Read Yupik 2 Thessalonica-t 1 Bible Online

2 Thessalonica-t 1 - Yupik bible

2 Thessalonica-t 1

¹Paul, Silas, Timothy-llu Thessalonian-aat agayuviatnun Agayutkun Atamteggun, Atanerkun-llu Jesus Christ-akun;

²Agayutem Atamta, Atanrem-llu Jesus Christ-am nakleklici uitanqegcivkarluci-llu.

³Quyavikerrlainarnarqerput Agayun elpeci pitekluci, ilamten̄i, atawaungan tuaten, ukverturiqapigcavci, atunem-llu kenkutlerci pikanirpagluni.

⁴Taumek ucuryagutekamceci Agayutem agayuviini asvailucirci ukverci-llu pitekluku, nangcimallerpecen̄i nanikuallerpecen̄i-llu.

⁵Tau͡gaam Agayutem cuqyutii ellualria nallunaituq, qiliim Angayuqauvia elpecen̄un pisqelluku nangtequteklerci.

⁶Nalluvkenaku uitacurlagcetaartevci akinaullerkaat Agayutmun ellualriamun.

⁷Elpeci-llu uitacurlallgutemten̄i akinaurutlerkarci uitanqegcitmek Ataneq Jesus-aaq qilagmek alaiqan, ilakluki an'gilani pinilriit,

⁸kenerkun akinaurarkauluki Agayutmek nallulriit, Atanemta-llu Jesus Christ-am Gospel-aaran niisnganritestai,

⁹tamakut anucimirqecetaarumaarkaugut nangyuilngurmek piunriumaluteng tangerqiinek Atanrem, pinian-llu ucurnarqutiinek.

¹⁰Tuani Ernermi tekiskuni ucurnariyarturluni yum'ini, irr'ikevkarluni-llu ukveqestem̄ini; tua-i-wa nallunairillerput elpecen̄i ukvequmiin.

¹¹Taumek-llu cali piicauterrlainaramceci Agayutemten̄un piyunarivkaasqelluci kelgillranun, pinimikun-llu assilriamek aturyullerci piciurtesqelluku, ukverpeci-llu caliara qaqitesqelluku.

¹²Atanemta Jesus Christ-am atra ucurnarisqelluku elpecen̄i, elpeci-llu elliini, Agayutemta Atanrem-llu Jesus Christ-am naklekutii aturluku.