Read Yupik Hebrews 12 Bible Online

Hebrews 12 - Yupik bible

Hebrews 12

¹Taumek nallunairterugarnek kassugusngiimta, ataki wangkuta piyunailutet tamalkuita pegglaput, assiilnguq-llu atuqeryulallerput, qacuiqsaunata-llu tumkarput aturlaut aqvautellriatun.

²Tangvaurluku Jesus-aaq ukvemta ayagniutestii qaqitestii-llu. Elliin angniq atu'urkani pitekluku kelistaq atullrua kasngunarqelria catkevkenaku, aqumluni-llu Agayutem aqumlleran tallirpilirneranun.

³Umyuaqekiciu ellii assiilngiumalrianun ilalkumallra uumikutekun waten pitalriakun, mernungenritnaurtuci alingyugpek'naci-llu.

⁴Assiilnguq ingluklerpeciuggun aunrallerkarci tekilluku inglukiksaituci.

⁵Nalluyagutarci-qaa eguaquun qetunraulriacetun aterpaggluci waten? “Qetunramaa, Atanrem ellangcautii ellmikuukevkenaku, ilaciqertevkenak-llu anucimirqecetaarumakuvet elliikun:

⁶wani-wa Atanrem ellangcalaraa kenkekni, anucimirqecetaalaraa-llu ciuniullni.”

⁷Ellangcallerkarci pitekluku ilalkumalartuci. Agayutem qetunramitun pitarrluci piaci; kina qetunraulria atiin ellangcaqsaitau?

⁸Ellangcaumanrilkuvci, tamarmeng atuqiitnek, mikelnguuciquci atailnguuluci, irniaruvkenaci-llu.

⁹Cali-llu, atangqellruukut ellangcartekamten̄ek, takaqellruaput-llu. Taumek-qaa niisnganrungaitukut anernemta atiitnun, unguvaluta-llu?

¹⁰Tua-i ellaita ellangcallruitkut carrarmi piyugtacimegcetun, elliin tau͡gaam ellangcalaraakut elluarrluta pillerkamten̄ek, ellmitun elluarisqelluta.

¹¹Pitmini ellangcaumalleq tamarmi aknirnarquq angnirnarqevkenani; kinguakun tau͡gaam naugilartuq elluaryaram atsainek uitanqegcinarqelrianek, tuaten pimalriit atu'urkaitnek.

¹²Taumek unateci aqevlalriit nalugciki, ciisquci-llu pinialnguut pinircarluki.

¹³Manigcarciki-llu tumyarat it'garpecen̄un, tussitellria aviqitenritnaurtuq, tau͡gaam canrircecimaluni.

¹⁴Yugni tamaitni nepaitellra yuaqiciu, kenciknarillerkarci-llu; tuaten pinrilnguut Ataneq tangerrngailatgu.

¹⁵Murilkici ilavci Agayutem takumcukutii cakaanritnauraa; eq'ukutem-llu acilqu͡rra naunritnaurtuq uitacurlagceciluni-llu, amlleret-llu tamaaggun menuurtenritnaurtut.

¹⁶Ilasi-llu akusrarutekilriarunritnaurtuq, Agayutmek-llu qigcikinrilnguuluni Esau-tun, amaqliulriim atu'urkaanek paitarkaminek navrucilriatun neqkarrarmun.

¹⁷Nallunritarci kinguakun, atawaqaasqutkaminek piyuumillermini niicimanritellruuq, umyualinqigtesciigalami, pingnaq'ngermiu aluviliuraqluni.

¹⁸Ullautenrilavci ingrimun agtuumaarkamun, ekualriamun-llu, tan'germun-llu, angniitnarqelriamun-llu, anuqerpagmun-llu,

¹⁹cupu'uryaram-llu nepiinun, erinamun-llu; erinam tamatum niicugnisten̄i kaigavkarai qanrutenqigtesqevkenateng.

²⁰Artuamegteggu inerquutekellra waten, “Ungungssiunge'rmi ingrim agturtii teggalqunek miluquumaarkauguq.”

²¹Tangvallra alingnaqngan Moses qanellruuq, “Uulegtua alingama.”

²²Tau͡gaam elpeci Zion-aam ingrianun ullautuci Agayutem unguvalriim eniinun, Jerusalem-aamun pakemkumiutarmun, an'gilarugarnun-llu nunaniryugluteng quyungqalrianun.

²³Agayutmun-llu yuurtellriit qilagmi igausngalriit quyurrviatnun, cuqcistem̄un-llu tamarmeng Agayutiitnun, ellualriit-llu natlugneriucimalriit anerneritnun,

²⁴Jesus-aamun-llu, akquyutem nutaram akunlairtiinun, augmun-llu ciqrusngalriamun qalartellriamun Abel-aam pian tukninranek.

²⁵Murilkici qalarutesceci qacutenritnaurarci. Wani-wa taukut qimagciigalkatgu niitenritlerteng aarcirturtesseng nunami, qaillun-mi wangkuta qimagniarceta caunrilkekumteggu aarcirturilria pakmaken.

²⁶Tuani nuna pekcetellrua eriniin: Tau͡gaam maa-i akqillruuq, “Ataucirqumek cali angalaciiqaqa, nuna kiingan pivkenaku tau͡gaam qilak-llu.”

²⁷Qanrami, “ataucirqumek” nallunairaa angalacimallrem au͡g'allerkaa piliaqumallertun, angalacimasciigalnguq piusqelluku.

²⁸Taumek quyakilta angayuqauvigmek ciuniullemten̄ek pekcecimasciigalngurmek, taumek-llu Agayutmun tunelta agayuyaramek ciuniuyunarqelriamek, qigcigyugluta civuuraluta-llu.

²⁹Wani-wa Agayutvut kenertun piunririlriatun ayuqngan.