Read Yupik Joshua 24 Bible Online

Joshua 24 - Yupik bible

Joshua 24

¹Joshua-m quyurtai tamalkuita yuullgutkellriartai Israel-aam Shechem-aami. Taisqai ciulirneret, ciuliqagtet, cuqcistet, atanerruarit-llu Israel-aat, taukut-llu tailuteng Agayutem ciuqerranun.

²Joshua qanertuq tamalkuitnun yugnun, “Waten ATANEQ Israel-aat Agayutiit qanertuq: Ak'a ciuliaci uitallruut akilirnerani Kuigem Euphrates-aam tamaani-llu agayulallruut allanun agayutnun. Iliit taukut ciuliarpeci Terah-rullruuq, atakluku Abraham-aam Nahor-am-llu.

³Tua-llu Abraham-aaq ciuliarci tegullruaqa nunamek akianek Euphrates-aam, ciuliqaggluku-llu nuniikun tamalkuan Canaan-aam. Cikillruaqa-llu amllernek kinguvrinek. Ciki'irqa Isaac-aamek,

⁴Isaac-aaq-llu Jacob-aamek Esau-mek-llu. Esau-llu cikirluku qemililriamek nunamek Edom-aamek pikaanek. Tau͡gaam ciuliarci Jacob-aaq irniani-llu atrallruut Egypt-aamun.

⁵Kinguqvaarni ayagcetellruagka Moses-aankuk Aaron-aaq-llu, angelriamek-llu arenqiallugutmek Egypt-aamun pillruunga. Tau͡gaam ciuliqaggluci anutellruamci.

⁶Anutellruanka ciuliaci Egypt-aamek, Egypt-aarmiut-llu kingunrirtullruit pektessuuterluteng horse-arluteng-llu. Tau͡gaam ciuliarpeci tekitellermeggni imarpigmun Red Sea-mun,

⁷qayagaullruatnga ikayuusqelluteng. Tan'germek-llu elliillruunga akuliitnun ellaita Egypt-aarmiut-llu. Imarpiim-llu mer'anun Egypt-aarmiut patuvkallruanka qecuqitevkarluki. Nallunritarci qaillun pillruciqa Egypt-aamun. “‘Yuilqumi mertailngurmi ak'anun uitallruuci.

⁸Tua-i-llu wiinga Amorite-at nuniitnun ayautellruamci, uitalrianun calaralirnerani Jordan-aam. Tuani callullruiceci, tau͡gaam cikillruamci cirlakillerkarpecen̄ek ellaitnek. Nuniit-llu tegullruarci, wiinga-llu piunrirluki iluvallerpecen̄i.

⁹Tua-i-llu angayuqran Moab-am, Balak-aam qetunraan Zippor-am, callugluci inglulirluci. Qanermek-llu ayagceciluni Baalam-aamun qetunraanun Beor-am elliinun aniqlaasqelluci.

¹⁰Tau͡gaam wiinga niitellrunritaqa Baalam-aaq, taumek atawaqercetellrukiici tau͡gaam. Waten pilua anirtullruamci Balak-aamek.

¹¹Elpeci qerallruarci Jordan-aaq Jericho-mun-llu tailuci. Angutain-llu Jericho-m anguyagluci, cali-llu Amorite-at, Perizzite-at, Canaanite-at, Hittite-at, Girgashite-at, Hivite-at, Jebusite-at-llu callugluci. Tau͡gaam tamakut elpecen̄un cirlakevkallruanka tamalkuita.

¹²Iluvaavci nuniircetellruanka qimagcetnalukek malruk angayuqak Amorite-ak. Nuussirpagpeciuggun urluverpeciuggun-llu cirlakellrunritaci.

¹³Cikillruamci nunamek caliaqeksailkevcen̄ek nunarpagnek-llu elpeci piliaqelqenrilkevcen̄ek. Maa-i-llu tua-i uitaluci tamaani, ner'aqluci atsanek wine-arkanek naumalrianek nauceciilqenrilkevcen̄ek, olive-aanek-llu napanek cali nauceciilqenrilkevcen̄ek.’

¹⁴“Watua taumek qigcikiciu ATANEQ kevgiurluku-llu ellii cumiggluci piciuluci-llu. Pegciki agayutnguat ciuliarpeci ciktaarvik'lallrit Mesopotamia-mi Egypt-aami-llu, kevgiurluku-llu kiingan ATANEQ.

