Read Yupik Joshua 8 Bible Online

Joshua 8 - Yupik bible

Joshua 8

¹ATANEQ qanertuq Joshua-mun, “Anguyagtet tamalkuita malikluki mayuci Ai-amun. Alingevkenaci caceskitevkenaci-llu. Cirlakivkarciqamci Ai-am angayuqranek; yui, nunii, nunarpii-llu piksaguciiqerci.

²Ai-aq angayuqra-llu piarkaugarci pillrucirpecetun Jericho-q angayuqra-llu, tau͡gaam maa-i aklui kuluvai-llu teguniaraci pikarkauluki. Upci curullerkaanun nunarpak alapen'errluki tunulirneranek.”

³Tua-i Joshua uptuq ayallerkaminun Ai-amun anguyagten̄i tamalkuita malikluki. Cucukiuq yuinaq qulmek cipluku tiissitsaanek (30,000) assinqurritnek anguyagtem̄i ayagtelluki-llu unugmi

⁴makunek picirkirluki: “Iiqici akilirneranun nunarpiim, tau͡gaam yaaqsigpek'naki; upingalluku curullerkarci.

⁵Wiinga yuunka-llu ullagciqaput nunarpak. Ai-am-llu yui ankata tungemten̄un, tuiggluta qimagciqukut ciuqlirmi pillrucimcetun.

⁶Kingunrirturciqaitkut, wangkutnun ciuliqagtelluteng anutnatkamten̄un nunarpagnek. Umyuarteqciqut qimagyukluta ciungani pillrucimcetun.

⁷Nutaan elpeci iirumallerpecen̄ek ayagluci nunarpak teguciqerci. ATANREM Agayutevci cikiutekciqaa elpecen̄un.

⁸Tegurraarluku nunarpak ekuavkarniarci, ATANREM alerquuciatun. Makut alerquutekaci.”

⁹Tua-i Joshua-m ayagcetai, iirluteng-llu utaqalgirtut kanavalirnerani Ai-am, akuliigni Ai-am Bethel-aam-llu. Joshua-llu tuani unugiluni.

¹⁰Unuakuarmi Joshua maktuq anguyagten̄i-llu quyurtai. Elliin-llu Israel-aat-llu ciuliqagtaita ciuliqaggluki Ai-amun.

¹¹Malini-llu anguyagtet ellii-llu nunarpiim iteryaraan tungiinun ayagtut, arulairluteng-llu neglirneratnun, kuignayuk akunleqliuluni ellaitnek Ai-aq-llu.

¹²Tegutuq-llu tiissitsaanek tallimanek (5,000) angutnek iirtelluki-llu kanavalirneranun nunarpiim akuliignun Ai-ankuk Bethel-aaq-llu.

¹³Anguyagtet elkarcimaut anguyallerkameggun, amllenrit arulairluteng neglirnermi, ilait-llu kanavam tunglirnerani. Joshua-llu kuignayugmi unugpak uitaluni.

¹⁴Angayuqran Ai-am tangrramiki Joshua-m yui qarivkenani up'artuq. Anguyagteni-llu tamalkuita malikluki an'ut tungiinun Jordan-aam Kuignaiyuan callugyarturluki Israelite-at ciungani callullmeng nuniini, nalluluku tau͡gaam curukautaucirteng kingunermeggnek.

¹⁵Joshua-llu yun'i-llu kingupiaruartut qimagluteng carr'ilqam tungiinun.

¹⁶Tamarmeng angutet nunarpagmi qayagaurumallruut kingunrirtuusqelluki. Kingunrirtullermeggni-llu Joshua nunarpagmek yaaqsigiinartut.

¹⁷Tamarmeng angutet Ai-amek kingunrirturait Israelite-at, nunarpak unilluku ikian, kitumek akiurutestekaunani.

¹⁸ATANEQ-llu qanertuq Joshua-mun, “Narulkarcuuten causgu tungiinun Ai-am; elpenun tun'aqa.” Joshua tua-i piuq pisqumacirmitun.

