Read Yupik 2 Thessalonica-t 3 Bible Online

2 Thessalonica-t 3 - Yupik bible

2 Thessalonica-t 3

¹Nutaan-llu, ilamaa, piicautelaqicikut, Atanrem qaneryaraa patagmek sagtesqelluku ucurnarivkaumasqelluku-llu elpecen̄i pillruciatun.

²Iqlutun umyualegnek yurrluulrianek-llu anirtuusqelluta, yuut-wa tamarmeng ukvengqenrilata.

³Tau͡gaam Ataneq piciuguq elliin asvairiciqaaci assiilngurmun-llu pivkarngaunaci.

⁴Atanerkun nalirrukenritamceci alerquucimcetun picirci piarkaucirci-llu.

⁵Atanrem ircaquci apertuuskiliki Agayutem kenkiinun Christ-am-llu asvailucianun.

⁶Ilamtaa, watua ellimerturamceci Atanemta Jesus Christ-am atrakun, iqlutun yuulriit ilagaasqevkenaki alerquutemta-llu atunritestai.

⁷Tua-i elpecen̄ek nallunrilavciu ayuqucillerput atu'urkarci; tua-i iqlutun ayuqucingqellrunrilamta akunlevcen̄i.

⁸Yuum-llu neqiinek akiinaku nereksaitellruukut; tau͡gaam caliurluta cakviurluta-llu erenret tamalkuitni unugtuumaita, nenguluugutnguyuumiilamta elpecen̄un.

⁹Yugnun kusguanarqenrilucirput pitkevkenaku, tau͡gaam cuq'lirnaluci, kingunerput atuusqelluku.

¹⁰Tua-i nunavcen̄i-llu uitallemten̄i mat'umek picirkillruamceci, yuk caliyuilkuni nerngaitniluku.

¹¹Tua-i niicamta akunlevcen̄i iqlutun yuulrianek, caliksaitqapiggluteng, tau͡gaam agalkarrluteng.

¹²Tuaten ayuqelriit Atanerkun Jesus Christ-akun picirkiraput eguaqurluki-llu nepailngurkun calisqelluki, nakmiin-llu neqkaitnek neresqelluki.

¹³Tau͡gaam elpeci, ilamten̄i, assilrianek calillerci taqsuqucaqunaciu.

¹⁴Yuum-llu niisnganrilkaki makut igautemta alerquutai, tauna yuk nallunairtuqiciu, ilagarpek'naku-llu, kasnguyugtelluku.

¹⁵Tau͡gken inglukelriacetun ayuqutevkenaku, tau͡gaam ilakelriatun qarulluku.

¹⁶Uitanqegcitem-llu Atanran ellminek uitanqegcitmek cikiumarrlainarlici tamaitgun. Atanrem nayurlici tamarpeci.

¹⁷Wii, Paul-aami, unatemkun umyuaqutmek igaramci nallunailkutaulriamek igautemni tamalkuitni, tuaten watua igartua.

¹⁸Atanemta Jesus Christ-am naklekician nayurlici tamarpeci. Amen.