¹⁵Kevgiuryunrilkuvciu ATANEQ, unuamek cucuklirci kitumun kevgiuqatallerpecen̄ek, agayutnguanun ciuliarpeci ciktaarvik'lallritnun Mesopotamia-mi wall'u agayutaitnun Amorite-at maa-i nuniitni uitavigpeci. Ilama tau͡gaam enemni wiinga-llu kevgiurciqerput ATANEQ.”

¹⁶Tua-llu yuut kiugut, “Wangkuta ATANEQ unisngaitarput watqapik kevgiurnaluki allat agayutet!

¹⁷ATANREM Agayutemta anutellruakut ataput-llu teguarullemten̄ek Egypt-aami, wangkuta-llu tangellruaput irr'inarqelrialiari. Elliin picurlallerkamten̄ek aviusngallruakut yugugaat nunalgutkenrilnguut akuliitgun ayagallemten̄i.

¹⁸Maavet-llu nunamun iluvallemten̄i ATANREM qimagcetellrui Amorite-at tamalkuita maani uitalriit. Taumek wangkuta-llu kevgiurciqerput ATANEQ, ellii Agayutekngamteggu.”

¹⁹Joshua qanertuq yugnun, “Tau͡gaam elpeci kevgiuryugngangailngatarci ATANEQ. Ellii tanqilriaruuq Agayun, assiilngurpecen̄ek-llu au͡g'arisngaitaaci. Ciknatalriaruuq,

²⁰uniskuvciu-llu kevgiurnaluki tangnerranarqellriit agayutet, tuiggvikluci anucimirqecetaarciqaaci. Piunrirciqaaci ciungani assirluci pillrung'e'rmici.”

²¹Yuut qanertut Joshua-mun, “Qang'a! Wangkuta kevgiurciqerput ATANEQ.”

²²Joshua-m-llu qanrutai, “Elpecen̄ek nallunritestekuci qanllerpecen̄un cucukluku kevgiurciqniluku ATANEQ.” Taukut-llu qanertut, “Aa-ang, wangkuta nallunritesten͞guukut.”

²³Joshua-m pii, “Kitak-wa pegciki tamakut tangnerranarqellriit agayutait avalici, akqiluci-llu ilumuullerkarpecen̄ek ATANERMUN Agayutiitnun Israel-aat.”

²⁴Tua-llu yuut qanertut Joshua-mun, “Wangkuta kevgiurciqerput ATANEQ Agayutvut. Alerquutai-llu niisngaciqaput.”

²⁵Tua-i Joshua akquyutmek taqutuq yuut pillgutekluki taumi ernermi, tuani-llu Shechem-aami elliin cikirai alerquutnek picirkanek-llu aturarkaitnek.

²⁶Joshua-m igautai makut alerquutet kalikanun Agayutem Alerquutain kalikainun. Tua-i-llu tegulluni angelriamek teggalqumek elliluku-llu napam acianun ATANREM agayuviani.

²⁷Qanerluni-llu yugnun tamalkuitnun, “Una teggalquq nallunritestekciqerput. Niitellrui tamalkuita qaneryaraat ATANREM wangkutnun qanrutkellri. Nallunritesten͞guciquq elpecen̄un, ingluliurutesqevkenaci Agayutevcen̄un.”

²⁸Tua-i-llu Joshua-m ayagcetai yuut, tamarmeng-llu uterrluteng nakmiin nunameggnun.

²⁹Taum kinguakun ATANREM pistii Joshua qetunraa Nun-am tuquuq, allrakungluni yuinarnek tallimanek qulmek cipluku (110).

³⁰Tungmagtaat elliin nakmiin nuniinun Timnath Serah-mi, qemilegtaani Ephraim-aam, neglirnerani Ingrim Gaash-am.

³¹Joshua-m unguvallran taktaciatun Israel-aam yuin kevgiullruat ATANEQ, tuqullran-llu kinguani tuaten piurallruut tamakut ciuliqagtet unguvallratni tungaunaki tangertellrit ATANREM caliallrin Israel-aanun.

³²Temii Joseph-aam, yuin Israel-aat taitellrat Egypt-aamek, tungmagcimallruuq Shechem-aami, nunarrarmi Jacob-aam kiputellrani qetunrainek Hamor-am, atiin Shechem-aam. Tauna kiputellra akingqellruluni yuinarnek tallimanek (100) akinek. Una nuna paitaqellruat Joseph-aam kinguvrin.

³³Eleazar-aaq qetunraa Aaron-aam tuqullruuq tungmagcimaluni-llu Gibeah-mun, nunanun qemilegmi nuniini Ephraim-aam, cikiutekumallermun qetunraanun Phinehas-aamun.