Read Yupik Joshua 7 Bible Online

Joshua 7 - Yupik bible

Joshua 7

¹ATANREM alerquutii Israel-aanun camek Jericho-mek tegutesqevkenaki piunriumaqatallrani, narurcimallruuq. Angutem atellgem Achan-aamek narurtellrua tamana alerquun, taumek ATANREM qenrutellrukai Israel-aam yui. (Achan-aaq qetunraqaa Carmi-m, tutgaqluku Zabdi-m, Zerah-m ilakellriarin ilakluku, Judah-m kinguveqellriartainun ilauluteng.)

²Joshua ayagceciuq angutet ilaitnek Jericho-mek Ai-amun, nunarpagmun calaralirnerani Bethel-aam, canimelkiini Bethaven-aam, picirkirluki nallunairtuusqelluku nuna. Tuaten pimariameng

³Joshua-mun qaneryarturtut, “Ai-aq tamarmirrluteng callugnarqenritaat. Ayagcecinarquq kiingan malrugnek wall'u pingayunek tiissitsaanek (2,000 or 3,000) angutnek. Tamalkuita anguyagtet ayagcecaqunaki tuavet callugyarturtelluki; angelriarunrituq nunarpak.”

⁴Tua-i tiissitsaat pingayun (3,000) Israel-aat curugyaaqut, tau͡gaam qimallruit Ai-am angutai utetmun.

⁵Ai-am-llu angutain maligtait nunarpiim iteryaraanek yaaqsinrilngurmun, tuqulluki-llu yuut tayima yuinaq akimiaq-wa ataucimek cipluku (36) atrallratni qemimek. Tua-i Israelite-at caceskelli'irtut alingluteng-llu.

⁶Joshua-m ciuliqagtaita-llu Israel-aat aturateng allgurait cakneq ilulliqluteng. Nunamun-llu pull'uteng ciuqerranun ATANREM Akqutiin Yaassiigan, atakurnatkaanun, qamiquteng urr'armek piluki nallunairluku angniilucirteng.

⁷Joshua-llu qanertuq, “Artuqailnguq ATANEQ! Ciin-kiq qerautellrulliniceta Jordan-aakun? Amorite-anun-qaa tunenaluta? Piunriisqelluta-qaa? Ciin-kiq akiantaurallrunriceta Jordan-aam?

⁸Qaillun qanerciqsia, ATANEQ, wani-wa kingupiarata Israel-aat inglumeggnek?

⁹Canaan-aarmiut allat-llu nunami niiciiqut mat'umek. Kassuguciiqaitkut-llu tuqulluta-llu nangluta! Qaillun tua-i elpet piciqsit takarnarqutvet cakaninritlerkaanun?”

¹⁰Tua-llu ATANREM Joshua qanrutaa, “Nangerten! Ciin taklasit nunami waten?

¹¹Israel-aat assiilngillruut! Navellruat umyuallguciutellerteng wangnun ellaitnun atuusqelqa. Tegutellruut piunriumaarkanek. Teglellruit iqlutekluki-llu, pimeggnun-llu ilaulluki.

¹²Man'a pitekluku Israel-aam yuin ingluteng ingluliurciigatait. Kingupiallruut inglumeggnek, tua-i-wa ellait-llu waniwa pinarqelriarurcameng piunriumallerkamun! Nayurngairuciiqamci piunrinrilkuvciki inerquusngangraata tegulci!

¹³Nangerrluten! Menuircarki yuut upluki-llu ciuqamnun taillerkaat. Qanrulluki upingasqelluki unuaqu. Tua-i-wa Wii, ATANEQ Agayutiitni Israel-aat qanerkangqerrama waten, ‘Israel-aaq, avalingqertuten piunriisqellemnek! Ingluliurciigataci ingluci tamakut eggnatkarpecen̄un!’

¹⁴Taumek qanruski unuakumi taicimaarkauniluki yuullgutkellriaruurluki. Yuullgutkellriit apertullrenka taicimaarkaugut, tungelquqelriaru'urluteng. Tungelquqellriit-llu aperturarkanka taiciqut ilakuralriaru'urluteng. Ilakuralriit-llu aperturarkanka taiciqut atauciuqaqluteng.

¹⁵Atauciq-llu apertulqa nataqumakuni taunguluni avalilek inerquusngallernek ekuamaarkauguq, ilai-llu, tamalkuita-llu piutai tapeqluki. Tua-i-wa Israel-aat kiaresngianarqellriamek piaki, akqutemnek-llu navgian.”

¹⁶Unuaquan Joshua-m makcara'arluni taitai Israel-aat yuullgutkellriaruqa'aqluki, Judah-m-llu yuullgutkellriartai apertuumaut.

¹⁷Taitai-llu Judah-m yuullgutkellriartai tungelquqelriaruqa'aqluki, Zerah-m-llu tungelquqelriartai aperluki. Ciuvarcetai ilakellriaruqa'aqluki, Zabdi-m-llu ilai aperluki.

¹⁸Zabdi-m-llu ilai apraki taitai atauciuqaqluki. Achan-aaq-llu qetunraa Carmi-m, tutgarii Zabdi-m aperturluku.

¹⁹Joshua-m-llu qanrutaa, “Qetunraa, piciulriamek qanerniartuten wani ATANREM Israel-aat Agayutiita ciuqerrani, apervikualuten-llu. Qanrusnga watua pillerpenek. Iirumangnaqsaqunaku wangnek.”

²⁰Achan-aaq-llu kiuguq, “Piciuguq. Assiilngirtua ATANERMUN Israel-aat Agayutiitnun, waten pillruunga:

²¹Tamakuni tegullemten̄i tangertua tangnirqellriamek Babylon-aartarmek ulikutamek, tallimanek-llu uspelegnek qerrirlimek, suulutaamek-llu uspermek atauciq cipluku nalliinek. Ayariamki cakneq tegullruanka. Nataqeciqaten elausngaluteng pelatekamni, qerrirlit aciqliuluteng.”

²²Joshua-llu angutet ilaitnek ayagceciuq, taukut-llu aqvaqurluteng pelatekamun, nataqluki-llu piunriisqumalriit ilumun elausngaluteng tuani, qerrlit atliqluku.

²³Anutait-llu pelatekamek tailluki-llu Joshua-mun Israel-aanun-llu, elliluki-llu ciuqerranun ATANREM.

²⁴Joshua-m-llu, ilaluni Israel-aat teguat Achan-aaq, qerrirliq, ulikutaq, suulutaaq, ilakluki panii qetunrai-llu, kuluvai, ciulvai, qusngii, pelatekaa, tamalkuita-llu piutai; ayaulluki-llu kuignayugmun aprumalriamun Trouble Valley (Pinerrlugutem Kuignayua).

²⁵Joshua-llu qanertuq, “Ciin pinerrlugutmek pisikut? Watua ATANREM pinerrlugutmun tut'eciiqaaten!” Tamarmeng-llu yuut Achan-aaq teggalqunek miluquat tuqulluku; ilai-llu teggalqunek miluquit ekualuki-llu avalirtuumaita.

²⁶Teggalqunek-llu quyigiluki qalliliraat. Cali unuamek uitaluteng tuani. Taumek tauna cali unuamek aterpagtelaqiit Trouble Valley-mek, (Pinerrlugutem Kuignayua). Tua-i ATANEQ qenertenrirtuq.