Read Yupik 2 Timothy 3 Bible Online

2 Timothy 3 - Yupik bible

2 Timothy 3

¹Man'a-llu nallunrilgu, ernerni nangneqlirni cakviurnarqelriit tekiciiqut.

²Tua-i yuut ellmeggnek arcaqakeciqngata, akiyunqeggluteng, nanrarluteng, pivakluteng, caunrilkilriaruluteng, angayuqameggnek narurtaariyugluteng, 'lingrataunateng, elluarpek'nateng,

³takumcutaunateng, akqelteng aturyugpek'naki, piciunrilngurnek piciliqengyugluteng, yurrluuluteng, alingnaqluteng, caunrilkiluteng assilrianek,

⁴piciunguaryulriit, ciumuaryugluteng, umyuamegteggun quyilriit, kenkilriit anglanarqelrianek Agayutmi kenkenruluki,

⁵(Agayumacingqerrsaaqluteng amta-llu cakaniutekevkenaku) tuatnayulriit ulurki.

⁶Tuaten ayuqelriit iirluteng enenun iteryulartut teguarurrluki-llu arnat umyugailnguut assiilnguum cirlakekai maligtaqutellriit aglumayullermegteggun,

⁷kesianek eliquranger'meng, piciulria taringesciiganaku.

⁸Tuaten Jannes, Jambres-llu Moses-aamun inglulitellruciagtun, tuaten ukut cali inglukaat piciulria, angutet ikiulrianek umyualget, assiitqapiggluteng ukverciiganateng.

⁹Tau͡gaam ciumurtenrirarkaugut; tua-i umyugailkartellrat nasvaumaciqngan yugnun elkegcetun nasvaumallruciagtun.

¹⁰Waniwa nallunriraten elitnaurutenka, ayuquciqa, cangnaquteka, ukveqa, ilalciuciqa, kenkilqa, pektayiiluciqa,

¹¹nangyutenka, nangtequtenka-llu wangnun tut'ellriit Antioch-ami, Iconium-llu, Lystra-mi-llu; qaillun pitalriamek nangcimaciqa! Tau͡gaam Atanrem tamakunek tamalkuitnek aviutellruanga.

¹²Ilumun, tamarmeng Christ Jesus-aami elluarrluteng yuuyulriit tuaten cali nangtauciqut.

¹³Tau͡gaam assiilnguut yuut iqlutmurucilriit-llu arcariinarciqut, iqluk'ngaqluteng iqluurumaluteng-llu.

¹⁴Elpet tau͡gaam, ciumuruskiki elitelten akqumalten-llu, nalluvkenaki kitumek elitellruciitnek.

¹⁵Mikelnguullerpenek-llu ayagluten tanqilriit igat nallunritaten, taukut-llu apertuutaatgen anirtuumallerkarpenek ukveqellrakun Christ Jesus-aaq.

¹⁶Qaneryaraqegtaaraat tamarmeng Agayutmek cikiutekumaut Anernerkun, elitnaurutnguarkauluteng, inerquutnguarkauluteng, kitugutnguarkauluteng, ayuqucirtuutnguarkauluteng-llu elluamun;

¹⁷yuk Agayutem yua taqmiggngiinaasqelluku, saskukiumaluni calianun assilrianun tamalkuitnun.