Read Yupik 1 Timothy 6 Bible Online

1 Timothy 6 - Yupik bible

1 Timothy 6

¹Pistet teguarulriit ataneteng takaqlitki, Agayutem atra ayuqucirtuutai-llu caunrilkumanritnaurtut.

²Ukverumalrianek-llu atanelget tamakut caunrilkenrillitki, tua-i anelguteknguata, tau͡gaam kevgiurlitki tua-i ukvelriaruata kenkumaluteng-llu kevgiuqengait. Makunek ayuqucirturki eguaqurluki-llu.

³Makuunrilngurnek-llu yuk elitnaurikuni, maligarutenrilkuni-llu qaneryaraqegtaarmun, Atanemta Jesus Christ-am qaneryarainun, ayuqucirtuutmun-llu elluaryaram pisqellrakun,

⁴tauna ellminek pivakuq, nallumiimi canek, tau͡gaam usviitetacimitun nalirrugnarqellriit aperyarat-llu naigtaarutek'larai.

⁵Tuaten piluteng ciknayaramun inglukutmun-llu tekiuqurainalartut, qacungakiyaramun-llu kamakiyaramun-llu, piciunrilngurnek qanekluaraulluteng umyuarrliqngameng, piirucameng-llu piciunermek, umyuarteqengluteng tukuuyaraq elluaryarauyukluku; tuatnalrianun ilagautenrilu.

⁶Tau͡gaam elluaneq, nunamiutarnek piyuumirpek'nani, unangeluaqautngulartuq.

⁷Camek nunamun mat'umun tekiutellrunrilamta, camek-llu ayausngaunata.

⁸Neqkangqerramta atu'urkarluta-llu, wangkuta elaranritelta.

⁹Tau͡gaam tukuuyulriit naspaatem negaanun naptelartut amllernun-llu usviilkarcaranun, aglumayaranun-llu picurlagnarqelrianun; tamakut qecuqiutek'larai yuum tuquarkauluni piunqigtarkaunrirluni-llu.

¹⁰Kenkellra akim acilquqaa tamarmi assiilnguum. Ilaita ayarikluku ukvermek avvuyutek'laraat, kap'lartut-llu ellmeggnek, amllernek umyuarniullerkameggnek.

¹¹Elpet Agayutem yuani, qimagki tamakut, maliggluki-llu makut: elluaryaraq, Agayutem qigcikellra, ukveq, kenka, ilalciuneq, ellmikutuuneq-llu.

¹²Callua assilriakun callugyaraakun ukverem; unguva nangyuilnguq tegumiaqiu kelgumacirpetun, nallunairillrucirpetun-llu assilriamek, yuut amlleret niitelluki.

¹³Alerquramken tangerqiini Agayutem cam tamarmi unguvakitestiin, ciuqerrani-llu Christ Jesus-aam, Pontius Pilate-aam ciuqerrani assilriamek nallunairillrem;

¹⁴alerquun man'a atuqiu menuunak, qanernarqutaunak alaillerkaanun Atanemta Jesus Christ-am.

¹⁵Man'a nasvaumaciquq pillerkaa tekiskan, kenciknarqelriakun kiimi-llu Pinilegpaulriakun, angayuqat Angayuqaunrat, atanrulriit-llu Atanrunrat;

¹⁶kiimi tuquyuilnguuluni, uitaluni tanqigmi yuum mallegciigalkiini; yuum tangeqsailkii tangerciigalkii-llu. Elliin piklikek takarnarquciq pinirpak-llu akwanun. Amen.

¹⁷Alerqurki tukuulriit maani nunami ellaitnek quyiisqevkenaki umyugaitgun, cacetuqutekesqevkenaki-llu tukuutet nalirrugnarqellriit; tau͡gaam unguvalria Agayun cacetuqutekesqelluku, elliin cikiakut canek tamalkuitnek amlleriluki angniutekamten̄ek.

¹⁸Assilriamek pinaurtut, tukuunaurtut assilriatgun caliamegteggun, cikiqengyuumirrlainarluteng qunuyugpek'nateng-llu.

¹⁹Quyurciluteng assilriamek tusnganerkamek tuani tekitarkami, tegunauraat unguva nangyuilnguq.

²⁰Elpet, Timothy, murilkiu tamana elpenun tunumalria. Negurluki elluanrilnguut piciunrilnguut-llu qannguat, ingluliurutait-llu “Elisngangualriit,”

²¹tamakunek nalqigcillermegteggun ilait alartelartut ukveq pitekluku. Naklekutem nayurliten.