Read Yupik Hebrews 4 Bible Online

Hebrews 4 - Yupik bible

Hebrews 4

¹Taumek, mernuinerciutiin akqutii uitallrani, uivagciuteklaut ilavcen̄un tekitenritnayukluku.

²Tua-i wangkuta-llu Qaneryaraqegtaaraam tekitellruakut ellaicetun; tau͡gaam qaneryaraq niitellerteng cakaniutekenritaat, tua-i ukvengqenrilameng niitestai.

³Wangkuta ukverumalriani mernuinerciutmun itertukut, qanellruciatun, “Taumek qenqertellemni asguranaillrucimtun, ‘Iterngaitut mernuinerciutemnun.’” Tau͡gaam elliin caliani taqellrua ellarpak piurcimariamiu.

⁴Tua-i nani qanrutkellrua erenret malrunelgat waten, “Erenret-llu malrunelgatni Agayun mernuinercillruuq caliaminek tamalkuitnek.”

⁵Amta-llu wani qanerluni, “Mernuinerciutemnun iterngaitut.”

⁶Taumek itellriartangqerrarkaungan, taukut-llu ciuqvaarni Qaneryaraqegtaarmek niitellriit itenrilata ukvenrilucirmegcetun.

⁷Ataam ernermek nutaramek elkarciuq, “Ernerpak-gguq.” Kingurpiikun qanerluni David-aakun qaneryaratgun niitellemteggun: “Ernerpak erinii niiskuvciu tegg'ivkanriciki ircaquci.”

⁸Wani-wa Joshua-m mernuinercircetellrukaki, Agayun allamek ernerkamek qaneryanrituq.

⁹Taumek Agayutem yui neryuniurutengqertut cali Sabbath-aamek mernuinercirvigkamek.

¹⁰Tua-i kina Agayutem mernuinerciutiinun itellria arulairmiciquq caliaminek Agayutem tuaten pillruciatun.

¹¹Taumek itengnaqlaut tauna mernuinerciun, ilavut-llu katanrilli niisnganritlermikun imkucetun.

¹²Tua-i Agayutem qaneryaraa unguviin. Piqunqeggluni-llu ipenruluni-llu nuussirpagmi atunem kegginalegmi, tarneq anerneq-llu avtellerkaagnun kapsugngalukek, usgunret-llu patret-llu, taringluku-llu ircaqum umyugaa, picirkiuraa-llu.

¹³Ciuqerrani-llu iirumalriartaituq piurcimalriamek, tau͡gaam cat tamarmeng ikirngaut manimaluteng-llu tangerqiini kevgiuqengamta.

¹⁴Taumek, Agayulirten͞gunermek quyinrulriamek pingqerramta qiliit pellugluki mayullermek, Jesus-aamek Agayutem Qetunraanek, ukverput tegumiaqlaut.

¹⁵Wani-wa Agayulirten͞gunengqenritukut pinialutemta taringesciigatestiitnek, ellii tamaitgun wangkucicetun naspaamallruan, tau͡gken assiilngirpek'nani.

¹⁶Taumek kalivyugpek'nata ullautnaurtukut takumcukutem atanruvianun, takumcukumallerkamten̄un, akurtullerkamten̄un-llu naklekutiinek ikayurnarqellemten̄i.