Read Yupik James 1 Bible Online

James 1 - Yupik bible

James 1

¹Wii, James-aaq, Agayutem kevgaani Atanrem-llu Jesus Christ-am, angnimek tuyuramci Israel-aam kinguvrini qula malrugnek cipnelegni nunani skavngalriani.

²Ilamaa, nunaniryukici ayuqenrilngurnek naspaamakuvci,

³nalluvkenaku man'a: ukverpeci naspaamallrakun asvairillerkarci.

⁴Tau͡gaam asvailucirci nuringanrilli, elpeci-llu qaqimalriaruniartuci tamalkiringaluci nau͡gg'un-llu nuringavkenaci.

⁵Ilasi umyugailkuni Agayutmun kaigakili, qunuyuilngurmun avalissarayuilngurmun, cikiumaciquq-llu.

⁶Tau͡gaam kaigakili ukverluni, nalirrugtevkenani. Tua-i nalirrugtellria imarpiim qairitun ayuqngan anuqem ayagaskiitun egqaqluku-llu.

⁷Tauna yuk umyuarteqenrilli camek unangnayukluni Atanermek.

⁸Yuk malrugnek umyualek caqassurarauguq ayuqucimikun.

⁹Ukvelriim ellmikutuuluni mayuqaniumallni angniutekekiliu.

¹⁰Tau͡gaam tukuulriim aciqvaqaniumallni quyakekiliu, tua-i can'gem kangratun piunrirciqngan.

¹¹Akerta piskuni puqlanirluni cakneq nal'aqerciiqaa canek, kangra-llu iggluni, tangenqegcinarqelria-llu piunrirluni. Tuaten-llu cali tukuulria piunrirciquq.

¹²Atawaqertuq yuk naspaamallermini pektayiilkuni, naspaatni pellukuniu akurturciqngami unguvam nasqerrutiinek Atanrem akqutkellranek kenkestem̄inun.

¹³Yuk naspaamakuni qanenrilkili, “Agayutem naspaagaanga.” Wani-wa Agayun assiilngurmek naspaamasciigalan yuk-llu naspaangaunaku.

¹⁴Tau͡gaam yuk naspaamalartuq aglumallermikun iqlutmurucimaaqami.

¹⁵Aglumaciq-llu ayagnengumariaqami assiilngurmek taqutelartuq, assiilnguq-llu pimariaqami tuqumek taqutelartuq.

¹⁶Alarcaqunaci anelgutemni keneknarqelriani.

¹⁷Cikiun tamarmi assilria, natlugnerilnguq-llu cikiun pakmaken kingunengqetuuq, atraraqluni-llu tanqilriit Atiitnek, caqtaayuilngurmek pillinqigcuunani-llu.

¹⁸Elliin piyullermikun yuksagutaakut, piciunrem qaneryarartaakun piurtellerminun ciuqliusqelluta.

¹⁹Taumek anelgutemni, keneknarqelriani! Yuk tamarmi maligaurauskili, qanqataitevkenani, qenqerrngianani-llu.

²⁰Tua-i yuum qenqertii Agayutem elluarucianek calingailan.

²¹Taumek caarrliqsarat tamalkuita pegciki, anagulluni-llu inerciigacaraq, akurturluku-llu ellmikutuuyarakun qaneryaraq, qanrutkumalria tarnerpecen̄ek anirturiyugngalria.

²²Qaneryaramek atulriarukici, niiteqainalriaruvkenaci-llu, alarrnavkenaci.

²³Tua-i kina niiteqainalriarukuni qaneryaramek aturpek'naku-llu, ayuquq yugtun kegginaminek tangvalriatun tarenriurutkun.

²⁴Tua-i ellminek tangrraarluni ayagtuq, egmianun-llu ayuqucillni nalluyagulluku.

²⁵Tau͡gaam kia imum naklekiyaram picirkiutii tangvakuniu, uluqsaunaku-llu, tuaten niiteqainarpek'nani tau͡gaam calilriaruluni, taum caliara atawaqercecimaarkauguq.

²⁶Ilasi agayumayukekuni, alungutni tau͡gken nuqingavkenaku, alarciiquq agayumacia-llu ellmikuuguq.

²⁷Menuilnguq agayumaciq, Agayutem-llu Atamta ciuqerrani caarrluilnguq waniwauguq: kusgualuki elliraat aipainret-llu nangteqellratni, nunamiutarnun-llu caarrluurcetevkenani.