Read Yupik Hebrews 5 Bible Online

Hebrews 5 - Yupik bible

Hebrews 5

¹Wani-wa tamarmi agayulirten͞guneq yugnek cucukumalria elkarcimauq yuullgutni ullautekarkauluki Agayutmun cikiqengluni cikiutnek, ekuagarkanek-llu assiilnguut pitekluki.

²Naklekluki nallumalriit pellaamalriit-llu caliaqsugngai, ellii-llu pinialutengqerrami.

³Tamana pitekluku, ekuaginarquq yuut assiilnguit kiingita pitkevkenaki tau͡gaam assiilnguni-llu.

⁴Yuk-llu ellminek tamatuurcuituq, tau͡gaam Agayutmek kelgumalartuq Aaron-aatun.

⁵Tuaten-llu Christ-aq ellminek agayulirten͞gunrurtenrituq, tau͡gaam elkartellrua qanrutestiin waten, “Qetunraqamken, ernerpak yuurcetamken.”

⁶Qanellrucimitun cali allami, “Agayulirten͞guuten nangyuilngurmek, Melchizedek-aatun.”

⁷Kemegkun yuullermini Jesus-aaq qastuluni qiagaqluni, aluviliurluni-llu piicalartuq, kaigaciluni-llu anirturyugngastem̄inun tuqumek, niicimallruuq-llu elluarucini pitekluku.

⁸Qetunraunge'rmi, niisngallerkaminek elitellruuq nangtequteklermikun.

⁹Qaqicimallermikun-llu, nangyuilngurmek anirturilriarurtuq niisngastem̄inun,

¹⁰Agayutmek apertuumaluni agayulirten͞gunruarkauluni, Melchizedek-aatun.

¹¹Man'a pitekluku qanerkalirtua, tau͡gaam taringevkarciigatamci elluarrluci niitesciigaliavci.

¹²Akaurcan, mat'um nalliini elitnauristen͞gunaqsaaquci, tau͡gaam maa-i elitnaurcecunarquci pulenglluci Agayutem qaneryaraan arcaqalriarinek. Teggelriamek neqkamek nernariksaituci, milegmek tau͡gaam.

¹³Milegglainarmek atulria elisnganrituq qaneryaram elitnaurutainek, mikelnguungami cali.

¹⁴Tau͡gaam teggelria taqmigingalrianun neqkauguq, elicungcaumalrianun naspaallermegteggun elitaqsugngaluku assilria assiilnguq-llu.