Read Yupik 1 Timothy 1 Bible Online

1 Timothy 1 - Yupik bible

1 Timothy 1

¹Wii, Paul-aaq, Jesus Christ-am apostle-aarani Anirturtemta Agayutem pisquciatun, Atanrem-llu Jesus Christ-am neryuniurutemta.

²Timothy-mun, nakmiin qetunrangutemnun ukverkun; naklekutmek takumcukutmek-llu uitanqegcitmek-llu pingesqumaamken Agayutmek Atamten̄ek kingunelegmek, Atanemten̄ek-llu Jesus Christ-amek.

³Pisqellrucimtun Macedonia-mun ayakatallemni, Ephesus-aami uitaurqina, inerquaniaten-llu ilait iqlutun elicungcariyulriit.

⁴Cumigutevkenaki ciuliatgun kinguvallret qanengssiit nalirrugnarqelriit piniriinautnguvkenateng-llu ukvermun.

⁵Tua-i alerquutem iqua keneknguuq ircaqukun menuilngurkun, umyuarniurutaunani-llu piciulriakun-llu ukverkun.

⁶Tamana ilaita uniurrluku avtut qannguallermeggnun.

⁷Elicungcarilriaruyugyaaqluteng alerquutnek, amta-llu taringeksaunaku qanllerteng, wall'u piciusqumallerteng.

⁸Tau͡gaam alerquutet atawaugut yuum elluarrluki atuquniki.

⁹Nalluvkenaku man'a, alerquutet taqumanritut ellualrianun yugnun. Tau͡gaam qanrucunailngurnun, niicunrilngurnun-llu elluanrilngurnun, agayutailngurnun-llu, angayuqameggnek tuqucilrianun, ilameggnek-llu tuqucilrianun.

¹⁰Arnanek angutngullgutmeggnek-llu akusrarutekilrianun, yugnek-llu ayakauciyulrianun, iqlungalrianun-llu, iqlutun-llu ukvernarcarilrianun, allanun-llu qaneryaram piciulriim narurcestainun.

¹¹Cuqyutekluku Agayutem ucurnarqelriim Gospel-aara, wangnun taicimalria aulukesqelluku.

¹²Quyavikaqa Christ Jesus-aaq Atanerput, piyunarivkaanga mat'umek-llu caliarkillua, piciukngamia.

¹³Mat'um ciungani caunrilkelallrungramni, nangcilallrung'e'rma-llu, inglulicetaariaqlua-llu. Tau͡gaam takumcuklua au͡g'aritaanga, nallumalua ukvenrilucimtun tuaten pillruama.

¹⁴Atanemta-llu naklekutii tungemnun angtataitqapigtuq, pingevkarlua ukvermek kenekmek-llu Christ Jesus-aamelngurmek.

¹⁵Piciuguq man'a, tamalkuitnun-llu ciuniuyunaqluni; Christ Jesus-aaq nunamun tekitellruniluku assiilngiumalriit anirturyarturluki; tamakut-llu arcaqanqaatnga.

¹⁶Tau͡gaam man'a pitekluku cikiumallruunga takumcukutmek, wangkun ciumek takumcutaucini nasvagnaluku Jesus Christ-am, cuqyutngusqelluku ukveqestekainun unguvamun nangyuilngurmun.

¹⁷Atanermun nangyuilngurmun, tuquyuilngurmun, tangrrumayuilngurmun, Agayutmun kiimi, nallutailngurmun, pikevkararkaugut takarnarqun ucurnarqun-llu akwarpak akwanun! Amen.

¹⁸Makunek ellimerturamken, qetunramaa Timothy, qaneryarat elpenek apertuutestem̄a pisquciicetun, tamakutgun pektayiitniartuten anguyautellriatun.

¹⁹Tegumiaqluku ukveq umyuaqegtaar-llu, tua-i ilaita umyuaqegtaaraam cakaallrakun ukverteng cagmalaraat.

²⁰Hymenaeus-aatun Alexander-llu; Satan-aamun tunellregemtun qacungakinanriisqellukek.