Read Yupik Joshua 4 Bible Online

Joshua 4 - Yupik bible

Joshua 4

¹Tamarmeng qeraumariatgu Jordan-aaq, ATANEQ qanertuq Joshua-mun,

²“Qula malrugnek cipluku (12) angutnek cucuklia, atauciuqaqluki ilakellgutkellrianek,

³alerqurluki-llu qula malrugnek cipluku (12) teggalqunek tegutesqelluki Jordan-aam qukaanek, agayulirtet nangengqallrata nalqapiaraanek. Qanruski taukut teggalqut ang'aqesqelluki elliluki-llu qavartarvigkarpecen̄un ataku.”

⁴Joshua-m-llu taisqai angutet qula malrugnek cipluki (12) cucukellni

⁵qanrulluki-llu, “Jordan-aamun atrarci ciunrakun ATANREM Agayutevci Akqutiin Yaassiigan. Tamarpeci teggalqumek equkatarluci, ataucimek Israel-aam ilakutellriartainun pikirluki.

⁶Ukut teggalqut neqaartuutnguciqut yugnun ATANREM caliallranek. Kinguqvaarni irniarpeci aptaqaceci makut teggalqut elpecen̄un cauciitnek,

⁷qanrut'larniaci Jordan-aam mer'an carvanillra arulaillruniluku ATANREM Akqutiin Yaassiiga qeraucimallrani Jordan-aakun. Ukut-llu teggalqut umyuaqutnguarkauluteng Israel-aam yuinun akwarpak.”

⁸Angutet-llu Joshua-m pisquciatun piut, ATANREM alerquuciatun Joshua tegulluteng qula malrugnek cipluku teggalqunek Jordan-aam qukaanek, Israel-aam ilakellgutkellriartain amllertaciicetun, qavartarvigkameggnun-llu ayaulluki, elliluki-llu tuavet.

⁹Joshua-llu nunalgarciuq qula malrugnek cipluku teggalqunek Jordan-aam qukaanun, agayulirtet Akqutem Yaassiigan tegumiaqestain nangerngallratnun. (Taukut teggalqut cali tuantut.)

¹⁰Agayulirtet Jordan-aam qukaani nangerngallruut cat tamarmeng qaqitnatkaatnun, ATANREM Joshua-mun qanrutkesqellri pisqelluku. Man'a Moses-aam alerquutelqaa. Yuut cukangnaqluteng kuigkun qerallruut.

¹¹Tamarmeng qeraumariata agayulirtet ATANREM Akqutiin Yaassiiga malikluku yuut ciunratgun ayallruut.

¹²Angutet Reuben-aam ilakellgutkellriartainek, Gad-am-llu, Manasseh-m-llu ilakellgutkellriartain avgit, anguyautellerkamun upingaluteng qerartut ciungatgun yuut, Moses-aam pisqellruciatun.

¹³Ciuqerrani ATANREM tiissitsaat yuinaak malruk (40, 000) angutet upingaluteng anguyagmun qerartut nunamun manigcetellriamun mallgeskiini Jericho-m.

¹⁴ATANREM caliallrakun tuani ernermi Israel-aam yuin umyuartequtaat Joshua angelriaruluku. Qigcikluku-llu unguvallran taktaciatun, Moses-aaq qigcikellrucimegcetun.

¹⁵Tua-llu ATANREM qanrutaa Joshua

¹⁶alerquusqelluki agayulirtet Akqutem Yaassiigan tegumiaqestai tagesqelluki Jordan-aamek.

¹⁷Joshua-llu tuaten piuq,

¹⁸Agayulirtet-llu kuigem cen̄ii tekicatgu kuik carvannguq ataam uleluni cenkek-llu qaingirlukek ataam.

¹⁹Yuut qeraraat Jordan-aaq erenrin qulngurutiitni ciuqliim iralum, qavartarluteng-llu Gilgal-aami, calaralirnerani Jericho-m.

²⁰Tuani Joshua-m nunalgartai teggalqut Jordan-aamek tegumallret.

²¹Israel-aam-llu yuinun qanerluni, “Tekitarkami mikelngurpeci aptaqaceci ukut teggalqut cauciitnek,

²²qanrut'laqiciki Israel-aanun qerallruniluku Jordan-aaq kinertellriakun nunakun.

²³Qanrulluki-llu ATANERMUN Agayutevcen̄un kinercetellruniluku mer'a Jordan-aam qerarnatkarpecen̄un, Red Sea-m mer'a kinercetellrucimitun wangkutnun.

²⁴Mat'ukun nunam yuin nallunrirciqaat ATANREM pinian angelriarucia. Qigcikarkaugarci-llu ATANEQ Agayutsi akwarpak.”