Read Yupik Philemon 1 Bible Online

Philemon 1 - Yupik bible

Philemon 1

¹Wii, Paul-aami, Christ Jesus-aaq pitekluku itertaulriami, Timothy-mek ilalua anelgutemten̄ek, Philemon-aamun kenkek'ngamten̄un calillgutemten̄un,

²Apphia-mun-llu nayagamten̄un, Archippus-aamun-llu anguyagten͞gullgutemten̄un, agayumalrianun-llu nunavni.

³Naklekun piuli elpecen̄un uitanqegcin-llu Agayutmek Atamten̄ek, Atanermek-llu Jesus Christ-amek.

⁴Quyavikerrlainaraqa Agayun umyuaqaqamken piicallemkun.

⁵Niitnaungan kenkicin ukverucin-llu Atanrem Jesus-aam tungiinun ellualriit-llu tungiitnun.

⁶Piicagtua-llu ukverpet pillgucillrakun nallunaitesqelluki cat assilriit piarkaput Christ-ami.

⁷Kenkicirpegun angnircetarpenga angtuamek qarullua-llu, anelgutmaa, ukverumalriit ircaqruit piniriavki.

⁸Taumek man'a pitekluku, uluryara'arpek'nii Christ-akun anelgutekngamken, alerquryugngaamken caliaqesqelluku pinarqelria.

⁹Tuaten pivkenii, kenka pitekluku qarulluten piqataramken, wii-wa Paul-aami angutngurrlua, maa-i-llu itertaulua Christ Jesus-aaq pitekluku.

¹⁰Kaigavikamken una qetunraqsaguskeka Onesimus pitekluku, itengqallemni wangnun yuurtellria.

¹¹Mat'um ciungani elpeni catngunricaaquq, maa-i tau͡gaam catngurrluni elpeni wangni-llu.

¹²Waniwa utercetaqa elpenun ircaqumnek malilirluku.

¹³Avaliqsugyaaqengramku elpenek cingumalriatun itengqallemni Gospel-aaq pitekluku kevgiuresqellua.

¹⁴Nalluvni tuaten pisciigatua umyuan nall'artenritnayukluku, tau͡gaam elpenun assilriakun umyugiurutkesqelluku.

¹⁵Tayima man'a pitekluku avvingaqallrungatuq elpenek, ataam yuksagutarkaungavgu avtenqigtarkauvkenaku.

¹⁶Pistetun teguatun pivkenaku tau͡gaam pistem piunratun, anelgutetun kenkumalriatun, ilukegcinaqluni wangni, elpeni-llu nutaan pinruluni ilakelriatun kemegkun Agayutkun-llu.

¹⁷Taumek wiinga yugnikekuvnga, una ciuniurru wangtun pitarrluku.

¹⁸Umyuan navgullrukaku wall'u camek teguillrukaten, wangnun elliarkaugan.

¹⁹Cimirciqaqa wiinga, iqlunritua, unatemkun nakmiin igautaqa man'a, akiilngungqenritliavet-llu wangni, unguvan tamalkuan.

²⁰Ilumun-llu, anelgutmaa, ikayungcartua elpenun Atanerkun, ircaquqa pinirivkaasqelluku Christ-akun.

²¹Makunek igaramken niiciiqngavnga; nallunritamken pisqumalqa anaggluku piarkaucirpenek.

²²Upyusnga-llu wiinga ciuniumavigkamnek, neryuniurama piicautellerpegun cali elpenun tunumanayuklua.

²³Epaphras-aam, itengqallgutma Christ Jesus-aakun, aryuqutmek tuyuraaten.

²⁴Ukut-llu calillgutma: Mark-am, Aristarchus-aam, Demas-aam, Luke-am-llu.

²⁵Atanrem Jesus Christ-am naklekician nayurliu anerneren. Amen.