Read Yupik 2 Timothy 1 Bible Online

2 Timothy 1 - Yupik bible

2 Timothy 1

¹Wii, Paul-aaq, Jesus Christ-am apostle-aara Agayutem pisquciatun, unguvam akqutii aturluku Jesus Christ-amelnguut.

²Timothy-mun qetunramnun, kenkek'ngamnun: Agayutem Atamta, Atanemta-llu Jesus Christ-am naklekliten, takumcukluten, uitanqegcivkarluten-llu.

³Quyavikaqa Agayun kevgiuqek'ngaqa, ciuliamtun menuilngurkun umyuakun, umyuaqerrlainalaamken piicallemkun unugmi erenrani-llu.

⁴Aluviliullren-llu neq'erqamku tangerrsuumiqapigtelaramken, angniriciqngama.

⁵Umyuaqertaqamku-llu ukverucin piciulria uitaqarraalleq maurlurpeni Lois, aanavni-llu Eunice, nalirrukenritaqa-llu elpeni uitacia.

⁶Taumek umyuaqesqaqa Agayutem cikiutii elpenelnguq unatemkun pategvikraanemnek, ayuqesqelluku.

⁷Agayutem cikillrunrilakut Anernermek alingyugarkamek, tau͡gaam pinilriamek kenkilriamek-llu asvailngurmek-llu umyuamek.

⁸Taumek kasnguksaqunaku qanruteklerkaa Atanemta, wall'u wii kelucaucimalriartaani, tau͡gaam pillgucirnga nangteqnaikun Gospel-aam, pisquciakun pinian Agayutem.

⁹Elliin anirtullruakut kelegluta-llu tanqilriakun kelgutkun, caliamteggun pivkenani tau͡gaam piyullmikun, naklekutekun-llu cikiutngullerkun wangkutnun Christ Jesus-aakun ellarpagtangvailgan.

¹⁰Tau͡gaam maa-i nallunairumauq alaillrakun Anirturtemta Jesus Christ-am, elliin au͡g'allrukii tuqu, unguva piunriyuitnaq-llu nallunairluku Gospel-aakun.

¹¹Tamatum caliaqellerkaanun elkarcimaunga qaneryariurten͞gusqellua, apostle-aarusqellua-llu elicungcarten͞gusqellua-llu Jews-aarunrilngurnun.

¹²Tamana pitekluku nangtequa, ilangcivkenaku kasngukenritaqa nallunrilamku ukvervik'ngaqa nalirrukevkenaku-llu tunellma elliinun tegumiaqiyugngacianek Erneq tauna engelkarrluku.

¹³Piciulriit qanruyutet tegumiaqiki, tamakut wangnek niitelten ukverkun kenkekun-llu Christ Jesus-aamelngurkun.

¹⁴Tamana elpenun tunumalria piciulria pegcaqunaku ikayuumaciakun Anernerem Tanqilriim wangkutni uitalriim.

¹⁵Man'a nallunritan, Asia-melnguut tamarmeng tunutellruatnga ilaklukek Phygelus Hermogenes-llu.

¹⁶Atanrem naklekliki Onesiphorus enelgutai-llu, elliin pulengtaq pinirivkalaanga, kalivnerenka-llu kasngukeksaunaki.

¹⁷Tau͡gaam Rome-amun tekicami yuallruanga cumiggluni nataqlua-llu.

¹⁸Atanrem ernermi tuani naklekliu; wangnun-llu kevgiulaucia amllerteggun Ephesus-aami nallunritan.