Read Yupik 1 Timothy 2 Bible Online

1 Timothy 2 - Yupik bible

1 Timothy 2

¹Ciukluku eguaquramci, yuut tamalkuita piicautelaasqelluki, kaigat'laasqelluki-llu, quyaterrlainarluki,

²angayuqat atanrulriit-llu tamalkuita; nepaunata uitanqegciluta-llu yuullerkarput pitekluku, piciuluta-llu.

³Man'a atawaungan, Agayutmi-llu Anirturtemten̄i akurtuyunaqluni.

⁴Elliin yuut tamalkuita anirtuusqumai piciuneq-llu nallunritesqelluku.

⁵Agayun atauciungan, atauciuluni-llu akunleqlirput Agayutem yuum-llu akunliigni, wani-wa tauna yuurtelleq Christ Jesus-aaq.

⁶Ellminek cikiutekleq akiliutnguluni tamalkuitnun, pinarikan nallunairumaarkaullruami.

⁷Tamana pitekluku nakmikumaunga qaneryariurten͞gulua apostle-aarulua-llu, (iqlunritua, piciulriamek qanertua), Jews-aarunrilnguut ayuqucirturarkauluki ukverkun piciulriakun-llu.

⁸Taumek yuut piicagglainaasqanka tamiini, qulmun-llu yagtellriit ellualriarukilit eq'errutaunateng nalirrugutaunateng-llu.

⁹Tuaten-llu arnat kenugtelaasqelluki aturamegteggun anagutevkenaki, talluitevkenaki-llu, ellmikutuarauluki-llu, nuyateng-llu anagulluki tangnircarpek'naki, cucukesqevkenaki-llu tangnircautet suulutaat, uqumyagngalnguut, akitulriit-llu aturat.

¹⁰Tau͡gaam caliatgun assilriatgun aturaqegcisqelluki.

¹¹Arnaq nepaunani niicugniarkauguq niisngaluni-llu.

¹²Tau͡gaam arnaq ayuqucirturten͞gusqumanritaqa cali-llu ciullguuraluku atanrungnaqesqevkenaku angutmun, tau͡gaam nepaunani.

¹³Adam-aaq ciumek piurcimallruan, Eve-aq-llu kingumek.

¹⁴Adam-aaq-llu ciumek alartellrunrituq, tau͡gaam arnii alarcecimallruami assiilngirtuq.

¹⁵Ilangcivkenaki arnat anirtuumaarkaugut irnilallermegteggun, ciumureskuneng ukverkun, kenkakun, elluakun ellmikutuaraullermegteggun-llu.