Read Yupik Joshua 23 Bible Online

Joshua 23 - Yupik bible

Joshua 23

¹ATANREM ak'anun Israel-aat uqisngavkallrui inglukestaitnek, uitanqegcivkarluki. Tamatum-llu nalliini Joshua cakneq ak'allaurrluni.

²Tua-i-llu taisqai tamalkuita Israel-aat, ciulirneret, ciuliqagtet, cuqcistet, atanerruarit-llu yuut, qanerluni-llu, “Waniwa cakneq ak'allaurtua.

³Cat tamalkuita tangellruaci ATANREM Agayutevci pillri makunun angayuqauvillgutkellrianun elpeci pitekluci. ATANREM Agayutevci calluucitellruaci.

⁴Allakaritellruamci pikarkauvkarluku yuullgutkellriarpecen̄un nuniitnek atanruviit cali maa-i uitalriit, ilakluki nunait angayuqauvillgutkellriit ak'a tegullrenka calaralirnermi Jordan-aami, imarpik Mediterranean Sea tekilluku kanavalirnermi.

⁵ATANREM Agayutevci kingupiarceciiqai elpecen̄ek, ayagceciiqai-llu iluvaquvci. Nuniit-llu pikciqerci, ATANREM Agayutevci akqutkellruciatun elpecen̄un.

⁶Taumek mulngakluci niisngakici, aturluki-llu cat tamalkuita igausngalriit kalikarni alerquutaini Moses-aam. Ilarrii-llu cakaaqsaunaku,

⁷ilagautenritniartuci makut angayuqauviit avatevcen̄i yuitnun. Apaaksaunaki agayutaita atrit wall'u atuqsaunaki atrit tamakut ukvernarcariaqavci wall'u agayuksaunaci tamakunun ciktaarvikeksaunaki-llu.

⁸Tau͡gaam piciuluci ATANERMUN man'a tekilluku pillerpecetun.

⁹ATANREM qimagcetellrui angelriit piniq'apigtellriit-llu angayuqauvillgutkellriit iluvallerpecen̄i. Kia-llu inglulirciigataqluci man'a tekilluku.

¹⁰Ilavci-llu atauciuluni tiissitsaat angutet qimagcecugngai, tua-i-wa ATANREM Agayutevci calluucicaci akqellrucimitun.

¹¹Mulngakluci kitak, kenekluku ATANEQ Agayutsi.

¹²Piciunrilkuvci ilaulluci-llu tamakunun angayuqauvignun maa-i uitalrianun avatevcen̄i wall'u aipangaqluci tamakunek,

¹³nallunriciiqerci ilumun ATANREM Agayutevci qimagcetnanrirciqai makut angayuqauviit iluvang'e'rpeci. Tau͡gaam aarnarqeciqut elpecen̄un napcetaatun wall'u petmigtun, akngirnarqetaluteng-llu piqrutatun tunuvcen̄i wall'u cukilanatun iivcen̄i 'verutetun. Man'a-llu nangengaunani qaqilluci nangnatkarpecen̄un maaken nunakegtaarmek ATANREM Agayutevci elpecen̄un cikiutekellranek.

¹⁴“Watua tuqullerkaqa tekituq. Tamaq'apiarpeci nallunrituci ircaqurpeciuggun yuucirpeciuggun-llu ATANREM Agayutevci cikillruaci tamalkuitnek assilrianek akqutkellerminek. Akqutkellri tamarmeng piciurtellruut elpecen̄un; atauciunger'mi pinricen̄arpek'nani.

¹⁵Tau͡gaam atullrucimitun tamalkuita assilriit akqutkellni elpecen̄un, akeqnerrlugutni cali tamalkuita pinritevkenani tuc'eciiqai.

¹⁶Atunrilkuvciu akquyun ATANREM Agayutevci elpecen̄un alerquutekellra atuusqelluku cali-llu kevgiuquvci agayuaqluci-llu allanun agayutnun, eq'uqrutmikun anucimirqecetaarciqaaci, ak'anivkenaci-llu catairuciiquci maaken nunakegtaarmek elliin cikiutekellranek elpecen̄un.”