Read Yupik James 2 Bible Online

James 2 - Yupik bible

James 2

¹Ilamaa, Atanermun Jesus Christ-amun ukverumacirci caqtaanrilli yuum taungucia pitekluku.

²Quyungqavigpecen̄un itellriartangqerqan suulutaamek kulutmek aturluni aturaqegtaarnek-llu, tuamta-llu cali itellriartangqerqan arrsaulriamek aturarrliqluni,

³elpeci pikegtakenrukuvciu aturaqegcilria qanrulluku-llu, “Aqumi wavet assilriamun,” arrsaulria tau͡gaam qanrulluku, “Nangernga tuani,” wall'u, “Natermun aqumi ketemnun,”

⁴tuaten-qaa piluci iqlutun umyuangqenrituci tangerrnakillerpeciuggun?

⁵Niicugnici, anelgutemni keneknarqelriani, Agayutem-qaa nakmikeksaitai nunam arrsaulriartai ukverkun tukuusqelluki, angayuqauvik-llu pikesqelluku akqutkellni kenkestem̄inun?

⁶Tau͡gaam elpeci caunrilkaci arrsaulriit. Caknaavkaqsaitaiceci-qaa tukuulriit, qaillukuarten̄un-llu tun'aqluci.

⁷Qacungakeksaitaat-qaa kenciknarqelria ateq aprutsi?

⁸Alerquun angtuamek aprumalria atuquvciu una, “Ilan kenkarkaugan elpetun pitarrluku.” Tua-i elluarrluci piciquci.

⁹Tau͡gaam yuut ayuqevkenaki pikuvciki, assiilngirtuci alerquun-llu atunritarci.

¹⁰Tua-i kia imum alerquutet atunge'rmiki, carrarkun tau͡gaam uniureskuniki narurciiqai tamalkuita.

¹¹Tua-i qanlleq, “Akusrarutekiyaqunak,” qanellruuq cali, “Tuquciyaqunak.” Tua-i-llu akusrarutekinrilngerpet tuqucikuvet, alerquutet narurtaten.

¹²Taumek tuaten qallaskici yuuluci-llu naklekiyaram picirkiutiikun qanercetaarumaarkauluci.

¹³Takumcutailnguq takumcukumavkenani qanercetaarumaarkauguq. Naklekiyaraq pininruuq qanercetaarutmi.

¹⁴Ilamaa, camek iqukegcia yuk ukverniluni qanngermi, caliarunani tau͡gken, ukveran-qaa anirturciqaa?

¹⁵Anelgutsi angun wall'u arnaq matangqakan kainiqluni-llu,

¹⁶ilavci-llu qanruskaki, “Uitanqegciluci ayagci, maqarqici ner'aqluci-llu,” amta-llu cikirpek'naki piilutaitnek, cakaniutnguciqa tamana?

¹⁷Tuaten-llu ukveq caliarilkuni tuqumauq kiimenani.

¹⁸Tau͡gaam, yuk qanerciquq, ukvengqertuten wii-llu caliarlua; nasvisnga ukverpenek caliarunak, wii-llu nasviciiqamken ukvemnek caliamkun.

¹⁹Ukvertuten Agayucetangqerrucianek ataucimek, elluarrluten piuten. Anernerrluut-llu ukvermiut uuleggluteng-llu.

²⁰Umyugailnguuq, taringenritan-qaa ukveq caliarunaku tuqumacianek?

²¹Ciuliarput-qaa Abraham-aaq elluakumallrunrituq caliamikun, Isaac-aamek tun'illermini ekuavigmi.

²²Tangrran-qaa qaillun ukverem piurtelaucia caliamikun, caliakun-llu ukveq pitalqeggilaucianek.

²³Qaneryaraq-llu piciurtuq qanelria, “Abraham-aam Agayun ukveqaa, ellualriamek-llu aprumatekluku,” aterpagingallruuq-llu Agayutem yugnikekiinek.

²⁴Tua-i-llu tangrrarci qaillun caliakun yuk elluakumalaucia, ukverkun kiingan pivkenani.

²⁵Tuaten-llu akissuq Rahab, caliamikun elluakumallruuq ciuniurillermikun kevgagnek, qimagtellukek-llu tumyarakun allakun.

²⁶Tua-i tema anernerunani catngunriluciatun, tuaten-llu ukveq caliarunani catngunrituq.