Read Yupik 2 Thessalonica-t 2 Bible Online

2 Thessalonica-t 2 - Yupik bible

2 Thessalonica-t 2

¹Qarutaaramceci, ilamten̄i, Atanrem Jesus Christ-am tekitellerkaa pitekluku, elliinun-llu quyurtellerkarput pitekluku.

²Aakulagcetevkenaci umyuarpeciuggun, uitacurlagcetevkenaci-llu, nallunairingualrianun qanngualrianun-llu, kalikanun-llu wangnek kingunengqercecimangualrianun, Atanrem pillerkaa maa-i pimariniluku.

³Yugmun iqluurcecaaqevkenaci, Erneq tauna tekisngailan yuut kingupiaravailgata, Assiilnguum-llu yua alairumavailgan.

⁴Tauna ingluliutarkaq ellminek-llu quyinrurrluni Agayutmi ciktaarvikumaarkami-llu, tua-i ellii Agayutem aqumgalauciatun agayuvigmi nasvagluni ellminek, Agayutnguniluni.

⁵Neq'akenritarci-qaa nayullemni, makunek qalartellruciqa elpecen̄un?

⁶Maa-i-llu nallunritarci camun uitavkaucia, nasvaumanaluni pillerkamini.

⁷Tua-i inerciigalliqsaraq ak'a calingan yuut nalluatni, tau͡gaam nuqtestiin pivkarngaitaa au͡gaumallerkaan engeliinun.

⁸Nutaan-llu inerciigalnguq alairarkauguq; tauna Atanrem Jesus-aam piunrirarkaugaa qanmi anernerakun cirlakarkauluku-llu tekitellermikun ucurnarqelriakun.

⁹Tauna Satan-aam caliarakun tekitarkaq, piniqapiggluni irr'inarqelrialiluni iillanarqelriatgun-llu alarcetaariluni,

¹⁰assiilngurkun alarcetaarluki piunrirarkat; tua-i piciunrem kenkii akurtunrilatgu anirtuumallerkarteng.

¹¹Man'a-llu pitekluku Agayutem iqlutmurrnarqellrianek piciqai, iqluurutet ukveqesqelluki,

¹²tamalkuita pinarqelriaruniarkauluki piciunrem ukveqenritestai elluanricaram-llu anglanakestai.

¹³Tau͡gaam ilamten̄i, kenkek'ngaini Atanrem, quyateksuumirrlainaramceci Agayutmun, tua-i elliin ayagmek nakmikellruaci anirtuusqelluci Anernerem kenciknarivkallrakun, piciunrem-llu ukveqellrakun.

¹⁴Man'a pitekluku kelellruaci Gospel-aamteggun piksagutesqelluku Atanemta Jesus Christ-am ucurnarqucia.

¹⁵Taumek ilamten̄i, pektayiinaci nangerngaci tegumiaqluki-llu ayuqucirtuuceci wangkutnek, qanllerkun wall'u igautetgun.

¹⁶Atanemta Jesus Christ-am ellminek, Agayutem-llu Atamta kenkestemta, iquklicuilngurmek-llu qarutestemta, assilriamek-llu neryuniurutkicestemta naklekutekun,

¹⁷caceturiliki ircaquci asvairivkarluci-llu assilriakun qanllerkun caliakun-llu.