Read Yupik Hebrews 3 Bible Online

Hebrews 3 - Yupik bible

Hebrews 3

¹Taumek, ilamaa, ellualriani kelgumacikun pakemkumiutarkun pillgutkelriani, umyuaqiciu Jesus-aaq ukverumacimta Apostle-aara, Agayulirten͞gunra-llu.

²Elkartestem̄inun maligtaqutellruuq, Moses-aam maligtaqullruciatun Agayutem eniini.

³Tau͡gaam Jesus-aaq Moses-aam ucurnarqutiin angenranek pimallruuq, tuaten enelista takarnarqenruciatun eneliamini.

⁴Tua-i tamarmeng enet nautestengqelartut yugnek, tau͡gaam canek tamalkuitnek naucilria Agayutnguuq.

⁵Wani-wa Moses-aaq Agayutem eniini tamiini maligtaqutellruuq pistetun, nallunairluki cat kinguqvani qanrutkumaarkat.

⁶Tau͡gaam Christ-aq maligtaqutellruuq Agayutem eniini Qetunratun. Wangkuta-llu enekaakut tegumiaqekumteggu ukverput cacetuqutvut, ucuryaguteklerput-llu neryuniurutvut.

⁷Taumek, Anernerem Tanqilriim qanellruciatun, “Ernerpak erinii niiskuvciu,

⁸tegg'ivkanriciki ircaquci inglulitaalriacetun naspaamallermeggni yuilqumi.

⁹Ciuliarpeci picetaalaraatnga calianka-llu tanglarait allrakuni yuinaagni malrugni.

¹⁰Taumek ilutequtekellruanka taukut kinguveqellriit, qanerlua-llu, ‘Ircaqumegteggun avterrlainartut; tumyararkiutenka nalluit.’

¹¹Taumek qenqertellemni asguranaillrucimtun, ‘Iterngaitut mernuinerciutemnun.’”

¹²Murilkici, ilamaa, ilavci ircaqrua assiicuartuq ukverunani-llu, avvucuaraaci-llu Agayutmek unguvalriamek.

¹³Tau͡gaam eguaquuci atunem erenret tamaitni “Ernermek” aprumalriim taktaciatun, ilasi ircaqumikun tegg'ivkaumanritnaurtuq iqluyullrakun assiilnguum.

¹⁴Christ-aq pillgutkarput ukveqarraallerput, ciumuruskumteggu iquklitlerkamun pektayiinata.

¹⁵Maa-i qanrutkumallrani, “Ernerpak, erinii niiskuvciu tegg'ivkanriciki ircaquci inglulitaalriacetun.”

¹⁶Kinkut taukut niitellriit amta-llu narurciluteng? Taukuunritut-qaa Egypt-aamek anelriit Moses-aamek ciuliqagterluteng?

¹⁷Kinkut-llu ilutequtekaki allrakuni yuinaagni malrugni? Taukuunritut-qaa assiilngilriit, temait-llu yuilqumi katagluteng?

¹⁸Kinkunun-llu asguranaillrua mernuinerciutminun iterngaitniluki, imkunun tau͡gaam niicunrilngurnun?

¹⁹Taumek taringarput iterciigaluciat ukvenrilucirteng pitekluku.