¹⁹Unatni-llu naluaki angutet iirumallret nangertut cukamek, aqvaqurluteng-llu itertut nunarpagmun teguluku-llu. Egmianun-llu nunarpak ekuavkaraat.

²⁰Ai-am angutai kingyaameng tangrraat aruvak mayulria qilatmun. Qaillun-llu ellait qimallerkaitut, tua-i-wa Israelite-at carr'ilqam tungiinun qimallret tuiggluteng curukaqataiceteng.

²¹Joshua-m yun'i-llu tangrramegteggu ilameggnun nunarpak tegucia ekuavkarluku-llu, tuiggluteng tuqurqait Ai-am yui.

²²Israelite-at-llu nunarpagmun pillret maa-i atrarluteng ilaulluteng anguyagmun. Ai-am yuin taringartaat kassugucimacirteng Israelite-anun, tamarmeng-llu tuqucimaut. Kina anagpek'nani, kina-llu unguvavkenani,

²³kiimi tau͡gaam angayuqra Ai-am. Teguluku-llu ullautaat Joshua-mun.

²⁴Israelite-at tuqutait tamalkuita ingluteng carr'ilqami malirqervillratni. Ai-amun-llu uterrluteng tuanelnguut tamalkuita tuqutait.

²⁵Tamarmeng-llu tuqullret tuani ernermi angutet arnat-llu tiissitsaat qulngullruut malrugnek cipluku (12,000), tamarmeng Ai-am yukluki.

²⁶Joshua-m narulkarcuutni naluumallrua Ai-am tungiinun atrartevkenaku-llu tamarmeng Ai-am yui piunrirnatkaatnun.

²⁷Israel-aat-llu teguit kuluviit aklut-llu tegulteng nunarpagmek, ATANREM Joshua qanrutellruciatun.

²⁸Joshua-m ekuagaa Ai-aq unilluku-llu ciqumllerurrluku. Tuaten-llu cali maa-i ayuqluni.

²⁹Elliin-llu Agartaa-llu angayuqra Ai-am napamek temii-llu tuantelluku atakunatkaanun. Akerta-llu tevian Joshua-m alerquutaa temii atrarcesqelluku. Egtaat-llu nunarpiim iteryaraanun. Patuluku-llu teggalqunek quyigiluki. Taukut unuamek cali uitaut.

³⁰Tua-llu Joshua Ingrim Ebal-aam qaingani ekuaviliuq ATANERMUN, Agayutiitnun Israel-aat.

³¹Piliaqaa Moses-aam ATANREM pistiin ayuqucirtuutekellruciatun Israelite-anun Moses-aam alerquutaini qanruciatun: “Ekuavik teggalqunek piliaqumalria calissuutekun cavigkun qupumanrilngurnek.” Tuani-llu elliigut ekualuki ATANERMUN, ilakuyucimun-llu elliiteteng tailluki.

³²Tuani Israel-aat takuatgun Joshua-m teggalqunek ayuqelii Alerquutet Moses-aam igallri.

³³Israel-aat ciuliqagteteng, atanerruateng, cuqcisteteng-llu, allanret-llu ellmeggni uitalriit nangengqaut atunem avategkeni ATANREM Akqutiin Yaassiigegken, caumaluki Levite-at agayulirtet tegumiaqestekek. Avgit nangengqaut tunusngaluku Ingriq Gerizim-aaq avgita-llu tunusngaluku Ingriq Ebal-aaq. ATANREM pistiin Moses-aam alerqullrui waten pisqelluki tekiskan akurtullerkaat atawaqautmek.

³⁴Nutaan-llu Joshua-m alerquutet naaqai qastuluni, tapeqluki atawaqautet aniqlaatet-llu igausngaciicetun Alerquutet kalikait.

³⁵Tamaq'apiarmeng alerquutai Moses-aam naaqumaut Joshua-kun quyungqalrianun, ilakluki arnat mikelnguut-llu, allanernun-llu ilausngalrianun ellaitnun.