Read Yupik 1 Timothy 4 Bible Online

1 Timothy 4 - Yupik bible

1 Timothy 4

¹Tau͡gaam Anerneq taringnaqluni qanertuq kinguqvaarni ilait ukvermek tuigciiqniluki, maligtaquluki-llu iqlutmurucilriit anerneret, elitnaurutait-llu anernerrluut.

²Taukut iqlulartut piciunguarluteng, umyuaqegtaarait 'legcimiita tuarpiaq cavigkun uuqnarqellriakun.

³Kassuucaraq inerquulluku, neqkat-llu ilait Agayutem piurtellri, quyatekluki ciuniurarkat ukvelrianun piciulriim-llu nallunritestainun.

⁴Agayutem piurtellri tamarmeng assiata qessaksunaunateng-llu, quyatekluki ciuniuqumteki.

⁵Kenciknarivkaumiita Agayutem qaneryaraakun piicagkun-llu.

⁶Ilavnun nasvakuvki makut, elluarrluten Jesus Christ-amun kevgauciquten, anglicaumaluten ukverem qaneryarartaikun elitnaurutkegtaarteggun-llu maligtaqungnaqlerpegun.

⁷Ilangcinrilki qanengssiit piciunrilnguut arnat-llu qannguarutait; tau͡gaam pinircarluten elluaryaramun.

⁸Temem pinircallra atuuyaaquq ellma, tau͡gaam elluaryaraq atuunruuq canun tamalkuitnun akqutengqerrami unguvamten̄i, maa-i unguvakamten̄i-llu tekitarkami.

⁹Piciuguq man'a tamalkuitnun-llu ciuniuyunaqluni.

¹⁰Tamana pitekluku cakviulartukut piciliumaaqluta-llu Agayun unguvalria cacetuqutekngamteggu tamarmeng yuut anirturtiit, arcaqerluni ukvelriani.

¹¹Makut alerquutekniaten elitnaurutekluki-llu.

¹²Yugnun caunrilkevkaryaqunaku ayagyuarucin, tau͡gaam cuqyutnguluten ukvelrianun qanllerpegun caurallerpegun, kenkillerpegun, ayuqucirpegun, ukverpegun, menuitellerpegun-llu.

¹³Tekitnatkamnun urenkelluten qaneryaramek naaqilaqina qaneryariuraqluten-llu, elitnauriaqluten-llu.

¹⁴Agayutem cikiutii elpenelnguq prophet-aatgun taicimalria ciulirneret unatmeggnek pategvikellratgun, atunricaqunaku.

¹⁵Makut atuqiki cumigulluki-llu, elluariinallren alaitnaurtuq tamalkuitnun.

¹⁶Murilkelluten elpenek elitnaurillren-llu; ciumurutniaran; tuaten pikuvet, elpenek anirturciquten niitesteten-llu.