Read Yupik 2 Timothy 2 Bible Online

2 Timothy 2 - Yupik bible

2 Timothy 2

¹Taumek elpet, qetunramaa, asvailkina naklekutmi Christ Jesus-aamelngurmi.

²Elpenun-llu ayuqucirtuutek'lallrenka yuut amlleret ciuqerratni, yugnun ellualrianun cikiutekniaten elitnauruteksunaknaurait ilameggnun.

³Taumek pektayiilkina, assilriatun anguyagtiitun Jesus Christ-am.

⁴Yuk anguyautellria unguvam mat'um caliarinun ilarqusngaituq, umyuaqegcivkarnaluki cucukesten̄i anguyagten͞guyaramun.

⁵Yuk-llu pitassiarautellria uniskengellrung'e'rmi nasqerruciumangaituq picirkiutait tau͡gaam atuquniki.

⁶Naucetaarviliurta calilria ciumek teguteqarraalartuq tamaaken naunranek.

⁷Umyuangcautekiu qanelqa; Atanrem-llu cikirnauraaten taringnarqucimek cani tamalkuitni.

⁸Neq'akumau Jesus Christ-aq, David-aam kinguvra maktelleq tuqumalrianek qanellratun Gospel-aama.

⁹Tamaaggun nangteqngama assiilngurmek atulriacetun qillerqumalua-llu: tau͡gaam Agayutem Qaneryaraa qillerqumanrituq.

¹⁰Taumek pektayiitua cani tamalkuitni cucukumalriit pitekluki, ellaitnun cali unakesqumaluku anirtuun Christ Jesus-aamelnguq, ucurnaq-llu nangyuilnguq.

¹¹Ukvernarquq man'a: Tuqullgutkellrukumteggu, cali unguvallgutekciqerput.

¹²Pektayiilkumta, atanruviani pillgucirciqerput; aassaqutekekumten̄i, elliin-llu aassaqutekciqaakut.

¹³Piciunrilengramta, cakaniyuituq elliin piciucia, ellminek aassaqutekesciigalami.

¹⁴Makut neq'akevkarrlainaqiki, alerqualuki Atanrem ciuqerrani qanaataagutenritnaurtut qannguanek, ikayuutnguarkaunrilngurnek, niitestaitnun piunriuteknayukluki.

¹⁵Elluatuungnaqluten Agayutem tangerqiini, calilriatun caliani kasngukenrilkiitun, qaneryaraq piciulria uniurteksaunaku.

¹⁶Tau͡gaam neguraluki elluanrilnguut piciunrilnguut-llu qannguat, iqlutmurutekngiinarciqngatki yuut.

¹⁷Elitnaurutiit-llu mamyuilngurtun ayungiinalartuq. Tuaten ayuquq Hymenaeus Philetus-llu;

¹⁸taukuk piciulriamek avtellruuk alarrlutek, qanramek makcaraq ak'a pellullruniluku, yuut-llu ilaita ukverat piunrirluku.

¹⁹Ilangcivkenaku Agayutem tusnganliara pektaituq nallunailkutarluni waten, “Atanrem pini nallunritai; kia-llu imum Christ-am atran apaastiin assiilnguq peggliu.”

²⁰Tau͡gken nerpagmi assigtat kavirlit suulutaat-llu kiimeng piunritut, tau͡gaam cali murauluteng qikuuluteng-llu; ilait kencignaqluteng, ilait-llu kencignaunateng.

²¹Taumek yuk au͡gkunek menuircaquni assigtaugarkauguq kencignarqelriamun kenciknarivkaumaluni, atuugarkauluni-llu Atanermun, upingarrlainarluni-llu assilrianun calianun tamalkuitnun.

²²Cali qimagki ayagyuat aglumaciit; tau͡gaam atungnaqluki elluaryaraq, ukveq, kenka, uitanqegcineq-llu, ilakluki tamakut Atanermun kaigalriit, ircaqumegteggun menuilnguut.

²³Tau͡gaam umyugailkarcaraq, taringnarqenrilnguut-llu nalirrugnarqellriit neguraluki, ayuqenriqrutkelaamegteki.

²⁴Atanrem-llu pistii qanaataarngaituq; tau͡gaam pillagavkenani tamalkuitni elicungcariyunqeggluni, qemitaagutevkenaki.

²⁵Ellmikutuarauluni ayuqucirturnaurai inglulitellriit; pitsaqevkenaki Agayutmun umyuarnayagucivkaqaki piciulria nallunritesqelluku.

²⁶Ellangekuneng ellmeggnek anirturnaurtut tuunrangayiim negaanek teguarullermeggnek, Agayutem pisqutii aturluku.