Read Yupik Hebrews 11 Bible Online

Hebrews 11 - Yupik bible

Hebrews 11

¹Wani-wa ukveq neryuniuqengamta nalirrugneriutekaa tangrrumanrilnguut-llu nallunairutkaat.

²Tamaaggun ciuliaput imumi Agayutmek atawakumallruut.

³Ukvemteggun taringarput nunam piurucia Agayutem qanellrakun, tangrrumalriit-llu piliaqumaut tangrrumanrilngurnek.

⁴Ukvemikun Abel Agayutmun ekuagillruuq cikiutmek akurtuyunarqenranek Cain-am piani, tamaaggun-llu elluakumaluni. Agayutem-llu nallunairvikaa ciuniurillermikun cikiutainek; tuqullruyaaquq tau͡gaam ukvellermikun qalarutaakut cali maa-i.

⁵Ukvemikun Enoch pakmavircecimallruuq tuqumek-llu nalluluni; kia-llu nalaqenritaa, Agayutem teguaku. Tegumavailegmi-llu qanrutkumauq Agayutmun ilukegcitekniluku.

⁶Tau͡gaam ukverunani yuum ilukegcivkarciigataa. Agayutmun ullauculria ukveqnarqaa Agayutngucia nunuliqenglaucia-llu yuartem̄inek.

⁷Noah-llu aarcirtuumallermini tut'arkat pitekluki alairpailgata, ukvemikun niitellruuq, nauciluni angyarpagmek enelgutmi anirtuutekaatnek. Tuatnallermikun pinarqelriarurtai nunam yui, paitaqsagulluku-llu elluaryaraq ukverkun unakumaarkaq.

⁸Abraham-aaq-llu ukvemikun niisngallruuq kelgumallermini nunamun paitarkaminun ayaasqumaluni; ayallruuq-llu, natmun ayaucirkani nallungermiu.

⁹Ukvemikun-llu pektaullruuq nunami akqutmini nunakumanrilngurtun pelatekaumaaqluteng, Isaac-llu, Jacob-aaq-llu paitarkangqellguteklukek akqutminek.

¹⁰Neryuniurutekngamiu nunakaq asvailngurmun tusnganliumalria, Agayutem nautellra piliara-llu.

¹¹Ukvemikun-llu Sarah piyunarqucingellruuq qingallerkaminek, arnassagaurteng'e'rmi, piciukngamiu akqesten̄i.

¹²Taumek yugmek ataucimek tuquniaralriamek, kinguveqellriit yuurtut qiliim agyaitun amllertaluteng qau͡gyatun-llu imarpiim cen̄iinelngurtun.

¹³Tamarmeng ukut ukverluteng tuqullruut, akquyutseng akurturpailemegteggu. Tau͡gaam envanek tangrruallruat quyakluku-llu, nalluvkenaku allanrucirteng pektaucirteng-llu nunam qaingani.

¹⁴Tua-i waten qalartellriit yuut nallunailaraat nunakangengnaqucirteng.

¹⁵Nunallerteng unitellerteng umyuaqekunegteggu uterrviksaraat.

¹⁶Tau͡gken maa-i, nunamek assinranek piyugtut wani-wa pakemkumiutarmek. Taumek Agayutem kasngukenritaa Agayutiitnek aprumallerkani, tua-i nunakaatnek upyutellruamiki.

¹⁷Ukverkun-llu Abraham, yuvriumallermini, Isaac tunyaaqaa, elliin-llu akqutmek akurtullrem kiingan qetunrani tunyuumaa,

¹⁸qanrutkumalria waten, “Isaac tumekluku kinguverkaten aterpagcimaciqut.”

¹⁹Umyuarteqngami Agayun makceciyugngacianek yugnek tuqumallrungraata; tuaten-llu ilumun tuqumayaaqellranek uterrnguarcetaa.

