Read Yupik 2 Timothy 4 Bible Online

2 Timothy 4 - Yupik bible

2 Timothy 4

¹Taumek alerquagamken ciuqerrani Agayutem Atanrem-llu Jesus Christ-am, unguvalriit tuqumalriit-llu cuqcistekaata, alaillerkaani Angayuqauviani-llu.

²Qaneryaraq qalarutkiu; cumiguskiu piyarami piyaraunrilengraan-llu; inerqurilaqina, kitugciaqluten-llu eguaqurillerpeni nerinisngialliqeksaunak, elicungcarillerpeni-llu.

³Pillerkaq tekiciiqngan taringesciigatlerkaat piciulrianek elitnaurutnek; tau͡gaam aglumacirmegteggun quyurciciqut elitnauristekameggnek, umyuameng nall'artestekainek.

⁴Piciulria-llu ulurciqaat qannguanun-llu tuiggluteng.

⁵Elpet tau͡gaam, pektayiilkina tamaitni, nangtequtevni pektaunak, qaneryariurtem caliara caliaqiu, Agayutmun-llu kevgiullren qaqimavkaqiu.

⁶Waniwa cikiutekumallerkaqa upingariuq, ayallerkaqa-llu canimelliuq.

⁷Anguyaucarami elluarrlua callullruunga, aqvautelqa qaqitaqa, ukveqa tegumiaqaqa.

⁸Wak'nirnek elluam nasqerrutetaanek pikiumaunga, Atanrem Cuqcistem ellualriim cikiutekarkaanek wangnun tuani Ernermi, wii-llu kiima pivkenii tau͡gaam tamalkuitnun tekitellerkaan nerinikestainun.

⁹Piyunartacirpetun ullakia tamaa.

¹⁰Demas-aam unicanga, nunam mat'um pii kenekngamiki, Thessalonica-mun-llu ayagluni; Crescens-llu Galatia-mun, Titus-aaq-llu Dalmatia-mun.

¹¹Kiimi Luke-am nayuraanga, Mark-aq malikluku taikina; ikayuryugngiinga caliamni.

¹²Tychicus-llu ayagcetaqa Ephesus-aamun.

¹³Ulikutaqa Troas-aamun unitelqa Carpus-aam eniini, taikuvet ang'aqkiu, kalikat-llu, arcaqerluki igarviinka.

¹⁴Alexander-aam punerneliurtem cakneq inglukellruanga; Atanrem akinaurliu caliarinek.

¹⁵Tauna kellusgu, qanelput cakneq inglukellruaki.

¹⁶Qanerniaqerraallemni ilikestaitua, tau͡gaam tamarmeng yuut cakaaraatnga. Piicagvikaqa Agayun tamana picetaaruyutiit ellaitnun tut'esqevkenaku.

¹⁷Ilangcivkenaku Atanrem ililirturaanga pinirivkarlua-llu qalarucillemkun, Gospel-aaq nallunriluaqaasqelluku Jews-aarunrilnguut-llu tamalkuita niitesqumaluki; aviucimallruunga-llu yugtutulim qanranek.

¹⁸Atanrem-llu aviuciiqaanga tamalkuitnek assiilngurnek, cavkarpek'nii-llu tekiuciiqaanga Angayuqauviminun qilagmun. Ellii ucurnarili akwarpak akwanun! Amen.

¹⁹Umyuaqutmek tuyuranka Prisca Aquila-llu, cali-llu Onesiphorus, ilai-llu.

²⁰Erastus Corinth-ami uitauq, tau͡gaam Trophimus Miletus-aamun unitellruaqa naulluungan.

²¹Uksurpailgan taingnaqkina. Elpet-llu umyuaqutmek tuyuraatgen Eubulus, Pudens, Linus Claudia-llu, tamarmeng-llu ilakutellriit.

²²Atanrem Jesus Christ-am nayurliu anerneren. Naklekutem nayurlici. Amen.