Read Yupik Joshua 9 Bible Online

Joshua 9 - Yupik bible

Joshua 9

¹Cirlakillrat Israel-aat nallunrirait tamarmeng angayuqat kanavalirnerani Jordan-aam — qemini, ingrit engeliitni, tamiini-llu manigcelngurmi cen̄iini imarpiim Mediterranean Sea-am negetmun Lebanon-aaq tekilluku; makut angayuqaqait Hittite-at, Amorite-at, Canaanite-at, Perizzite-at, Hivite-at, Jebusite-at-llu.

²Tamarmeng quyurrluki anguyagteteng anguyagaat Joshua Israelite-at-llu.

³Tau͡gaam Gibeon-aam yuin, Hivite-aulriit, niicamegteggu Joshua-m qaillun pillrucia Jericho-q Ai-aq-llu

⁴iqlutmurutnaluku picirkiurtut. Ayagluteng neqkanek aqvatut, ciulvateng-llu nangumalrianek missuullernek atmirait callmagtuumalrianek-llu wine-at caquitnek.

⁵Allgulrianek-llu aturanek all'uteng, nangumalrianek-llu aluilicirluteng mingeqluki kitugtellermeggnek. Kelipat-llu taquarkait kinerrluteng uqugglugluki-llu.

⁶Ayagluteng-llu uitallratnun Gilgal-aamun qanerluteng-llu Joshua-mun Israelite-anun-llu yuinun, “Wangkuta yaaqvanek taigukut. Taumek akqut'lisqamteggen wangkutnun.”

⁷Tau͡gaam Israelite-am angutai qanertut, “Ciin akqut'liciqseta elpecen̄un? Canimaarmi uitayugnarquci.”

⁸Joshua-mun-llu qanertut, “Wangkuta pisten͞guukut elpenun.” Joshua-m aptai, “Kinkuuceci? Naken taiceci?”

⁹Taukut-llu qanemcitaat waten: “Nunamek yaaqvanek taigukut, usuuq, niicamta ATANERMEK Agayutevcen̄ek. Niitarput tamalkuita elliin pillra Egypt-aami,

¹⁰qaillun-llu pillruciak angayuqak malruk Amorite-ak calaralirnerani Jordan-aam: angayuqra Heshbon-aam Sihon-aaq, angayuqra-llu Bashan-aam Og-aq, Ashtaroth-aami uitalleq.

¹¹Ciuliqagtemta yuut-llu nunamten̄i uitalriit qanrutaitkut neqkanek upluta ayaasqelluta ullagluten. Qanrulluta-llu elpet pisqucirpetun pisqelluta, apcesqelluten-llu akquyutmek taqucesqelluten wangkuta pillgutekluta.

¹²Kelipauteput tangerki. Ayakarraallemten̄i ullagluten puqlanillruyaaqut. Tau͡gaam tangerki wani-wa kinrai uqugglugluteng-llu.

¹³Imillemten̄i-llu makut wine-arcuutet caqutet nutaraullruyaaqut, tau͡gaam tangerki wani-wa allgurtut. Aturaput-llu aluilitaput-llu nang'ut pekcimallemten̄ek.”

¹⁴Israel-aam angutain ciuniurait neqkat ilait taukunek, tau͡gaam ATANEQ apqaallrunritaat ciumek taukut neqkat pitekluki.

¹⁵Joshua akqut'liuq yugnikutmek Gibeon-aam yuinun unguvaarkauvkarluki. Israel-aam-llu ciuliqagtai akqiut akqun aturarkauluku.

¹⁶Akqut'lillmeng, erenret pingayun kinguatni, Israel-aat taringut taukut yuut ilumun canimenateng nunangqelliniciitnek.

¹⁷Tua-i Israel-aam yui ayagtut, erenret-llu pingayun kinguatgun tekitut taukut yuut uitallritnun nunarpagnun: Gibeon, Chipherah, Beeroth, cali Kiriath Jearim-aamun.

¹⁸Tau͡gaam Israel-aat tuqucesciigatait, tua-i-wa ciuliqagteteng akqillruata atrakun Israel-aat Agayutiita ATANREM. Tamarmeng-llu yuut qanemyuugautekaat ciuliqagtem̄eggnun man'a.

¹⁹Tau͡gaam ellaita kiugait, “Akqillruukut ellaitnun atrakun ATANREM Agayutiita Israel-aat. Watua akngircesciigataput.

²⁰Unguvavkarnarqaput akqillerput pitekluku; pinrilkumta Agayutem anucimirqecetaarciqaakut.

²¹Unguvavkarluki, tau͡gaam eqiulararkaugut muragnek mertarluta-llu.” Waten piyugluteng pillruut ciuliqagtait.

²²Joshua-m Gibeon-aarmiut ellminun taicesqai, apluki-llu, “Ciin alarcetaarcecikut qanrulluta yaaqvanek piniluci, maani uitallining'e'rpeci?

²³Waten piavci Agayutem pinarqellriarurtaaci. Yuc'i teguarurrlainararkaugut, muragkiurten͞guluteng mertarten͞guluteng-llu agayuviani Agayutma.”

²⁴Taukut-llu kiugut, “Waten piukut nallunriamteggu ilumun piciullinian ATANREM Agayutvet alerqullrucia pisten̄i Moses-aaq cikiutekesqelluku elpenun man'a nuna, yuut-llu tuqucesqelluki maani uitalriit iluvarturallerpecen̄i. Tuaten piukut alikngamceci, tuqucimanayukluta-llu wangkuta.

²⁵Wani-wa atam elpet tegumiaqekevkut; elpet umyuarteqellren assirngalnguq wangkutnun atuqiu.”

²⁶Tua-llu waten Joshua pillruuq: cayailkucirai Israel-aam-llu yuinun tuqucetevkenaki.

²⁷Tau͡gaam tamana tuaten pillni tapirluku teguarurtelluki eqiurten͞guluki mertarten͞guluki-llu Israel-aam yuinun, ATANREM-llu ekuavianun. Una erneq tekilluku taqeksaunateng man'a caliaq caliaqaat nani ATANREM cucukellrani ciktaarvikesqelluni.