²⁰Ukvemikun-llu Isaac-aam qetunraagni Jacob Esau-llu ciunguluku pingevkarak atawaqaasqutnek, atata atu'urkakegnek.

²¹Ukvemikun Jacob-aaq, tuquqataami Joseph-aam qetunrak atawaqaasqak ayarumi kangranun puteggluni piicagluni.

²²Ukvemikun Joseph-aaq, cali tuquvailegmi Israel-aat angicimallerkaat qanrutkellrua, alerquagiluni-llu tememi tungmagtellerkaanek.

²³Ukverkun Moses-aaq yuurcan, angayuqaagken iirumallruak iraluni pingayuni elkegni kenegnaqngan; nunam-llu atanran alerquutii catkevkenaku.

²⁴Ukverkun Moses-aaq, taqmigcami Pharaoh-m panian qetunraanek aprumallerkani qessayagutaa.

²⁵Agayutem yuin nangcimallguteklerkaat cucukenruluku anglaniyarani assiilngurni pellugarkani.

²⁶Nunuliumallerkani taringamiu Christ-aq pitekluku, piciliutekumallerkaq tukuutetun pitartaa cucunarqenruluku Egypt-aam tukuutaini.

²⁷Ukverkun Egypt-aamek ayagtuq, atanrem eq'errutii alikevkenaku, pektayiilami tangrrumanrilngurmek Atanerminek tangvalriatun.

²⁸Ukverkun Kituun (Paaskaaq) aturaa, auk-llu ciqrutekluku agtuusqumavkenaki yung'eqarraarutaita piunrirtiitnun.

²⁹Ukverkun yuut qerallruut imarpigkun Red Sea aprumalriakun tutmallerteng kinrumaluku; tau͡gaam Egypt-aam yui tuaten pingnaqsaaqellratni mer'em naligai piunrirluki.

³⁰Ukverkun Jericho-m casgui teggalqut iqucimaut uivaarumariatki ernerni malrunlegni.

³¹Ukverkun Rahab akissuq, piunriumallrunrituq niicunrilnguut ilakluki, tua-i elluarrlukek ciuniuramikek nunamek paqtellriik.

³²Camek cali qanerciqsia? Piviiruciiqngama qanrutkenritanka Gideon, Barak, Samson, Jephthah, David-wa, Samuel-aaq-llu prophet-aat-llu.

³³Taukut ukvemegteggun atanruviirillrulriit, elluarivkarilriit, akqutnek ciuniurilriit, yugtutulit qanritnek umgilriit;

³⁴kenermek nipcilriit, nuussirpagnek qimalriit, cirlaucirmeggnek pinirimalriit, anguyaucarami artuqairutellriit, nunalgutkumanrilnguut-llu anguyagtait qimagtelluki.

³⁵Arnat yut'eng yuunriumarilriit ataam ciuniularait unguircecimaluki. Ilait nangcimallruut angicimallerkarteng arcaqakevkenaku, unguinqiggnaluteng unguvamun assinrulriamun.

³⁶Allat-llu piciliutekumallruut, piqertuarumaluteng-llu, kalivniumaluteng, itengqaaqluteng-llu.

³⁷Teggalqunek miluquumaaqluteng, kegglarluki-llu kepumaaqluteng, nuussirpagkun-llu tuqucimaluteng. Tarritelallruut aturangqerrluteng qusngit amiitnek qusngirngalnguut-llu, caunateng, nanikualuteng, nangcimaluteng,

³⁸tamakut nuna man'a tunriukuteknarqaat, qimagauluteng nunami naugiyuilngurmi ingrini-llu, petmigni-llu nunam-llu qerranqurrini.

³⁹Ukut-llu tamarmeng nallunairumange'rmeng ukvemegteggun akqutkumalleq pikliutellrunritaat.

⁴⁰Assinranek Agayutem upyutellruakut wangkuta ciunguluki, ilakevkenata qaqimarisqevkenaki.