruut ayuqiinek ATANREM ekuavian. Ekuaviuvkenani ekuagarkanek elliitnek-llu, nallunailkutauluni tau͡gaam yumten̄un elpeci-llu yugpecen̄un.’

²⁹Ilumun ingluliurngaitarput ATANEQ arulairngaunata-llu watua maligutlemten̄ek elliinun ekuavilillemteggun ekuaginaluta mukaarkanek wall'u elliitnek ekuagarkanek. Wangkuta allamek ekuavilingaitukut ekuavian ATANREM Agayutemta avatiikun, napalriim ciuqerrani Pelatekaan tuanlucian!”

³⁰Phinehas-aam agayulirtem qulen-llu ciuliqagcilriit angutet quyungqalrianek nayurtain, yuungnaqellriit-llu ataita kanavalirnermi yuullgutkellriit, niitait yuullgutkelriarita Reuben-aam, Gad-am, East Manasseh-m-llu qanellrat, ilukegcitekluku-llu.

³¹Phinehas-aaq, qetunraa Eleazar-aam agayulirtem, qanertuq taukunun, “Nallunrirarput ATANERMUN nayuucirput. Ingluliunritliniarci; wani-wa anirturaci Israel-aam yui anucimirqecetaarumallerkaatnek ATANERMEK.”

³²Nutaan Phinehas-aam ciuliqagcilriit-llu unitait Reuben-aam Gad-am-llu yui Gilead-aami uterrluteng-llu Canaan-aamun Israel-aat yuitnun, qanrulluki-llu qaillun pillermeggnek.

³³Qanemcicateng Israel-aat tua-i ilukegciut nanrarluku-llu Agayun. Qanenrirluteng-llu anguyallerkameggnek piunrirnaluku nuna Reuben-aam Gad-am-llu yuin nunalgarrvikellrat.

³⁴Yuk'ek Reuben-aankuk Gad-aq-llu qanertut, “Uum ekuaviim nallunairaa tamamten̄un ATANREM Agayutngucia.” Apruciraat-llu waten: “Nallunairista”.