Read Yupik 1 Timothy 3 Bible Online

1 Timothy 3 - Yupik bible

1 Timothy 3

¹Piciuguq man'a qanrutkumalria, “Yuk allgiliyauyukuni assilriamek caliangqerrsulartuq.”

²Allgiliyaq canganarqutaitarkauguq, ataucimek tau͡gaam nuliangqerrluni, pitacqeggluni tamalkuitni, umyuartuluni-llu, murilketarluni, kusgurtarluni, elicungcariyunqeggluni-llu,

³taangaryunqegpek'nani, callugyunqegpek'nani-llu, ilalciugarkauluni-llu, arivacunqegpek'nani-llu, tukuuyunqegpek'nani-llu.

⁴Tau͡gaam atanruarkauluni enemini, irniani-llu maligtaqutelluki nepailngurkun.

⁵Wani-wa yuk atanrusciigalkuni enemini, qaillun-mi atanruciqa agayuvigmi?

⁶Agayuvigmun ilautenrraq piyunaituq, ellminek pivaknayukluni, tuunrangayiim-llu picetaarutainun picurlagnayukluni.

⁷Cali-llu ukvenrilngurni tuaten qanrutkumaarkauguq elluatuuniluku, tua-i canganarqekuni tuunrangayiim negaanun napetnayukluni.

⁸Ikayurtet-llu ellatuarkaugut, malrupegtevkenateng, taangaryunqegpek'nateng-llu, tukuuyunqegpek'nateng-llu.

⁹Ukverem-llu piciulriarutai tangrrumaksailnguut tariknaurait allamek umyugaunateng.

¹⁰Tamakut piarkat naspaarraaqiciki, nutaan-llu qaillun ayuqenrilkuneng ikayurten͞gureskilit.

¹¹Nulirrit-llu ayuqmun ellatuarkaugut, piciliqengtuliuvkenateng, pitacqeggluteng, piciuluteng-llu tamalkuitni.

¹²Ikayurtet ataucimek tau͡gaam nuliangqerrlit; irniateng eneseng-llu elluarrluki aulukekilitki.

¹³Elluarrluteng ikayurten͞gulriit qanrutkumalartut assilriamek, ukvermek-llu, Christ-amun Jesus-aamun atalriamek.

¹⁴Ukaqvaggun ullagnayukengramken makunek igaramken.

¹⁵Pinaciangekuma nallunritesqelluten qaillun elluarrluten ayuqucirkarpenek Agayutem eniini, wani-wa Agayutem unguvalriim agayuviani; piciunrem ayagtekngaku tusnganeqluku-llu.

¹⁶Iillanarqut ilumun, ukverumacimta nallunarqelriari taringumaksailnguut: Agayun kemegkun alaillruuq, Anernerkun piciurcimaluni, an'gilat-llu tangellruluku, Jews-aarunrilngurnun-llu qalarutkumallruluni, ukveqellruluku-llu nunamiut, pakmavircecimaluni-llu ucurnamun.