Read Yupik 1 Timothy 5 Bible Online

1 Timothy 5 - Yupik bible

1 Timothy 5

¹Ciulirnerulria nunuryaqunaku, tau͡gaam atakellriatun pillagavkenaku, ayagyuanrit-llu anelgutkellriatun pitarrluki;

²arnaurtellriit aanakelriacetun, ayagyuanrit-llu nayagaqelriacetun, umyuan menuunaku.

³Aipainret aipainrupialriit takaqiki.

⁴Tau͡gaam aipaineq irniangqerqan wall'u tutgarangqerqan, taukut agayumacirteng aturluku angayuqateng aulukekilitki akinaurluki, tamana atawaungan Agayutmi-llu akurtuyunaqluni.

⁵Aipainrupialriim aulukestekailnguum cacetuqutek'laraa Agayun, kesianek-llu kaigarrlainarluni piicagaqluni-llu ernerni unugtuumaita.

⁶Tau͡gaam akusrarrluni yuulria tuqumauq unguvang'e'rmi.

⁷Makunek qalarut'larki qanernarqutaitnaurtut.

⁸Tau͡gaam yuum ilani nakmiin-llu yun'i aulukenrilkaki, ukverucia piciunrituq, arcaqanqaa-llu ukvenrilnguum.

⁹Aipaineq yuinarnek pingayunek allrakungeksailnguq ilaucecaqunaciu, tuaten-llu ataucirquunrilngurmek uingqelleq.

¹⁰Tau͡gaam niitekegcinarqelria caliamikun assilriatgun; mikelngurnek anglicarillrukuni, allaniulallrukuni, ukverumalriit-llu it'gaitnek erurilallrukuni, kusgualallrukuniki arenqiallugtellriit, cumigtellrukuni-llu caliani assilriani tamaitni.

¹¹Tau͡gaam aipainret ayagyuanrit ciuniurpek'naki, Christ-amek avvnayukluki uingyunga'arrnayukluki-llu.

¹²Qanercetaarutmek-llu pingluteng, tua-i-wa akquteklerteng ciuqliq pegcamegteggu.

¹³Qessamun-llu elitnaurluteng, elalirtaarluteng, qessanqerruqainarpek'nateng-llu uputaariyugluteng, agalkarrluteng-llu qanrucirkaunrilngurnek qanraqluteng.

¹⁴Taumek ayagyuanrit arnat uingesqumayaaqanka irniangelaasqelluki, enemelnguut aulukesqelluki, inglukilriit-llu piciliqengyulriit pillerkangqercetevkenaki.

¹⁵Tua-i ilait ak'a avcata Satan-aaq maliggluku.

¹⁶Kina ukverumalria angun wall'u arnaq aipainernek ilangqerquni, elliin aulukekiliki, agayuvigmun aulukevkarpek'naki, tau͡gaam agayuviim auluknaurai aipainret aulukestailnguut.

¹⁷Ciulirneret elluarrluteng atanrulriit, apenqegcinaqnaurtut takaqumanaurtut-llu, arcaqerluteng qaneryariulriit elitnaurilriit-llu.

¹⁸Qaneryarami qanrutkumiin: “Sugg'eliciryaqunaku kuluvak mukaarkanek tutmarluki qeltairilria.” Waten-llu: “Calista ciuniuyunarquq akiliutminek.”

¹⁹Ciulirnerulriim picetaaruyutii ilangciyaqunaku, tau͡gaam nallunairistekangqerquvet malrugnek wall'u pingayunek.

²⁰Picurlautellget inerqurki yuut takuatni, allat civuurasqelluki.

²¹Alerquramken Agayutem ciuqerrani, Atanrem-llu Jesus Christ-am, cucukumalriit-llu an'gilat, makut alerquutenka ciumurutesqelluki, yuut pitatekluki pisqelluki, ingluarvikek'ngaunak.

²²Yuk alqunarmek unatevnek pategviksaqunaku, yuut-llu assiilnguitgun pillguciryaqunaki, tau͡gaam menuunak.

²³Merrlainarmek menrirluten, tau͡gaam wine-amek ellma mer'aqluten ilun pitekluku apquciqelallren-llu pitekluku.

²⁴Ilaita yuut assiilnguit ayagmek alaitelartut, cuqtaayunaqluteng, ilaita-llu assiilnguit kinguqvaggun alailartut.

²⁵Tuaten-llu ilaita caliarit assilriit ayagmek alailartut, tuaten-llu ayagmek pinrilnge'rmeng iirumangaitut.