Read Yupik Hebrews 7 Bible Online

Hebrews 7 - Yupik bible

Hebrews 7

¹Uum-wa Melchizedek, Salem-aam atanran, Quyinrulriim Agayutem agayulirtiin Abraham-aaq pairtellrua utertellrani callulrianek atanernek, atawaqertelluku-llu.

²Abraham-aaq-llu elliinun cikiqengellruuq avalimi qulngurutaitnek. Ellii ciumek at'mi kangiakun aterpagingallruuq “Elluaryaram Atanranek,” tuamta-llu cali Salem-aam atanranek, wani-wa “Uitanqegcitem Atanranek.”

³Ataitellruuq aanaunani-llu kinguvrunani-llu, yuurtellra tuqullra-llu nallunarluni, tau͡gaam Agayutem Qetunraa ayuqluku agayulirten͞guuq nangyuilnguuluni.

⁴Tangerrluku angtacia. Abraham-aam ciuliamta avgutellrua uayaaqengami qulngurutaitnek.

⁵Imkut-llu Levi-am kinguvri agayulirten͞guyaramek cikiumalriit alerquumaut Alerquutni yuut qulngurutaitnek tegutesqelluki Abraham-aam kinguveqengraaki.

⁶Tau͡gaam uum angutem ellaicetun ciuliangqenrilnguq qulngurutnek akurtullruuq Abraham-aamek, atawaqaasqellrua-llu akqutengqellra.

⁷Nalirrugnarqevkenani pikegtaunritellria piunran atawaqaasqelaraa.

⁸Maa-i yuut tuquarkaulriit ciuniurilartut qulngurutnek; tuani tau͡gaam yuk tuatnallruuq qanrutkumalria unguvarrlainarniluku.

⁹Elliingungraan Levi qulngurutnek ciuniurarkaq qanruteksunarqerput qulngurutnek cikiqengenguartelluku Abraham-aakun.

¹⁰Yuurteksaitellruan ciuliaminek Melchizedek-aam pairtellrani.

¹¹Qaqimayaraq piurcugngallrukan Levi-artarkun agayulirten͞guyarakun, (taum nalliini yuut alerquutnek cikiumallruata), ciin allamek agayulirtem̄ek pinarqellruat Melchizedek-aartarmek Aaron-aartaunrilngurmek?

¹²Wani-wa agayulirten͞guciq cimiumakan alerquutet-llu tuaten cimiumanarqut.

¹³Wani-wa tauna qanrutkumalria tamatuugarkaq allanek naumallgutkelrianek kingunengqertuq, taukut ekuavigmi kevgiuqsailnguut.

¹⁴Nallunailan Atanemta kingunengqerrucia Judah-mek; taukut Judah-m kinguvri Moses-aam qanrutkellrunritai agayulirten͞guarkauniluki.

¹⁵Tamana nallunaiqanirtuq alla agayulirta piurtellrani Melchizedek-aatun ayuqluni,

¹⁶agayulirten͞gurtellria, alerquutet aturpek'naki, kemegkun kinguvengqerruciq pitekluku, tau͡gaam unguvam nangyuilnguum piyunarquciakun.

¹⁷Qanrutkumiin, “Agayulirten͞guuten nangyuilngurmek, Melchizedek-aatun.”

¹⁸Aipaani ciuqliq alerquun cakaarumauq pinialucia pitekluku atuunrilucia-llu,

¹⁹Alerquutetgun ca man'a qaqimanrilan; aipaani-llu assinrulria neryuniurun taicimauq, tamaaggun Agayutmun ullaucunarivkarluta.

²⁰Ukvernarcaritmek-llu tapengqellruuq. Imkut imumi agayulirten͞gurtaqameng caliarteng tegulallruat ukvernarcautaunateng,

²¹una tau͡gaam qanrutkellrua asguranairluku waten, “Ataneq ukvernarcariluni qanellruuq, umyuani-llu cimirngaunaku, ‘Elpet agayulirten͞guuten nangyuilngurmek.’”

²²Tamaaggun Jesus-aaq nallunairutngurtuq assinrulriamun akquyutmun.

²³Imumi agayulirtet amllellruut, tuqukun-llu arulaircecimalaameng caliarteng ciumurucesciigataat.

²⁴Elliin tau͡gaam agayulirten͞gucini tegumiaqaa nangyuilngurmek, piurrlainaami akwanun.

²⁵Taumek elliin kesianek anirturyugngai Agayutmun ullautellriit ellmikun, tua-i ellii unguvarrlainaami, kaigaterrlainarluki.

²⁶Tuaten pinarqellruuq agayulirten͞gunermek pingqerresqelluta waten ayuqelriamek: tanqilriamek, canganarqutailngurmek, menuilngurmek, assiilngiumalrianek allakaumalriamek, naluumalriamek qiliit quliitnun.

²⁷Imkucetun agayulircetun pinarqenritaa, erenret tamaitni ekuagilalriacetun, ciumek assiilnguteng pitekraarluki kingumek-llu yuut assiilnguit pitekluki. Tuaten ellii pillruuq ataucirqumek pinqiggviinani, ellminek cikiuteklermini.

²⁸Yuut apqucingqengraata alerquutem agayulirten͞gurcet'laryaaqai, tau͡gaam qaneryaram ukvernarcautem, alerquutet kinguatgun tekilluni, Qetunraq elkarcetaa natlugneriucimalria akwanun.