Read Yupik Joshua 3 Bible Online

Joshua 3 - Yupik bible

Joshua 3

¹Unuaquan unuakumi Joshua Israel-aam-llu yui makcara'arluteng unitaat uitallerteng Acacia, ayagluteng-llu Jordan-aamun, qavartarluteng-llu utaqaluku qerallerkarteng.

²Erenret-llu pingayuurcata ciuliqagtet arulaingqaviatgun pektut,

³qanrulluki-llu yuut, “Tangerquvciki agayulirtet ATANREM Agayutevci Akqutiin Yaassiiganek tegumiarluteng, upeskici maliggluki-llu.

⁴Maanteksaituci ciungani, apertuaciiqaiceci ayallerkarpecen̄ek. Tau͡gaam mallguuryaqunacikek Akqutem Yaassiigek; mile-am avganek kingunragni pitaurangnaqkici.”

⁵Joshua-m yuut qanrutai, “Elpecen̄ek menuircarluci, unuaqu ATANEQ elpecen̄i irr'inarqellrianek piciqngan.”

⁶Tua-llu agayulirtet qanrutai Akqutem Yaassiiga teguluku yuut ciunratgun ayaasqelluki, ellait-llu tuaten piluteng qanruciatun.

⁷ATANEQ qanertuq Joshua-mun, “Unuamek piarkama Israel-aam yuinun qigcigyaguceciiqaaten angelriaruluten, nallunrirciqaat-llu wangnun nayuucin, Moses-aaq nayullrucimtun.

⁸Qanruskiki agayulirtet Akqutem Yaassiigan tegumiaqestai, kuigmun tekiskata mermun atrarluki cen̄am yaaqsinrilkiinun nangercesqelluki.”

⁹Joshua-llu qanertuq yugnun, “Tailuci niicugnici ATANREM Agayutevci qanellranek.

¹⁰Ciumurtellerpecen̄i ciuvcen̄i elliin ilumun anevkarciqai Canaanite-at, Hittite-at, Hivite-at, Perizzite-at, Girgashite-at, Amorite-at, Jebusite-at-llu. Nallunriciiqerci unguvalriim Agayutem elpecen̄i uitacia

¹¹nunam tamarmi ATANRAN Akqutiin Yaassiigan qeraqaku Jordan-aaq ciuvcen̄i.

¹²Watua cucuklirluci angutnek qula malrugnek cipluku (12), atauciuqaqluki Israel-aam yuullgutkellriartainek.

¹³Agayulirtet ATANRAN Akqutiin Yaassiiga tegumiaqestain meq tuskatgu Jordan-aam carvanra arulairciquq, meq-llu uatmurtellria quyurciiquq ataucimun.”

¹⁴Quyurciyaram nallekngaku kuik-llu ulumaluni. Yuut arulaingqavillerteng unitellratni qeraryarturluteng Jordan-aakun, agayulirtet Akqutem Yaassiiga tegumiaqluku ciungatgun ayagtut. Agayulirtet-llu mermun tus'uciicetun

¹⁶meq arulairtuq quyurrluni-llu kiaqvani Adam-aami, Zarethan-aam nunarpiim caniani. Carvaneq-llu uatmurtellria nanvamun Dead Sea-mun arulaiqapiggluni, yuut qeraryugngariluteng Jericho-m mallgeskiikun.

¹⁷Yuut-llu qerallratni kinertellriakun nunakun, agayulirtet Akqutem Yaassiiganek tegumialriit nangengqaut Jordan-aam qukaani kinertellriami nunami, qaqilluteng yuut qerarnatkaatnun.